మగాళ్లపై మరింత భారం మోపనున్న మోదీ సర్కార్ ... వీటి ధరలు పెరగనున్నాయ్

GST Hike : ఇప్పటికే ప్రతి వస్తువు ధర ఆకాశాన్ని అంటుతోంది. నిత్యావసరాల నుండి లగ్జరీ వస్తువుల వరకు ప్రతి ఒక్కటీ రోజురోజుకు మరింత ప్రియం అవుతున్నాయి. పెరుగుతున్న ధరలు పేద,మద్య తరగతి ప్రజల నడ్డి విరుస్తున్నాయి... ఏది కొందామన్నా జేబుకు చిల్లు తప్పడం లేదు. ఇలా ఇప్పుడున్న ధరలతోనే సతమతం అవుతున్న సామాన్యులపై మరోసారి ధరల భారం పడనుంది. మరీముఖ్యంగా పురుషులు ఎక్కువగా ఉపయోగించే వస్తువులపై జిఎస్టి (వస్తు సేవల పన్ను) పెంచే ఆలోచనలో కేంద్ర ప్రభుత్వం వుంది. 

ధరలు పెరిగే వస్తువులివే :  

కొన్ని వస్తువులపై ధరల పెంపుకు జిఎస్టి ప్యానల్ రికమెండ్ చేస్తోంది. కొన్ని రకాల శీతల పానియాలతో పాటు సిగరెట్లు, పొగాకు ఉత్పత్తులపై జిఎస్టి పెంచే అవకాశాలు కనిపిస్తున్నాయి. ప్రస్తుతం వీటిపై 28 శాతంగా వున్న జిఎస్టిని 35 శాతానికి పెంచాలని జిఎస్టి ప్యానల్ రికమెండ్ చేస్తోంది. ఈ మేరకు బిహార్ డిప్యూటీ సీఎం సామ్రాట్ చౌదరి అధ్యక్షతన సమావేశమైన జివోఎం నిర్ణయం తీసుకుంది. 

వీటితోపాటు రెడిమేడ్ గార్మెంట్స్, సైకిళ్లు, రిస్ట్ వాచెస్ పై కూడా ట్యాక్స్ రివిజన్ చేయాలని సూచించారు. అంటే రూ.1,500 లోపు గార్మెంట్స్ పై 5 శాతం, ఆపై విలువగల రెడీమేడ్ గార్మెంట్స్ పై 18 నుండి 28 శాతం జిఎస్టి  పెంచాలని రికమండ్ చేసారు.ఇలా కొత్తగా 148 ఉత్పత్తులపై పన్ను పెంచాలని జివోఎం సూచించింది. 
 

జిఎస్టి కౌన్సిల్ ఏం చేస్తుందో... 

జఎస్టి ప్యానల్ రికమండేషన్స్ పై ఈ నెల అంటే డిసెంబర్ 21 జరగనున్న జిఎస్టి కౌన్సిల్ సమావేశంలో నిర్ణయం తీసుకోనున్నారు. కేంద్ర ఆర్థిక మంత్రి నిర్మలా సీతారామన్ అధ్యక్షతన జిఎస్టి కౌన్సిల్ సమావేశం కానుంది. ఇందులో రాష్ట్రాల ఆర్థిక మంత్రులు కూడా పాల్గొంటారు. 

మంత్రుల బృందం జిఎస్టి పెంపు రికమండేషన్స్ పై ఈ కౌన్సిల్ మీటింగ్ లో నిర్ణయం తీసుకోనున్నారు. ఈ క్రమంలో ఏ వస్తువులపై జిఎస్టి పెంపుకు ఆమోదం తెలుపుతారో వాటి ధరలు పెరుగుతాయి. దీంతో జిఎస్టి కౌన్సిల సమావేశంలో తీసుకునే నిర్ణయాలు ప్రజల జీవితాలపై ప్రభావం చూపనున్నాయి.