FASTag: 10 సెకండ్లు ఆలస్యమైనా రూపాయి చెల్చించాల్సిన పనిలేదు.. ఫాస్టాగ్‌ గురించి మీకు ఈ విషయాలు తెలుసా?

కారులో ప్రయాణించే ప్రతీ ఒక్కరికీ ఫాస్టాగ్‌ గురించి ప్రత్యేకంగా పరిచయం చేయాల్సిన పనిలేదు. టోల్‌గేట్స్‌ వద్ద ఎక్కువ సమయం వేచి ఉండాల్సిన అవసరం లేకుండా త్వరగా టోల్‌ చెల్లించే విధానమే ఈ ఫాస్టాగ్‌. ఇదొక ఎలక్ట్రానిక్ టోల్ క‌లెక్ష‌న్‌ సిస్టమ్, ఇది నేషనల్ హైవే అథారిటీ ఆఫ్ ఇండియా (NHAI) ఆధ్వర్యంలో అమలవుతోంది. అయితే ఈ ఫాస్టాగ్‌కి సంబంధించి కొన్ని విషయాలు చాలా మందికి తెలియవు. అలాంటివి కొన్ని ఇప్పుడు తెలుసుకుందాం..  

ఫాస్టాగ్ ముఖ్య ఉద్దేశం ఏంటి.? 

రహదారులపై టోల్‌ చెల్లించే సమయంలో వాహనాలు ఎక్కువసేపు వేచి ఉండకూడదనే ఉద్దేశంతో ఈ ఫాస్టాగ్‌ విధానాన్ని తీసుకొచ్చారు. ఇందుకోసం వాహనాల అద్దాలపై ఫాస్టాగ్‌ కార్డును అతికిస్తారు. దీంతో టోల్‌గేట్‌ ముందు నుంచి వెళ్లగానే టోల్‌ దానంతటదే అకౌంట్‌లో నుంచి డబ్బులు కట్‌ అవుతాయి. కాంటాక్ట్‌లెస్‌ చెల్లింపులు దీంతో వీలవుతాయి. ట్యాగ్ స్కాన్‌ అయినవెంటనే అకౌంట్‌ నుంచి అమౌంట్‌ కట్‌ అవుతుంది. సమయంతో పాటు ఇంధనం కూడా ఆదా అవుతుంది. ఫాస్టాగ్‌ను మొబైల్ వాలెట్‌లు, నెట్ బ్యాంకింగ్, యూపీఐ, క్రెడిట్/డెబిట్ కార్డ్‌ల ద్వారా రీఛార్జ్ చేసుకోవచ్చు. 

ఫాస్టాగ్‌ తప్పనిసరి: 

భారతదేశంలోని అన్ని టోల్‌ ప్లాజాలో ఫాస్టాగ్ ఉపయోగం తప్పనిసరి చేస్తూ ప్రభుత్వం నిర్ణయం తీసుకుంది. అత్యవసర పరిస్థితులు మినహాయించి అన్ని సమయాల్లో ఫాస్టాగ ఉపయోగించాల్సిందే. ఫాస్టాగ్‌ను బ్యాంకులు, నేషనల్ హైవే అథారిటీ ఆఫ్ ఇండియా (NHAI) అనుమతించిన డీలర్లు, పెట్రోల్ బంకులు, ఈ-కామర్స్ వెబ్‌సైట్లు ద్వారా ఫాస్టాగ్ కొనుగోలు చేయవచ్చు. ఫాస్టాగ్ అకౌంట్‌లో తగినంత బ్యాలెన్స్ లేకపోతే కార్డును బ్లాక్‌ చేస్తారు. 

కొన్ని నిబంధనలు: 

ఫాస్టాగ్‌ పని చేయకపోతే: ఫాస్టాగ్‌ అకౌంట్‌లో డబ్బులు ఉండి కూడా ప్రాసెస్‌ కాకపోతే రూపాయి చెల్లించాల్సిన అవసరం లేదని మీకు తెలుసా.? టోల్‌గేట్‌ నిర్వాహకుల వద్ద పేమెంట్‌కి సంబంధించి ఏమైనా సమస్య ఉంటే డబ్బులు చెల్లించాల్సిన అవసరం ఉండదని నిబంధనలు చెబుతున్నాయి. ఫాస్టాగ్‌ వ్యాలెట్‌లో డబ్బులు ఉండి టోల్‌గేట్‌ వద్ద స్కానర్‌ పనిచేయకపోతే క్యాష్‌ కూడా చెల్లించాల్సిన అవసరం ఉండదు. 

10 సెకండ్లు ఆలస్యమైనా: 

నేషనల్ హైవే అథారిటీ ఆఫ్‌ ఇండియా నిబంధనల ప్రకారం టోల్‌గేట్‌ వద్ద 10 సెకండ్ల కంటే ఎక్కువ సమయం ఎదురు చూడాల్సి వచ్చినా డబ్బులు చెల్లించాల్సిన అవసరం లేదని నిబంధనలు చెబుతున్నాయి. 

ఎల్లో లైన్‌: 

టోల్‌బూత్‌కి 100 మీటర్ల దూరంలో ఎల్లో లైన్‌ ఉంటుంది. ఆ లైన్‌ లోపల వాహనాలు ఎక్కువ సమయం వేచి ఉండాల్సిన పరిస్థితి వచ్చినా.. రూపాయి టోల్‌ చెల్లించాల్సిన అవసరం లేదని నిబంధనలు చెబుతున్నాయి. 

ఫిర్యాదు చేయొచ్చు: 

టోల్‌గేట్‌ నిర్వాహకులు ఒకవేళ పైన తెలిపిన నిబంధనలు పాటించకపోతే నేషనల్ హైవే అథారిటీ ఆఫ్ ఇండియాకి చెందిన టోల్‌ ఫ్రీ నెంబర్‌ 1033కి కాల్‌ చేసి ఫిర్యాదు చేస్తే చట్టపరమైన చర్యలు తీసుకుంటారు.