Googleలో జాబ్ కావాలా? గూగుల్ సీఈవో సుందర్ పిచాయ్ సూచనలు పాటిస్తే మీకు ఉద్యోగం గ్యారెంటీ

Googleలో జాబ్ సంపాదించడం మీ లక్ష్యమా? ప్రపంచ దిగ్గజ సంస్థ అయిన గూగుల్ లో చేరాలని చాలా మంది నిరుద్యోగులు కోరుకుంటారు. అయితే కంపెనీ అవసరాలు తెలుసుకోకుండా అప్లై చేసి సెలెక్ట్ కాక నిరాశ చెందుతారు. నిరుద్యోగుల కోసం ప్రస్తుత సీఈవో సుందర్ పిచాయ్ పలు సూచనలు చేశారు. గూగుల్ ఎలాంటి వ్యక్తులను ఉద్యోగులుగా కోరుకుంటుంది? అక్కడ వర్క్ ఎన్విరాన్మెంట్ ఎలా ఉంటుంది? ఎలాంటి క్వాలిఫికేషన్స్ ఉంటే గూగుల్ లో జాబ్ సంపాదించొచ్చు వంటి ఆసక్తికర విషయాలు పంచుకున్నారు. ఆ వివరాలు మీకోసం.. 

గూగుల్‌లో ఉద్యోగం సంపాదించడం మిలియన్ల మందికి కల. కానీ టెక్ దిగ్గజ కంపెనీ అయిన గూగుల్ లో స్థానం సంపాదించడం అంత సులభం కాదు. ఈ క్రమంలో గూగుల్ లో ఉద్యోగం కోసం ప్రయత్నం చేసే అభ్యర్థులకు సహాయం చేయడానికి Google CEO సుందర్ పిచాయ్ పలు సూచనలు చేశారు. ముఖ్యంగా ఇంజనీరింగ్‌ విద్యార్థులు ఎలాంటి నైపుణ్యాలను నేర్చుకోవాలి? ఎలాంటి టెక్నాలజీస్ నేర్చుకుంటే గూగుల్ తీసుకుంటుంది.. ఇలాంటి వివరాలు తెలియజేశారు. 

అమెరికన్ కంప్యూటర్ శాస్త్రవేత్తలు లారీ పేజ్, సెర్గీ బ్రిన్ Google సంస్థను స్థాపించారు. కాలిఫోర్నియాలోని స్టాన్‌ఫోర్డ్ యూనివర్శిటీలో పీహెచ్‌డీ విద్యార్థులుగా ఉన్నప్పుడు గూగుల్‌ను సెప్టెంబర్ 4, 1998 న ప్రారంభించారు. 2015లో ఆల్ఫాబెట్ ఇంక్ అనుబంధ సంస్థగా Google మార్పు చెందింది. ఆల్ఫాబెట్ CEO అయిన లారీ పేజ్ స్థానంలో సుందర్ పిచాయ్ అక్టోబర్ 24, 2015న Google CEOగా నియమితులయ్యారు. డిసెంబర్ 3, 2019న పిచాయ్ ఆల్ఫాబెట్ సీఈఓ కూడా అయ్యారు.

Google ప్రపంచంలోని అతిపెద్ద సెర్చ్ ఇంజిన్. ఇది మ్యాపింగ్, నావిగేషన్ అప్లికేషన్ లో టాప్ సర్వీసులను అందిస్తోంది. ఇమెయిల్ ప్రొవైడర్, ఆఫీస్ సూట్, ఆన్‌లైన్ వీడియో ప్లాట్‌ఫారమ్, ఫోటో, క్లౌడ్ స్టోరేజ్ ప్రొవైడర్, మొబైల్ ఆపరేటింగ్ సిస్టమ్, వెబ్ బ్రౌజర్, AI వర్చువల్ అసిస్టెంట్ ప్రొవైడర్ ఇలా వినియోగదారులకు అవసరమైన అనేక సర్వీసులను అందిస్తోంది. ఫోర్బ్స్ ఇచ్చిన నివేదిక, మార్కెట్ లెక్కల ప్రకారం అత్యంత విలువైన బ్రాండ్‌ల జాబితాలో Google రెండవ స్థానంలో ఉంది. 

