రెండో టీ20లో శ్రీలంక ఉత్కంఠ విజయం... ఆఖరి ఓవర్ వరకూ సాగిన మ్యాచ్‌లో...
టీమిండియాతో జరుగుతున్న రెండో టీ20 మ్యాచ్‌లో లంక జట్టు ఉత్కంఠ విజయం అందుకుంది. ఆఖరి ఓవర్ వరకూ సాగిన మ్యాచ్‌లో 4 వికెట్ల తేడాతో విజయాన్ని అందుకుంది లంక జట్టు...
133 పరుగుల స్వల్ప లక్ష్యఛేదనతో బ్యాటింగ్ మొదలెట్టిన శ్రీలంక జట్టు, ఆవిష్క ఫెర్నాండో వికెట్ త్వరగా కోల్పోయింది. మొదటి ఓవర్‌కి 1 పరుగు మాత్రమే ఇచ్చిన భువీ, తన రెండో ఓవర్‌లో ఆవిష్కను అవుట్ చేశాడు.
13 బంతుల్లో 2 ఫోర్లతో 11 పరుగులు చేసిన ఆవిష్క ఫెర్నాండో, భారీ షాట్‌కి ప్రయత్నించగా బౌండరీ లైన్ దగ్గర రాహుల్ చాహార్ అద్భుతమైన క్యాచ్ అందుకున్నాడు...
సదీరా సమరవిక్రమ 12 బంతుల్లో ఓ ఫోర్‌తో 8 పరుగులు చేసి వరుణ్ చక్రవర్తి బౌలింగ్‌లో క్లీన్ బౌల్డ్ కాగా, 3 పరుగులు చేసిన ధసున్ శనకను కుల్దీప్ యాదవ్ అవుట్ చేశాడు...
31 బంతుల్లో 4 ఫోర్లతో 36 పరుగులు చేసిన మినోద్ భనుక, కుల్దీప్ యాదవ్ బౌలింగ్‌లోనే భారీ షాట్‌కి ప్రయత్నించి రాహుల్ చాహార్‌కి క్యాచ్ ఇచ్చి అవుట్ అయ్యాడు.
11 బంతుల్లో 2 ఫోర్లతో 15 పరుగులు చేసి దూకుడుగా కనిపించిన వానిండు హసరంగ, రాహుల్ చాహార్ బౌలింగ్‌లో అవుట్ కావడంతో 94 పరుగుల వద్ద ఐదో వికెట్ కోల్పోయింది శ్రీలంక...
రమేశ్ మెండీస్ 2 పరుగులు చేసి అవుట్ కాగా ధనంజయ డి సిల్వ చివరిదాకా పోరాడాడు. భువనేశ్వర్ కుమార్ వేసిన 19వ ఓవర్‌లో ఓ సిక్సర్‌తో 12 పరుగులు ఇవ్వడంతో ఆఖరి ఓవర్‌లో విజయానికి 8 పరుగులు కావాల్సి వచ్చింది.
సకారియా వేసిన 20వ ఓవర్‌లో వరుసగా సింగిల్స్, డబుల్స్ తీస్తూ ఈజీ విజయాన్ని అందుకుంది లంక జట్టు. గత 13 టీ20 మ్యాచుల్లో శ్రీలంకకి ఇది రెండో విజయం.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
