ఇంగ్లాండ్‌కి భారీ షాక్... టీ20 వరల్డ్‌కప్, యాషెస్ సిరీస్ నుంచి జోఫ్రా ఆర్చర్ అవుట్...

ఐపీఎల్ 2021 సీజన్‌కి ముందు జరిగిన ఇండియా, ఇంగ్లాండ్ సిరీస్‌లో పాల్గొన్న జోఫ్రా ఆర్చర్, కుడి ఎడమ చేతి గాయం కారణంగా వన్డే సిరీస్ ఆరంభానికి ముందే స్వదేశానికి వచ్చేశాడు...

రెండు నెలల విరామం తర్వాత కోలుకుని, ఇంగ్లీష్ కౌంటీ ఛాంపియన్‌షిప్‌లో పాల్గొన్నాడు. అయితే గాయం తిరగబెట్టడంతో మళ్లీ క్రికెట్‌కి దూరమైన జోఫ్రా ఆర్చర్, టీమిండియాతో జరిగే టెస్టు సిరీస్‌లో రీఎంట్రీ ఇస్తాడని భావించింది ఇంగ్లాండ్ క్రికెట్ బోర్డు...

అయితే అతని మోచేతికి అయిన గాయం కోలుకోవడానికి చాలా సమయం పడుతుందని వైద్యులు తేల్చారు. దీంతో ఈ ఏడాది మొత్తం క్రికెట్‌కి దూరంగా ఉండబోతున్నాడు జోఫ్రా ఆర్చర్...

ఐపీఎల్ 2021 సీజన్‌తో పాటు ఆ తర్వాత జరిగే టీ20 వరల్డ్‌కప్, ఆ తర్వాత జరిగే ఆస్ట్రేలియా- ఇంగ్లాండ్ యాషెస్ సిరీస్‌కి కూడా జోఫ్రా ఆర్చర్ దూరంగా ఉంటాడని తెలిపింది ఇంగ్లాండ్ క్రికెట్ బోర్డు...

సౌతాఫ్రికా టూర్‌లో గాయపడిన జోఫ్రా ఆర్చర్, ఆ తర్వాత సరైన క్రికెట్ ఆడలేకపోయాడు. ఈ ఏడాది మార్చి నెలలో అతని వేలి నుంచి ఓ గాజు ముక్కను వెలికి తీసిన వైద్యులు, మళ్లీ మే నెలలో శస్త్ర చికిత్స జరిపారు... 

మైదానంలో ఫీల్డింగ్ చేస్తూ గాయపడడం వల్ల ఆర్చర్ మోచేతికి గాయం కాగా, తన ఇంట్లో ఫిష్ బాల్‌ కిందపడినప్పుడు తన వేలికి గాయమై, ఓ గాజు ముక్క లోపలే ఉండిపోయినట్టు సమాచారం...

టెస్టులతో పాటు టీ20ల్లో ఆల్‌రౌండర్‌గా అదరగొట్టే జోఫ్రా ఆర్చర్... టీ20 వరల్డ్‌కప్‌లో అందుబాటులో లేకపోవడం ఇంగ్లాండ్‌కి గట్టి దెబ్బే కానుంది... తన కెరీర్లో 12 టెస్టులు, 17 వన్డేలు, 12 టీ20 మ్యాచులు ఆడిన జోఫ్రా ఆర్చర్ మొత్తంగా 86 వికెట్లు పడగొట్టాడు.