6 6 6 6 6 6 6 6.. ద‌స‌రా రోజు హైద‌రాబాద్ లో దివాళీ పటాసులు పెల్చిన సంజూ శాంస‌న్

Sanju Samson Smashes Second Fastest century By Indian: హైద‌రాబాద్ లో ఆట అంటే భార‌త క్రికెటర్ సంజూ శాంస‌న్ పూన‌కం వ‌చ్చిన‌వారిలా బ్యాటింగ్ విధ్వంసం సృష్టిస్తాడు. మ‌రోసారి అదే మాదిరిగా బంగ్లాదేశ్ బౌల‌ర్ల‌పై విరుచుకుప‌డుతూ త‌న సునామీ బ్యాటింగ్ తో సెంచ‌రీ కొట్టాడు. శాంస‌న్ కేవ‌లం 40 బంతుల్లో సెంచరీ పూర్తి చేశాడు.  

Sanju Samson

Sanju Samson Smashes Second Fastest century By Indian: హైద‌రాబాద్ లో ప‌రుగుల వ‌ర్షం కురిసింది. ద‌స‌రా రోజు దీపావ‌ళీ ప‌టాసులు పేలాయి. సంజూ శాంస‌న్ దెబ్బ‌కు బంగ్లాదేశ్ బౌల‌ర్లు విల‌విల లాడారు. ఫోర్లు, సిక్స‌ర్ల మోత మోగిస్తూ త‌న‌పై విమ‌ర్శ‌లు చేసే వారి నోళ్ల‌ను త‌న సంచ‌ల‌న ఇన్నింగ్స్ తో మూయించాడు. 

ఎక్స్‌ట్రా-కవర్‌లో పేసర్‌ వేసే బంతులను బ్యాక్‌ఫుట్‌లో సిక్సర్ కొట్టే సామర్థ్యం చాలా మంది బ్యాటర్‌లకు  లేదు కానీ, కానీ శనివారం (అక్టోబర్ 12) భారత్-బంగ్లాదేశ్ మధ్య జరిగిన మూడో టీ20లో సంజూ శాంసన్ అద్భుత‌మైన షాట్స్ కొడుతూ సూప‌ర్ బ్యాటింగ్ తో అద‌ర‌గొట్టాడు. తన టీ20 కెరీర్ లో సెంచ‌రీ కొట్టాడు. ఒకే ఓవ‌ర్ లో 5 సిక్సర్లతో గ్రౌండ్ ను హోరెత్తించాడు. శాంస‌న్ ధ‌నాధ‌న్ బ్యాటింగ్ తో బంగ్లాదేశ్‌పై భారత్ ఒక దశలో 11.1 ఓవర్లలో 177/1 ప‌రుగుల‌తో నిలిచింది.

భారత్-బంగ్లాదేశ్ మధ్య 3 మ్యాచ్ ల‌ టీ20ల సిరీస్‌లో మూడో, చివరి మ్యాచ్ హైదరాబాద్‌లో జరిగింది. రాజీవ్ గాంధీ అంతర్జాతీయ క్రికెట్ స్టేడియంలో జరిగిన‌ ఈ మ్యాచ్‌లో టీమిండియా కెప్టెన్ సూర్యకుమార్ యాదవ్ టాస్ గెలిచి బ్యాటింగ్ ఎంచుకున్నాడు. సంజూ శాంసన్‌, అభిషేక్‌ శర్మలు భారత్‌ తరఫున ఓపెనింగ్ బ్యాటింగ్‌కు దిగారు. ఈ మ్యాచ్‌లో అభిషేక్ శ‌ర్మ పెద్ద‌గా ప‌రుగులు చేయ‌కుండానే పెవిలియ‌న్ కు చేరాడు. 4 పరుగులకే ఔట్ అయ్యాడు. ఆ త‌ర్వాత సంజూ శాంస‌న్ బ్యాటింగ్ విశ్వ‌రూపం మొద‌లైంది.

