అయ్యప్ప భక్తులకు గుడ్ న్యూస్.. స్వామి రూపంతో బంగారు లాకెట్లు.. ఆన్‌లైన్‌లో ఇలాా బుక్ చేసుకోండి

అయ్యప్ప భక్తులకు శబరిమల తిరువితాంకూర్ దేవస్థానం శుభవార్త చెప్పింది. శబరిమల ఆలయం అయ్యప్ప రూపంలో బంగారు నాణేలను పంపిణీ చేయడం ప్రారంభించింది. గర్భగుడిలో పూజించే బంగారు పతకాల పంపిణీ కార్యక్రమాన్ని ఇటీవల కేరళ దేవాదాయ శాఖ మంత్రి వి.ఎన్.వాసవన్ ప్రారంభించారు. 

ఆంధ్రప్రదేశ్ కు చెందిన వ్యక్తికే మొదటి లాకెట్

ఆంధ్రప్రదేశ్‌కు చెందిన ఒక వ్యక్తి బంగారు లాకెట్‌ను ఆన్‌లైన్‌లో మొదట బుక్ చేసుకున్నారు. ఈ బంగారు లాకెట్‌ను ఆయనకు మొదట బహుమతిగా మంత్రి వాసవన్ ప్రకటించి కొరియర్ చేయించారు. ఆ తర్వాత శబరిమల తంత్రి కండరారు రాజీవరరు, టీడీకే అధ్యక్షుడు పి.ఎస్.ప్రశాంత్, పాలకమండలి సభ్యుడు ఎ.అజికుమార్ మిగిలిన భక్తులకు లాకెట్లను అందజేశారు.

లాకెట్ల ధరలు

ఈ లాకెట్లు 2 గ్రాములు, 4 గ్రాములు, 8 గ్రాముల బరువుతో తయారు చేశారు. 2 గ్రాముల బంగారు లాకెట్ ధర రూ.19,300. 4 గ్రాముల లాకెట్ ధర రూ.38,600, 8 గ్రాముల బంగారు లాకెట్ ధర రూ.77,200 గా శబరిమల ఆలయం నిర్ణయించింది. రెండు రోజుల క్రితం బుకింగ్‌లు ప్రారంభమయ్యాయి. మొత్తం 100 మంది భక్తులు లాకెట్లను బుక్ చేసుకున్నారు.

అయ్యప్ప బంగారు లాకెట్లు ఎలా పొందాలి

భక్తులు ఈ బంగారు లాకెట్లను ఆన్‌లైన్‌లో లేదా ఆఫ్‌లైన్‌లో కొనుగోలు చేయవచ్చు. ఈ బంగారు లాకెట్లను తయారు చేసి సరఫరా చేసేందుకు తమిళనాడుకు చెందిన జీఆర్‌డీ జువెల్లర్స్, కేరళకు చెందిన కళ్యాణ్ జువెల్లర్స్ టెండర్లను గెలుచుకున్నాయి.

మలయాళ క్యాలెండర్ సమాచారం ప్రకారం సంవత్సరంలో మొదటి రోజైన విషు సందర్భంగా బంగారు లాకెట్లను పంపిణీ చేశారు. ఈ లాకెట్లను ఆన్‌లైన్‌లో www.sabarimalaonline.org ద్వారా బుక్ చేసుకోవచ్చు.  లేదా ఆలయంలోని కార్యనిర్వహణాధికారి ద్వారా బుక్ చేసుకోవచ్చు.