వర్షంలో కారు నడుపుతున్నారా? ఈ జాగ్రత్తలు తీసుకోకపోతే ప్రమాదమే
వర్షాకాలం వచ్చిందంటే ఎప్పుడు వర్షం పడుతుందో ఎవరూ కరెక్ట్ గా చెప్పలేరు. పది నిమిషాల్లోనే వాతావరణం మారిపోయి కుండపోత వర్షం కురుస్తుంది. మరి అలాంటి సమయంలో అర్జెంట్ గా కారు తీయాల్సి వస్తే.. అందుకే ముందుగా మీరు కారు అన్ని విధాలుగా పర్ఫెక్ట్ గా ఉందో లేదో చెక్ చేసుకోండి. ఈ టిప్స్ పాటించి వర్షం పడుతున్నప్పుడు కూడా హాయిగా, ప్రశాంతంగా మీ కారులో ప్రయాణించండి.
వైపర్ బ్లేడ్స్ మార్చండి
కారులో ప్రయాణించేటప్పుడు ముందు అద్దం కాస్త బూదరగా ఉంటే వెంటనే వైపర్ వేసి క్లీన్ చేసేస్తాం. అయితే డస్ట్ పార్టికల్స్ అద్దంపై ఉండటంతో వాటిని క్లీన్ చేసే క్రమంలో వైపర్ బ్లేడ్లు దెబ్బతినే అవకాశాలుంటాయి. అలా దెబ్బతిన్న వాటితోనే వర్షం పడినప్పుడు కూడా క్లీన్ చేస్తే సరిగా క్లీన్ అవవు. పాతవైన వైపర్ బ్లేడ్స్ సరిగ్గా పని చేయకపోవడం వల్ల వర్షపు నీరు క్లియర్ కాకపోవచ్చు. వర్షాకాలం ప్రారంభంలోనే కొత్తవి వేసుకోవడం మంచిది.
రబ్బరు మ్యాట్లను ఉపయోగించండి
సాధారణంగా కారు అడుగు భాగంలో కనిపించని చిన్న చిన్న రంధ్రాలు ఉంటాయి. మామూలు రోజుల్లో వాటి వల్ల ఎటువంటి ప్రాబ్రమ్ ఉండదు. అయితే వర్షాకాలంలో కారు నీటిలోంచి వెళ్లేటప్పుడు అలాంటి హోల్స్ నుంచి వర్షపు నీరు లోపలికి వచ్చే ప్రమాదం ఉంటుంది. కార్ లోపల నీరు చేరకుండా రబ్బరు మ్యాట్లు వేసుకోవడం ఉత్తమం.
విండో సీల్స్ చెక్ చేయండి
మనం తరచూ కారు విండోలు తీసి వేస్తుంటాం. ఈ క్రమంలో అవి లూజ్ అయిపోతుంటాయి. అందువల్ల విండోలకు చుట్టూ ఉన్న సీల్స్ సరిగా పనిచేయవు. సాధారణ రోజుల్లో ఏమీ కాదు కాని.. వర్షాకాలంలో విండో సీల్స్ బాగా పని చేస్తున్నాయో లేదో చెక్ చేసుకోవాలి. అవి సరిగ్గా ఉంటేనే వర్షపు నీరు లోపలికి రాకుండా నిరోధించవచ్చు.
బ్రేక్ సిస్టమ్ సరిచూసుకోండి
ఏ కాలంలోనైనా బ్రేకులు సరిగా పడుతున్నాయో లేదో చెక్ చేసుకోవడం చాలా ముఖ్యం. ముఖ్యంగా వర్షాకాలంలో అవి సరిగా పడుతున్నాయో లేదో తరచూ చెక్ చేసుకోవాలి. ఎందుకంటే వర్షంలో బ్రేకులు సున్నితంగా పని చేయాలి. బ్రేక్ ఫ్లూయిడ్ స్థాయిని, బ్రేక్ ప్యాడ్స్ను రెగ్యులర్గా చెక్ చేయడం ముఖ్యం. లేకపోతే బ్రేక్ సడన్ గా పడి ప్రమాదాలు జరిగే అవకాశం ఉంటుంది.