రిషద్ ఓవర్‌లో వ‌రుస‌గా 5 సిక్సర్లు బాదిన సంజూ శాంస‌న్

బంగ్లాదేశ్ బౌలింగ్‌ను సంజూ శాంసన్ చీల్చిచెండాడాడు. గ్రౌండ్ కు అన్ని వైపులా భారీ షాట్లు కొట్టాడు. అతను ఏ బంగ్లా బౌలర్‌ను విడిచిపెట్టలేదు. అంద‌రి బౌలింగ్ లో ప‌రుగులు రాబ‌ట్టాడు. ఇన్నింగ్స్ 10వ ఓవర్లో సంచలనం సృష్టించాడు. రిషద్ హుస్సేన్ వేసిన ఓవర్లో శాంసన్ వరుసగా 5 సిక్సర్లు బాదాడు. తొలి బంతికి పరుగులు చేయలేకపోయాడు. కానీ, ఆ తర్వాత ఐదు బంతులను భారీ సిక్స‌ర్లుగా మ‌లిచాడు. శాంసన్ ఈ ఓవ‌ర్ లో మ‌రోసారి త‌న బ్యాట్ ప‌వ‌ర్ ను చూపించాడు.

తస్కిన్ ఓవ‌ర్ లో వరుసగా 4 ఫోర్లు.. 22 బంతుల్లో హాఫ్ సెంచ‌రీ బాదిన శాంస‌న్ 

సంజూ శాంసన్ దూకుడుగా ఇన్నింగ్స్ ప్రారంభించాడు. అతను ఇన్నింగ్స్ రెండో ఓవర్‌లో బంగ్లాదేశ్ బౌల‌ర్ తస్కిన్ అహ్మద్ బౌలింగ్ ను దంచికొట్టాడు. ఈ ఓవర్లో శాంసన్ వరుసగా నాలుగు ఫోర్లు బాదాడు. ఆ త‌ర్వాత కూడా శాంస‌న్ బ్యాటింగ్ దూకుడు ఆగ‌లేదు. కేవ‌లం 22 బంతుల్లోనే అర్ధ సెంచరీ పూర్తి చేశాడు. అర్ధ సెంచరీ పూర్తి చేస్తున్న సమయంలో శాంసన్ బిగ్గరగా అరుస్తూ బ్యాట్‌ని గాలిలో ఊపాడు. కెప్టెన్ సూర్యకుమార్ యాదవ్ అతడిని కౌగిలించుకుని కలిసి సంబరాలు చేసుకున్నారు. ఆ త‌ర్వాత కూడా సంజూ శాంస‌న్ బ్యాటింగ్ ను కొన‌సాగించాడు.

దసరా రోజు ప‌టాసుల పండ‌గ.. 40 బంతుల్లోనే సెంచ‌రీ 

సంజూ శాంసన్ గత నాలుగు మ్యాచ్‌ల్లో విఫలమయ్యాడు. రెండుసార్లు సున్నాతో ఔట్ అయ్యాడు. కానీ, హైద‌రాబాద్ లో జ‌రిగిన మ్యాచ్ లో ప‌రుగుల వ‌ర‌ద పారించాడు. ద‌స‌రా రోజు దీపావ‌ళి ప‌టాసుల అత‌ని బ్యాటింగ్ సిక్స‌ర్లు, ఫోర్ల మోత మోగించాడు. కేవ‌లం 40 బంతుల్లో సెంచరీ పూర్తి చేశాడు. సెంచరీ కొట్టిన వెంటనే సూర్య క‌మార్ వద్దకు వెళ్లాడు. అతడిని భారత కెప్టెన్ కౌగిలించుకున్నాడు. డ్రెస్సింగ్ రూమ్‌లో ఉన్న సభ్యులందరూ లేచి నిలబడి అతనికి చప్పట్లు కొట్టారు. శాంసన్ ఫోర్ తో ఈ ఫార్మాట్ లో త‌న తొలి సెంచరీ పూర్తి చేశాడు.

భారత్ తరఫున రెండో వేగవంతమైన టీ20 సెంచరీని నమోదుచేశాడు సంజూ శాంసన్. భారత్ బ్యాటర్లలో అత్యంత వేగంగా టీ20ల్లో సెంచరీ బాదిన టీమిండియా బ్యాటర్ గా రోహిత్ శర్మ టాప్ లో ఉన్నారు. 35 బంతుల్లో రోహిత్ శర్మ 2017లో  శ్రీలంకతో జరిగిన మ్యాచ్ లో సెంచరీ కొట్టాడు. బంగ్లాదేశ్-భార‌త్ మ్యాచ్ లో  29 ఏళ్ల సంజూ శాంసన్ 40 బంతుల్లో సెంచ‌రీ చేశాడు. మొత్తం 47 బంతుల్లో 111 పరుగులు చేసి పెవిలియ‌న్ కు చేరాడు. ఇన్నింగ్స్ 14వ ఓవర్‌లో ముస్తాఫిజుర్ రెహ్మాన్ బౌలింగ్ లో ఔట్ అయ్యాడు.