హైదరాబాద్‌లో ధోనీ బర్త్ డే సెలబ్రేషన్స్... ఆర్‌టీసీ క్రాస్ రోడ్స్‌లో 52 అడుగుల భారీ కటౌట్‌తో పాటు..

మాస్ ఫాలోయింగ్ విషయంలో మహేంద్ర సింగ్ ధోనీ రేంజ్ వేరు. సినిమా హీరోలకు తగ్గని స్థాయిలో యూత్‌లో ఫాలోయింగ్, క్రేజ్ సంపాదించుకున్నాడు మాహీ. ఐపీఎల్ 2023 సీజన్‌లో సీఎస్‌కే ఆడిన ప్రతీ మ్యాచ్‌లోనూ ధోనీ మానియా కనిపించింది.. 

చెన్నై సూపర్ కింగ్స్‌ ఎక్కడ మ్యాచులు ఆడినా స్టేడియాలు అన్నీ మాహీ ఫాలోవర్లతో, సీఎస్‌కే సపోర్టర్లతో పసుపు వర్ణంతో నిండిపోయాయి.  ఇంతకుముందు ఎప్పుడూ సీఎస్‌కేకి ఈ రేంజ్ సపోర్ట్ దక్కలేదు. ధోనీకి 2023 సీజన్ ఆఖరి ఐపీఎల్ అనే ప్రచారం జరగడమే దీనికి ప్రధాన కారణం..

జూలై 7న మహేంద్ర సింగ్ ధోనీ పుట్టినరోజు. మాహీ బర్త్ డే కోసం హైదరాబాద్ ఫ్యాన్స్ వినూత్నంగా ప్లాన్ చేస్తున్నారు. ఆర్‌టీసీ క్రాస్ రోడ్స్‌లో దేవీ థియేటర్ దగ్గర మహేంద్ర సింగ్ ధోనీకి 52 అడుగుల భారీ కటౌట్ ఏర్పాటు చేసిన ఫ్యాన్స్.. రేపు ఘనంగా పుట్టినరోజు వేడుకలు జరపబోతున్నారు..

మహేంద్ర సింగ్ ధోనీ ఆడిన కెరీర్ బెస్ట్ ఇన్నింగ్స్‌లు, 2011 వన్డే వరల్డ్ కప్ ఫైనల్ మ్యాచులను అభిమానుల కోసం ప్రత్యేకంగా ప్రదర్శించబోతున్నారు. ధోనీకి హైదరాబాద్‌లో కూడా మంచి ఫాలోయింగ్ ఉండడంతో హౌజ్ ఫుల్ కావడం గ్యారెంటీ..

Dhoni-Rohit

ఇంతకుముందు రోహిత్ శర్మ పుట్టినరోజు సందర్భంగా ఆర్‌టీసీ క్రాస్ రోడ్స్‌లోని సుదర్శన్ 35MM థియేటర్ ముందు 60 అడుగుల భారీ కటౌట్ పెట్టారు ఫ్యాన్స్.

సైజు దృష్ట్యా ధోనీ కటౌట్‌, రోహిత్ శర్మ కటౌట్ కంటే 8 అడుగులు చిన్నది. అయితే థియేటర్‌లో ధోనీ ఇన్నింగ్స్‌లతో స్పెషల్ షోస్ వేయాలని నిర్ణయం తీసుకోవడం మాత్రం మాహీ ఫ్యాన్స్‌కే చెల్లింది..

కెప్టెన్‌గా 2007 టీ20 వరల్డ్ కప్‌తో పాటు 2011 వన్డే వరల్డ్ కప్, 2013 ఛాంపియన్స్ ట్రోఫీ గెలిచిన మహేంద్ర సింగ్ ధోనీ, 2020 ఆగస్టు 15న అంతర్జాతీయ క్రికెట్ నుంచి తప్పుకున్నాడు. 2024 ఐపీఎల్‌లో ధోనీ ఆడతాడా? లేదా? అనేది ఇంకా తెలియరాలేదు..