Car Tire Inflation: కారు టైర్లకు నార్మల్ గాలి మంచిదా? నైట్రోజన్ మంచిదా?

Car Tire Inflation: కారు టైర్లలో నైట్రోజన్‌ను నింపితే మంచిదని ఈ మధ్య బాగా ప్రచారం జరుగుతోంది కదా.. అందుకే చాలా పెట్రోల్ బంకుల్లో కూడా నార్మల్ గాలితో పాటు నైట్రోజన్ కూడా నింపుతున్నారు. అయితే కారు టైర్లలో సాధారణ గాలిని ఉపయోగించాలా లేదా నైట్రోజన్‌ను ఉపయోగించాలా అని చాలా మంది కన్ఫూజ్ అవుతుంటారు. ఏది మంచిదో ఇక్కడ తెలుసుకుందాం. 

మీకు తెలుసా? కారు టైర్లలో నింపే సాధారణ గాలిలో కూడా నైట్రోజన్‌ శాతం ఎక్కువగానే ఉంటుంది. సాధారణ గాలిలో 78% నైట్రోజన్, 21% ఆక్సిజన్, తక్కువ మొత్తంలో ఇతర వాయువులు ఉంటాయి. కారు టైరులో నైట్రోజన్ నింపితే అందులో దాదాపు 93% నుంచి 99% స్వచ్ఛమైన నైట్రోజన్‌ ఉంటుంది. 

కారు టైర్లలో ఏ గాలి నింపాలన్నది చాలా విషయాలపై ఆధారపడి ఉంటుంది. ముందుగా ఖర్చు. సాధారణ గాలి నింపాలంటే రూ.5, రూ.10 ఇస్తే సరిపోతుంది. అదే నైట్రోజన్ నింపాలంటే రూ.30 నుంచి రూ.50 వరకు తీసుకుంటారు. అయితే ఒక్కసారి టైర్లలో నైట్రోజన్ నింపితే ఎక్కువ కాలం ప్రెషర్ ని పట్టి ఉంచుతుంది. సాధారణ గాలి అయితే తగ్గిపోతుంది. అందుకే తరచూ గాలి కొట్టించాల్సి వస్తుంది. 

టైర్లలో సాధారణ గాలి నింపినప్పుడు అందులో ఉండే ఆక్సిజన్ అణువులు చిన్నవిగా ఉండటం వల్ల అవి టైర్ల నుండి వేగంగా బయటకు వెళ్లే అవకాశం ఉంటుంది. దీని కారణంగా తరచుగా టైర్ల ప్రెజర్ చెక్ చేస్తూ, అవసరమైతే నింపాల్సి ఉంటుంది.

కారు టైర్లలో నైట్రోజన్ నింపితే దాని పెద్ద అణువు పరిమాణం కారణంగా టైర్ లో ప్రెజర్ ఎక్కువ కాలం నిలిచి ఉంటుంది. ఇది గాలి లీకేజీని తగ్గిస్తుంది. అంతేకాకుండా ఇంధన సామర్థ్యాన్ని కాపాడటానికి సహాయపడుతుంది. టైర్ తరుగుదల కూడా సమానంగా ఉండేలా సహకరిస్తుంది. టైర్లలో నైట్రోజన్ నింపితే టైర్ల జీవితకాలం పెరుగుతుంది. నైట్రోజన్‌లో తేమ ఉండదు కాబట్టి చక్రాలలో తుప్పు పట్టదు. అందువల్ల లాంగ్ డ్రైవ్ వెళ్లే వారికి, బరువైన వాహనాలకు నైట్రోజన్ అయితే మంచిది. 

కార్ల టైర్లలో సాధారణ గాలి నింపితే తరచూ గాలి తగ్గిపోవడం జరుగుతుంది. సాధారణ గాలిలో ఉండే తేమ వల్ల కొంత కాలానికి చక్రాల అంచుల లోపల తుప్పు పడుతుంది. అయితే రోజూ ప్రయాణించే వారికి, టైర్లను క్రమం తప్పకుండా చూసుకునే వారికి, వాహనాలను శ్రద్ధగా మెయింటెయిన్ చేసేవారికి సాధారణ గాలి అయితేనే బెటర్. ఖర్చు కూడా తగ్గుతుంది. 

టైర్లలో ఏ గాలి నింపితే మంచిది? 

కారు టైర్లలో రెండూ బాగానే పనిచేస్తాయి. అయితే నైట్రోజన్‌ వల్ల కాస్త ఎక్కువ ప్రయోజనాలు ఉంటాయ. అయిన్నప్పటికీ వాహనాలను ఎప్పటికప్పుడు చెక్ చేసుకుంటూ, శ్రద్ధగా చూసుకొనే వారికి సాధారణ గాలి ఉపయోగించడం మంచిది.

నైట్రోజన్ ఎక్కువ కాలం ప్రెజర్ ని పట్టి ఉంచుతుంది. దీని వల్ల టైర్లు పెద్దగా దెబ్బతినవు.  అయితే నైట్రోజన్ గ్యాస్ నింపాల్సిన ప్రతి సారి డబ్బులు కాస్త ఎక్కువ ఖర్చు పెట్టాల్సి వస్తుంది. 

ఇది కూడా చదవండి ఒక్కసారి ఛార్జ్ చేస్తే వందల కి.మీ. దూసుకుపోయే టాప్ 5 ఎలక్ట్రిక్ కార్లు ఇవే