టీ20లే కాదు.. అవి కూడా ఆడాలి.. ఆ సత్తా నీలో ఉంది : టీమిండియా యువ పేసర్ పై గంభీర్ ప్రశంసలు

Avesh Khan: కొద్దిరోజుల క్రితమే భారత జట్టులోకి ఎంట్రీ ఇచ్చిన అవేశ్ ఖాన్ ఆనతికాలంలోనే తాను టీ20లకు సరిపడే బౌలర్ అని నిరూపించుకున్నాడు. అయితే పొట్టి ఫార్మాట్ ఒక్కటే కాదు.. 

ఐపీఎల్ లో లక్నో సూపర్ జెయింట్స్ కు మెంటార్ గా వ్యవహరిస్తున్న  గౌతం గంభీర్..తన జట్టులో ఆడే టీమిండియా పేసర్ అవేశ్ ఖాన్ పై ప్రశంసలు కురిపించాడు. అతడిలో చాలా ప్రతిభ దాగి ఉందని.. ఫాస్ట్ బౌలర్లకు ఉండాల్సిన లక్షణాలన్నీ అవేశ్ లో ఉన్నాయని గంభీర్ కొనియాడాడు.  అయితే టీ20లు ఒక్కటే ఆడితే సరిపోదని, అన్ని ఫార్మాట్లలోనూ రాణించాలని  అవేశ్ కు సూచించాడు. 

గంభీర్ మాట్లాడుతూ.. ‘అవేశ్ చాలా ప్రతిభావంతుడు. అతడిలో మంచి పేస్ ఉంది. అదీగాక క్లిష్ట పరిస్థితుల్లో బౌలింగ్ చేసే ధైర్యం కూడా ఉంది. ప్రతి మ్యాచ్ లో అతడు మెరుగవ్వాలని నేను కోరుకుంటున్నా.  అతడు యువ బౌలర్. ఐపీఎల్ ఒక్కటే అతడి గోల్ కాకూడదు. 

రాబోయే కాలంలో టీ20 వరల్డ్ కప్ తో పాటు వన్డే ప్రపంచకప్ కూడా ఉంది. దానిని దృష్టిలో పెట్టుకుని అతడు ఆడాలి. పాస్ట్ బౌలర్లకు ఉండాల్సిన అటిట్యూడ్ అవేశ్ లో ఉంది. అన్నింటికంటే ముఖ్యమైన విషయం అతడింకా నేర్చుకునే దశలోనే ఉన్నాడు.

అవేశ్ ఇలాగే కష్టపడితే అతడు టీమిండియాకు గొప్ప బౌలర్ అవుతాడు. ఒక్క టీ20 లలోనే కాదు. అన్ని ఫార్మాట్లలోనూ రాణిస్తాడు.. ’ అంటూ ప్రశంసలు కురిపిచాడు. 

మధ్యప్రదేశ్ కు చెందిన ఈ యువ పేసర్ 2021 సీజన్ లో ఢిల్లీ క్యాపిటల్స్ తరఫున ఆడి రాణించాడు. ఆ సీజన్ లో 16 మ్యాచుల్లో 24 వికెట్లు తీశాడు. దీంతో ఈ సీజన్ లో లక్నో సూపర్ జెయింట్స్ అతడికి రూ. 10 కోట్లు వెచ్చించి దక్కించుకుంది. 

ఈ సీజన్ లో లక్నో తరఫున 13 మ్యాచులాడిన అవేశ్ ఖాన్.. 18 వికెట్లు పడగొట్టాడు. ప్రస్తుతం దక్షిణాఫ్రికా సిరీస్ లో సీనియర్ల గైర్హాజరీలో అవేశ్ భువీతో కలిసి కొత్త బంతిని పంచుకుంటున్నాడు.