బ్యాటరీ ఎలా పనిచేస్తోందో చూసుకోండి
కారుకు ఇంజన్ ఎంత ముఖ్యమో, బ్యాటరీ సిస్టమ్ కూడా అంతే ముఖ్యం. బ్యాటరీ పనిచేయకపోతే కారు స్టార్ట్ కూడా కాదు. ప్రతి బ్యాటరీకి ఎక్స్పైరీ డేట్ ఉంటుంది. దాన్ని గుర్తు పెట్టుకుని వర్షాకాలం సమయంలో బ్యాటరీ మార్చాల్సి వస్తే ముందే మార్చుకోవడం మంచిది.
కార్ కవర్ ఉపయోగించండి
కారు బయట పార్క్ చేసినప్పుడు దుమ్ము, ధూళి పడి డర్టీగా తయారవుతుంది కదా. నీడగా ఉంటుంది కదా అని మీరు ఏ చెట్టు కిందో పార్క్ చేస్తే మరింత అధ్వానంగా మారిపోతుంది. వర్షం కురిసినప్పుడు ఆ దుమ్మంతా కారు బానెట్, అడుగు భాగంలోకి వెళ్లే అవకాశం ఉంటుంది. అందుకే కారును కప్పుతూ కవర్ వాడటం మంచిది. ఇది కేవలం ఎండ, వర్షం నుంచే కాకుండా దుమ్ము, ధూళి, చెట్ల నుంచి రాలే ఆకుల నుంచి కూడా రక్షణ కల్పిస్తుంది.
టైర్లు చెక్ చేయండి
వర్షాకాలంలో టైర్లలో గాలి సరిగా ఉందో లేదో చెక్ చేసుకోవడం చాలా అవసరం. ఎందుకంటే టైర్లలో సరైన ప్రెషర్ లేకపోతే గ్రిప్ సరిగా ఉండదు. అందువల్ల రోడ్డుపై కారు జారిపోయే ప్రమాదం ఉంటుంది. బురదలో కూడా గ్రిప్ ఉండాలంటే టైర్ల పరిస్థితిని ఎప్పటికప్పుడు చెక్ చేసుకోవడం చాలా ముఖ్యం. కారు స్లిప్పింగ్ నుంచి కాపాడేందుకు ఇది ముఖ్యమైంది.
హెడ్ లైట్స్ వెలుగుతున్నాయా?
వర్షం కురుస్తున్నప్పుడు రోడ్డే సరిగా కనిపించదు. అందుకే వైపర్ వేసుకొని వెళుతుంటాం. సాధారణంగా రాత్రి పూట రోడ్డు సరిగా కనిపించక హెడ్ లైట్స్ వేసుకుంటాం. రాత్రి పూట వర్షం కురిసే సమయంలో కారులో వెళ్లాల్సి వస్తే.. హెడ్ లైట్స్ వెలగడం చాలా అవసరం. అందుకే ముందుగా హెడ్ లైట్స్ సరిగా వెలుతున్నాయో లేదో, కాంతి సరిపోతోందా, తగ్గిందా అన్న విషయాలను ముందుగా చెక్ చేసుకోవాలి.
ఎగ్జాస్ట్ను సేఫ్ గా ఉంచండి
నీటిలో కార్ డ్రైవ్ చేయాల్సి వస్తే, ఎగ్జాస్ట్ను నీరు చేరకుండా చూసుకోవాలి. దీని వల్ల ఇంజన్ సమస్యలు రాకుండా ఉంటాయి. ఈ సూచనలను పాటించడం ద్వారా వర్షాకాలంలో మీ కార్ను సురక్షితంగా ఉంచుకోవచ్చు.