ఉస్మాన్ ఖవాజా అరుదైన రికార్డు.. ఐదు రోజులూ బ్యాటింగ్ చేసిన ఆసీస్ ఓపెనర్
Ashes 2023: ఎడ్జ్బాస్టన్ టెస్టులో ఆస్ట్రేలియా ఓపెనర్ ఉస్మాన్ ఖవాజా అరుదైన ఘనతను సొంతం చేసుకున్నాడు. ఈ టెస్టులో అతడు ప్రతీ రోజు బ్యాటింగ్ చేశాడు.
Image credit: PTI
టీ20ల యుగంలో టెస్టు మ్యాచ్ లు ఆడేవారే కరువయ్యారంటే ఒక బ్యాటర్ ఐదు రోజుల పాటు బ్యాటింగ్ చేయడం గమనార్హం. సెంచరీలు, డబుల్ సెంచరీలు కూడా మంచినీళ్లు తాగిన చందంగా బాదుతూ అవి ముగిసిన వెంటనే పెవిలియన్కు చేరుతున్న ఈ కాలంలో ఓ బ్యాటర్ ఐదు రోజులు బ్యాటింగ్ చేయడం కచ్చితంగా విశేషమే.
ఆ అరుదైన ఘనతను ఆసీస్ ఓపెనర్ ఉస్మాన్ ఖవాజా అందుకున్నాడు. యాషెస్ టెస్టు సిరీస్ లో భాగంగా ఎడ్జ్బాస్టన్ వేదికగా ముగిసిన తొలి టెస్టులో ఖవాజా ఐదు రోజులూ బ్యాటింగ్ చేశాడు. ఈ క్రమంలో అతడు అరుదైన రికార్డును సొంతం చేసుకున్నాడు.
ఎడ్జ్బాస్టన్ టెస్టులో ఇంగ్లాండ్ తొలి రోజు 78 ఓవర్లు ఆడి ఫస్ట్ ఇన్నింగ్స్ ను డిక్లేర్ చేసింది. దీంతో ఆస్ట్రేలియా నాలుగు ఓవర్లు బ్యాటింగ్ చేయాల్సి వచ్చింది. తొలి రోజు ఖవాజా మొదటి ఇన్నింగ్స్లో నాలుగు పరుగులు సాధించాడు. రెండో రోజు.. రోజంతా బ్యాటింగ్ చేసి 126 పరుగులు చేసి నాటౌట్ గా నిలిచాడు.
మూడో రోజు అదే ఆటను కొనసాగిస్తూ తొలి సెషన్ లో ఓవర్ నైట్ స్కోరు (126)కు మరో 15 పరుగులు (141) జోడించి ఔటయ్యాడు. ఈ రోజు వర్షం కారణంగా మ్యాచ్ రెండో సెషన్ నుంచే రద్దు అయింది. నాలుగో రోజు ఇంగ్లాండ్ రెండో ఇన్నింగ్స్ లో 273 పరుగులకు ఆలౌట్ అయింది. దీంతో చివరి సెషన్ లో ఆసీస్ మళ్లీ బ్యాటింగ్ కు రావాల్సి వచ్చింది.
నాలుగో రోజు చివరి సెషన్ లో ఖవాజా.. 34 పరుగులు చేశాడు. ఐదో రోజు కూడా దానికి కొనసాగింపుగా బ్యాటింగ్ చేసి మరో 31 పరుగులు జోడించి ఔట్ అయ్యాడు. మొత్తంగా తొలి ఇన్నింగ్స్ లో 141, రెండో ఇన్నింగ్స్ లో 65 పరుగులు చేశాడు ఖవాజా..
ఇలా టెస్టు క్రికెట్ లో ఐదు రోజులూ బ్యాటింగ్ చేసిన వారిజాబితాలో ఖవాజా 13వవాడు. భారత్ కు చెందిన ఎం. జయసింహా, జెఫ్రీ బాయ్కాట్ (ఇంగ్లాండ్), కిమ్ హ్యూగ్స్ (ఆసీస్) , అలియన్ లంబ్ (ఇంగ్లాండ్), రవిశాస్త్రి (ఇండియా), ఆండ్రూ ఫ్లింటాఫ్ (ఇంగ్లాండ్), పీటర్సన్ (సౌతాఫ్రికా) పుజారా (ఇండియా), బ్రాత్వైట్ (న్యూజిలాండ్) లు ఇంతకుముందు ఈ జాబితాలో ఉన్నారు.
అయితే వీరిలో మ్యాచ్ గెలిచిన ఆటగాళ్లలో మాత్రం ఇద్దరే ఉండటం గమనార్హం. జెఫ్రీ బాయ్కాట్.. 1977 యాషెస్ సిరీస్ లో ట్రెంట్ బ్రిడ్జ్ వేదికగా ఆస్ట్రేలియాతో జరిగిన మూడో టెస్టులో ఐదు రోజులూ బ్యాటింగ్ చేశాడు. తొలి ఇన్నింగ్స్ లో 107 పరుగులు చేసిన బాయ్కాట్.. రెండో ఇన్నింగ్స్లో 80 పరుగులు చేసి నాటౌట్ గా నిలిచాడు. ఈ మ్యాచ్ లో ఇంగ్లాండ్ విజయం సాధించింది. తాజాగా ఎడ్జ్బాస్టన్ టెస్టులో కూడా ఆసీస్.. ఇంగ్లాండ్ ను ఓడించింది. ఈ మ్యాచ్ లో ఖవాజాకే ప్లేయర్ ఆఫ్ ది మ్యాచ్ అవార్డుదక్కింది.