యాషెస్‌కు ముందు ఇంగ్లాండ్‌కు భారీ షాక్..! అండర్సన్‌కు గాయం.. స్టార్ పేసర్లందరిదీ అదే పరిస్థితి

Ashes 2023: గతేడాది ఆస్ట్రేలియా వేదికగా  ముగిసిన యాషెస్ సిరీస్ లో దారుణంగా ఓడిన ఇంగ్లాండ్ ఈ ఏడాది స్వదేశంలో బదులు తీర్చుకునేందుకు సిద్ధమవుతుండగా ఆ జట్టుకు ఊహించని షాకులు తాకుతున్నాయి. 

ఈ ఏడాది  జూన్ 16 నుంచి  ఆస్ట్రేలియాతో  స్వదేశంలో  జరుగబోయే యాషెస్ సిరీస్‌కు ముందు  ఇంగ్లాండ్‌కు  వరుస షాకులు తప్పడం లేదు. ఆ  జట్టు స్టార్ పేసర్లు గాయాల పాలవుతున్నారు.  ఇంగ్లాండ్ వెటరన్ పేసర్ జేమ్స్ అండర్సన్  గాయపడటం ఇంగ్లాండ్ ను ఆందోళనకు గురి చేస్తున్నది. 

ఇంగ్లాండ్ లో కౌంటీ ఛాంపియన్‌షిప్ ఆడుతున్న అండర్సన్..  లంకాషైర్ వర్సెస్ సోమర్‌సెట్ మ్యాచ్ లో గాయపడ్డాడు.  మాంచెస్టర్ ఎమిరేట్స్ ఓల్డ్ ట్రాఫర్డ్ వేదికగా   సోమర్‌సెట్ తో జరిగిన మ్యాచ్ లో  ఆండర్సన్..  14 ఓవర్లు వేసి  16 పరుగులే ఇచ్చి 2 వికెట్లు తీశాడు.   

మొదటి రోజు    14 ఓవర్లు బౌలింగ్ చేసిన తర్వాత  అండర్సన్ మళ్లీ  ఫీల్డ్ లోకి రాలేదు.  కుడి కాలికి గజ్జల్లో గాయం కారణంగా  అతడు  మళ్లీ బౌలింగ్ కు రాలేదు.  కాగా అండర్సన్ గాయంపై ఇంగ్లాండ్ అండ్ వేల్స్ క్రికెట్ బోర్డు  (ఈసీబీ) దృష్టి సారించింది.   వచ్చే నెల  1 నుంచి  ఇంగ్లాండ్  ఐర్లాండ్ తో  టెస్టు మ్యాచ్ ఆడాల్సి ఉంది. ఈ మ్యాచ్ కు అండర్సన్ ను దూరంగా ఉంచాలని  ఈసీబీ భావిస్తున్నది. 

ఈసీబీ  వర్గాల సమాచారం మేరకు   అండర్సన్  కు గాయం   తీవ్రత బాగానే ఉందని అతడు  వచ్చే యాషెస్ లోపు కోలుకోవడం కూడా అనుమానమేనని తెలుస్తున్నది.  బర్మింగ్‌‌హామ్ వేదికగా  జూన్ 16 నుంచి  జరుగబోయే  ఫస్ట్ టెస్టు వరకు  అండర్సన్ అందుబాటులోకి రాకుంటే ఇంగ్లాండ్ కు  తిప్పలు తప్పవు. 

ఇదివరకే ఇంగ్లాండ్ స్టార్ పేసర్ జోఫ్రా ఆర్చర్  ఫిట్నెస్ ఇష్యూస్ తో  ఐపీఎల్ నుంచి తప్పుకుని  ఈసీబీ పర్యవేక్షణలో రిహాబిటేషన్ లో ఉన్నాడు.  అతడు యాషెస్ వరకు కోలుకునేది  అనుమానమే.   

Image credit: PTI

ఆర్చర్ మాత్రమే కాదు ఇంగ్లాండ్ టెస్టు సారథి బెన్ స్టోక్స్ కూడా మోకాలి గాయం కారణంగా  ఇంకా ఫిట్నెస్ సాధించలేదు.  ఐపీఎల్ లో అతడు   రెండు మ్యాచ్ లు మాత్రమే ఆడాడు. తర్వాత గాయం కారణంగా   మళ్లీ   బరిలోకి దిగలేదు. ఆర్చర్, స్టోక్స్ తర్వాత ఒలీ స్టోన్  కూడా  కౌంటీ ఛాంపియన్‌షిప్ లో  భాగంగా  ఇటీవలే  గాయపడ్డాడు.