విరాట్ కోహ్లీకి బిగ్ షాక్.. మ్యాచ్ ఫీజులో 20 శాతం కోత‌, ఒక డీమెరిట్ పాయింట్

AUS vs IND - Virat Kohli: భార‌త్-ఆస్ట్రేలియా మ‌ధ్య జ‌రుగుతున్న బాక్సింగ్ డే టెస్టులో  నాటకీయ పరిణామాలు చోటుచేసుకున్నాయి. అలాగే, టీమిండియా స్టార్ ప్లేయ‌ర్ విరాట్ కోహ్లీకి బిగ్ షాక్ త‌గిలింది. కింగ్ కోహ్లీకి మ్యాచ్ ఫీజులో 20 శాతం కోత విధించ‌డంతో పాటు ఒక డీమెరిట్ పాయింట్ కూడా ఇచ్చారు.

మెల్‌బోర్న్ క్రికెట్ గ్రౌండ్ (MCG)లో బాక్సింగ్ డే టెస్ట్ ప్రారంభ రోజు భారత స్టార్ బ్యాటర్, విరాట్ కోహ్లీకి అతని మ్యాచ్ ఫీజులో 20% జరిమానా విధించారు. ఆస్ట్రేలియా అరంగేట్రం ప్లేయ‌ర్ సామ్ కొన్‌స్టాస్‌, విరాట్ కోహ్లీ మ‌ధ్య జ‌రిగిన సంఘ‌ట‌న కార‌ణంగా ఇది జ‌రిగింది. మ్యాచ్ ఫీజులో కోత‌తో పాటు ఒక డీమెరిట్ పాయింట్ కూడా విరాట్ అందుకున్నాడు.

దాదాపు 90,000 మంది MCG ప్రేక్షకుల ముందు ఈ మ్యాచ్ లో 10వ ఓవర్ ముగిసిన తర్వాత  ఆస్ట్రేలియన్ ఓపెనర్ కొన్‌స్టాస్‌ను కోహ్లీ ఢీ  కొట్టిన ఘ‌ట‌న చోటుచేసుకుంది. ఇది ఇద్దరు ఆటగాళ్ల మధ్య కొద్దిసేపు మాటల యుద్ధానికి దారి తీసింది. ఉస్మాన్ ఖవాజా అడుగు పెట్టిన త‌ర్వాత కూడా ఇది త‌గ్గ‌లేదు. అంపైర్లు జోక్యం చేసుకున్నారు.

ఐసీసీ క్రికెట్ నిబంధ‌న‌ల ప్రకారం.. విరాట్ కోహ్లీకి మ్యాచ్ ఫీజులో కోత విధిస్తూ ఒక డీమెరిట్ పాయింట్ ఇచ్చారు. క్రికెట్ నాన్-కాంటాక్ట్ స్పోర్ట్ కావడంతో ఆటగాళ్ల మధ్య ఫిజికల్ కాంటక్ట్ కు సంబంధించి కఠినమైన నిబంధనలు ఉన్నాయి. ICC ప్రవర్తనా నియమావళి (CoC), ఆర్టికల్ 2.12 ప్రకారం ఉద్దేశపూర్వకంగా, నిర్లక్ష్యంగా లేదా కావాల‌నే ఉద్దేశాలు క‌నిపించేలా ప్ర‌త్య‌ర్థి ప్లేయ‌ర్ల‌ను తాకితే ఉల్లంఘ‌న‌గా ప‌రిగ‌ణిస్తారు.

ఆన్‌ఫీల్డ్ అంపైర్లు జోయెల్ విల్సన్, మైఖేల్ గోఫ్, థర్డ్ అంపైర్ షర్ఫుద్దౌలా ఇబ్నే షాహిద్, ఫోర్త్ అంపైర్ షాన్ క్రెయిగ్‌లు అభియోగాన్ని మోపగా, కోహ్లీ చేసిన తప్పును అంగీకరించాడనీ, మ్యాచ్ రిఫరీ ఆండీ పైక్రాఫ్ట్ ప్రతిపాదించిన అనుమతిని అంగీకరించాడు. దీంతో అధికారిక విచారణ అవసరం లేదని సమాచారం. 

ICC ప్రవర్తనా నియమావళి ప్రకారం ఒక ఆటగాడు 24 నెలల వ్యవధిలో నాలుగు లేదా అంతకంటే ఎక్కువ డీమెరిట్ పాయింట్లను అందుకుంటే అవి సస్పెన్షన్ పాయింట్లుగా మారతాయి. అంటే రెండు సస్పెన్షన్ పాయింట్లు ఒక టెస్ట్ లేదా రెండు వన్డేలు లేదా రెండు టీ20ల నుండి నిషేధానికి సమానంగా ఉంటాయి. అయితే, 24 నెలల వ్యవధిలో కోహ్లికి ఇదే తొలి డీమెరిట్ పాయింట్. 

భారత బ్యాటర్ కోహ్లీపై ఆంక్షలు విధించాలంటూ ఆసీస్ క్రికెట్ దిగ్గజం రికీ పాంటింగ్ విమర్శలు గుప్పించాడు. కోహ్లి చర్యలు పాంటింగ్ తో పాటు సీనియర్ ప్లేయర్ల నుంచి విమర్శలకు దారితీసింది. "విరాట్ ఒక పిచ్ మొత్తం తన కుడివైపునకు వెళ్లి ఆ ఘర్షణను ప్రేరేపించాడు. నా మనస్సులో ఎటువంటి సందేహం లేదు. అంపైర్లు, రిఫరీ దానిని బాగా చూస్తారనే విషయంలో నాకు ఎటువంటి సందేహం లేదు. ఆ దశలో ఫీల్డర్లు బ్యాట్స్‌మన్‌కు సమీపంలో ఉండకూడదని" పాంటింగ్ అన్నాడు. భారత మాజీ కోచ్ రవిశాస్త్రి కూడా కోహ్లీ చర్యలను తప్పుబట్టారు.