విరాట్ బ్యాట్ ధ‌రెంతో తెలుసా.. ఆస్ట్రేలియాలో కోహ్లీ క్రేజ్ మాములుగా లేదు మ‌రి !

IND vs AUS - virat kohli : బోర్డర్-గవాస్కర్ ట్రోఫీలో భాగంగా ఐదు మ్యాచ్‌ల టెస్ట్ సిరీస్‌లో ఆస్ట్రేలియాతో తలపడేందుకు భారత్ అన్ని వ్యూహాలు సిద్ధం చేసుకుంది. బోర్డర్-గవాస్కర్ ట్రోఫీ లో వరుసగా ఐదవ సిరీస్ విజయంపై గురిపెట్టింది భార‌త్.. ఇదే స‌మ‌యంలో దశాబ్దం తర్వాత ట్రోఫీని తిరిగి కైవసం చేసుకోవాలని చూస్తోంది ఆస్ట్రేలియా.

అయితే, బోర్డర్ గవాస్కర్ సిరీస్ ఇంకా ప్రారంభం కాలేదు.. కానీ, ఆస్ట్రేలియాలో అప్పుడే స్టార్ భారత బ్యాట్స్‌మెన్ విరాట్ కోహ్లీ క్రేజ్ మొద‌లైంది. కోహ్లినే కాదు అతడి బ్యాట్‌పై ఉన్న క్రేజ్ కూడా అభిమానులను ఉర్రూతలూగిస్తోంది.

నవంబర్ 22న పెర్త్‌లో భారత్-ఆస్ట్రేలియా మధ్య జ‌రిగే తొలి టెస్టు మ్యాచ్ లో బోర్డ‌ర్ గ‌వాస్క‌ర్ ట్రోఫీ సిరీస్ ప్రారంభం కానుంది. ఆస్ట్రేలియాపై అద్భుత‌మైన బ్యాటింగ్ రికార్డు ఉన్న భార‌త స్టార్ బ్యాట్స్ మెన్ విరాట్ కోహ్లీపై అంద‌రి దృష్టి ఉంది. అయితే, ప్ర‌స్తుతం విరాట్ కోహ్లీ బ్యాట్ ఆస్ట్రేలియా మార్కెట్‌లో ప్రకంపనలు సృష్టించింది. దీని ధర వింటే మీరు షాక్ అవుతారు.

ఆస్ట్రేలియాలో విరాట్ కోహ్లీ బ్యాట్ ధర ఎంతంటే?

ఆస్ట్రేలియన్ పోడ్‌కాస్టర్, యూట్యూబర్ నార్మన్ కొచానెక్, ఇటీవలి వీడియోలో విరాట్ కోహ్లీ బ్యాట్ కు ఉన్న క్రేజ్ ను వివ‌రిస్తూ ప‌లు దృశ్యాలు పంచుకున్నారు. అందులో కోహ్లీ ఉపయోగించే MRF జీనియస్ గ్రాండ్ కింగ్ బ్యాట్ ప్రీమియం ధరను చూపించారు. ఇది గ్రెగ్ చాపెల్ క్రికెట్ సెంటర్‌లో 2985 ఆస్ట్రేలియన్ డాలర్లకు విక్ర‌యిస్తున్నారు. ఇది భార‌త క‌రెన్సీలో సుమారు రూ. 1.64 లక్షలు. 

విరాట్ కోహ్లీ ఆటోగ్రాఫ్ ఉన్న స్టిక్కర్లతో ఉన్న ఈ బ్యాట్ క్రికెట్ ప్రేమికులను ఆకర్షిస్తోంది. ఈ బ్యాట్ తో పాటు విరాట్ కోహ్లీ స్టిక్క‌ర్ల‌తో ఉండే ఒక సూప‌ర్ బ్యాగ్ కూడా వ‌స్తుంద‌ని ఆస్ట్రేలియన్ పోడ్ కాస్ట‌ర్ చెప్పాడు. ఇదే కాకుండా విరాట్ క్రేజ్ ఏ స్థాయిలో ఉందే చెప్ప‌డానికి మ‌రో ఉదాహార‌ణ‌.. బోర్డ‌ర్ గ‌వాస్క‌ర్ ట్రోఫీకి ముందు ఆస్ట్రేలియాలోని చాలా మ్యాగ‌జైన్ లు త‌మ ఫ్రంట్ పేజీలో కోహ్లీ ఫోటోతో స్పెష‌ల్ స్టోరీల‌ను ప్ర‌చురించాయి. 

విరాట్ కోహ్లీ నుంచి మెరుగైన ప్రదర్శన వ‌స్తుందా? 

గ‌త కొన్ని మ్యాచ్ ల‌లో విరాట్ కోహ్లీ పెద్ద ఇన్నింగ్స్ లు ఆడ‌టంలో విఫ‌ల‌మ‌వుతున్నాడు. మొదట బంగ్లాదేశ్‌పై, ఆ తర్వాత న్యూజిలాండ్‌పై ఫ్లాప్ అయిన విరాట్ కోహ్లీ నుండి ఆస్ట్రేలియా టెస్టు సిరీస్‌లో మెరుగైన ప్రదర్శనను భార‌త క్రికెట్ జ‌ట్టు, అభిమానులు ఆశిస్తున్నారు. గత ఐదు టెస్టు మ్యాచ్‌ల్లో విరాట్ ఒక్క పెద్ద ఇన్నింగ్స్ కూడా ఆడలేకపోయాడు. ఇలాంటి పరిస్థితుల్లో పెర్త్ టెస్టుతో మళ్లీ ఫామ్‌లోకి వస్తాడని ఆశిస్తున్నారు. ఎందుకంటే ఆస్ట్రేలియాలో విరాట్ కోహ్లీ గణాంకాలు అద్భుతంగా ఉన్నాయి.

ఆస్ట్రేలియాలో కోహ్లి అద్భుత‌మైన‌ ప్రదర్శన‌లు

విరాట్ కోహ్లీ 2011 నుండి ఆస్ట్రేలియాలో 13 టెస్టులు ఆడాడు. ఈ స‌మ‌యంలో కింగ్ కోహ్లీ ఆరు సెంచరీలు, నాలుగు అర్ధ సెంచరీల సహాయంతో 54.08 సగటుతో 1352 పరుగులు చేశాడు. ఇందులో 169 పరుగులు అతని అత్యుత్తమ ప్రదర్శన. కోహ్లి ఐదవ సారి ఆస్ట్రేలియాను సందర్శిస్తున్నాడు.

అతని అత్యుత్తమ ప్రదర్శన 2014-15 సిరీస్‌లో ఉంది. ఇందులో అతను నాలుగు టెస్టుల్లో 86.50 సగటుతో నాలుగు సెంచరీలు, ఒక అర్ధ సెంచరీతో 692 పరుగులు చేశాడు. కాగా, 2024 టెస్టు క్రికెట్‌లో, కోహ్లి 22.72 సగటుతో ఆరు మ్యాచ్‌ల్లో 250 పరుగులు మాత్రమే చేశాడు. అందులో 70 పరుగులు అతని అత్యుత్తమ ప్రదర్శన.