ఇలా ప్రపంచ వ్యాప్తంగా సేవలందిస్తున్న గూగుల్ సంస్థలో చేరాలని ప్రతి ఒక్కరూ కోరుకుంటారు. ఎందుకంటే గ్రోత్ కు ఎక్కువ అవకాశం ఉంటుందని భావిస్తారు. జీతాలు కూడా ఎక్కువగా ఉండటం, హైక్స్ తీసుకోవడానికి ఛాన్స్ ఉండటం, ప్రపంచ వ్యాప్తంగా ఏ దేశంలోనైనా పనిచేయడానికి అవకాశం ఉండటం నిరుద్యోగులను ఆకర్షించే విషయం. అయితే గూగుల్ రిక్వైర్ మెంట్స్ తెలుసుకోకుండా రెజ్యుమ్మ్ ఫార్వర్డ్ చేసేస్తారు. దీని వల్ల వారు మొదటి దశలోనే వెనక్కు వెళ్లిపోవాల్సి వస్తోంది. 

ప్రస్తుతం Googleలో సుమారు 179,000 మంది ఉద్యోగులు పనిచేస్తున్నారు. Google నుండి జాబ్ ఆఫర్‌లను పొందిన దాదాపు 90% అభ్యర్థులు వాటిని అంగీకరిస్తారు. జాబ్ మార్కెట్‌లో కూడా కంపెనీ బలమైన సంస్థగా ఉండటం మరో గొప్ప విషయం. ముఖ్యంగా టెక్ సెక్టార్‌లో లేఆఫ్ లు, పింక్ స్లిప్ పరిస్థితులు పెరుగుతుండటం వల్ల మార్కెట్ లో స్థిరమైన కంపెనీగా పేరుపొందిన గూగుల్ నిరుద్యోగులకు బెస్ట్ ఆప్షన్ గా నిలుస్తోంది. 

గూగుల్ లో చేరాలని తపన పడే నిరుద్యోగులకు ఉపయోగపడే పలు విషయాలను సీఈవో సుందర్ పిచాయ్ ఓ ఇంటర్వ్యూలో వెల్లడించారు. డేవిడ్ రూబెన్‌స్టెయిన్ షోలో పీర్ టు పీర్ సంభాషణల సందర్భంగా మాట్లాడారు. గూగుల్ లో ఉద్యోగం కోసం ప్రయత్నించే అభ్యర్థులు సాంకేతికంగా అత్యుత్తమంగా ఉండాలని సుందర్ పిచాయ్ సూచించారు. ఏ విషయాన్నైనా నేర్చుకోవడానికి ఆసక్తిగా ఉండాలని అన్నారు. డైనమిక్ వాతావరణంలో అభివృద్ధి చెందగల సూపర్ స్టార్ సాఫ్ట్‌వేర్ ఇంజనీర్‌లను Google కోరుకుంటోందని తెలిపారు.

Google సృజనాత్మకతను, వర్క్‌ప్లేస్ సంస్కృతిని, నూతన ఆవిష్కరణలను ఎలా పెంపొందిస్తుందో పిచాయ్ పంచుకున్నారు. కమ్యూనిటీ భావనను పెంపొందించడంలో, కొత్త ఆలోచనలకు ప్రోత్సాహం ఇవ్వడంలో గూగుల్ ఎప్పుడూ ముందుంటుందని వివరించారు. గూగుల్ లో ప్రతిభకే ఎక్కువ ప్రాధాన్యం ఇస్తారని తెలిపారు. ముఖ్యంగా వినూత్నంగా ఆలోచించే వారికి ఎక్కువ ప్రిఫరెన్స్ ఇస్తారన్నారు. 

గూగుల్‌లో తాను చేరిన తొలి రోజులను గుర్తు చేసుకుంటూ పిచాయ్ ఇలా అన్నారు. తోటి ఎంప్లాయిస్ తో కలిసి కంపెనీ కేఫ్‌లలో తరచుగా కూర్చొని వినూత్న ఆలోచనలను రేకెత్తించే ఆకస్మిక సంభాషణలను చేసుకొనేవారిమని గుర్తు చేసుకున్నారు. కొత్త ఆలోచనలకు గూగుల్ సంస్థ కూడా సహకారం అదే విధంగా ఇచ్చేదని తెలిపారు. ఇప్పటికీ ఈ సంస్కృతి కొనసాగుతోందని, అందుకే తాను గూగుల్ కి సీఈవో అవ్వగలిగానని పేర్కొన్నారు.