- Home
- Business
- Business Ideas: డే కేర్ సెంటర్.. ఇప్పుడిదే ట్రెండీ బిజినెస్. క్లిక్ అయితే లక్షల్లో ఆదాయం ఖాయం
Business Ideas: డే కేర్ సెంటర్.. ఇప్పుడిదే ట్రెండీ బిజినెస్. క్లిక్ అయితే లక్షల్లో ఆదాయం ఖాయం
Business Ideas: డే కేర్ సెంటర్, ప్లే స్కూళ్లు ఒకప్పుడు కేవలం పెద్ద పెద్ద మెట్రో నగరాల్లోనే ఉండేవి. కానీ ఇప్పుడు టైర్ 2 నగరాలకు కూడా విస్తరిస్తున్నాయి. పెరుగుతోన్న డిమాండ్కు అనుగుణంగా ఈ వ్యాపారం మొదలు పెడితే లక్షల్లో ఆదాయం పొందొచ్చు.
పెరుగుతోన్న వర్కింగ్ పేరెంట్స్
ఉద్యోగాల కోసం భార్యాభర్తలు ఇద్దరూ బయటకు వెళ్లడం ఇప్పుడు కేవలం హైదరాబాద్, బెంగళూరు, చెన్నై వంటి మెట్రో నగరాలకే పరిమితం కాదు. జిల్లా కేంద్రాలు, టైర్-2, టైర్-3 పట్టణాల్లో కూడా వర్కింగ్ పేరెంట్స్ సంఖ్య వేగంగా పెరుగుతోంది. దీంతో చిన్నారులను కొన్ని గంటలు లేదా రోజంతా సురక్షితంగా చూసుకునే ప్లేస్కూల్లు, డే కేర్ సెంటర్లకు భారీగా డిమాండ్ ఏర్పడుతోంది. ఈ అవసరాన్ని ఒక మంచి వ్యాపార అవకాశంగా మార్చుకుంటే స్థిరమైన ఆదాయాన్ని సంపాదించవచ్చు. పిల్లలంటే ఇష్టం, కొంత నిర్వహణ సామర్థ్యం ఉంటే ఈ బిజినెస్ను తక్కువ పెట్టుబడితోనే ప్రారంభించే అవకాశం ఉంది.
ప్లేస్కూల్, డే కేర్కు ఎందుకు పెరుగుతోంది డిమాండ్?
ప్రస్తుతం చాలా కుటుంబాల్లో భార్యాభర్తలు ఇద్దరూ ఉద్యోగాలు చేస్తున్నారు. ఉదయం ఇంటి నుంచి వెళ్లి సాయంత్రం వరకు ఉద్యోగాల్లో ఉండాల్సి వస్తోంది. ఈ సమయంలో చిన్న పిల్లలను చూసుకునే పెద్దలు ఇంట్లో లేకపోవడం చాలా కుటుంబాల్లో కనిపించే పరిస్థితి. అలాంటి సమయంలో పిల్లలను సురక్షితంగా ఉంచడంతో పాటు ఆటలు, పాటలు, కథలు, చిన్న చిన్న యాక్టివిటీల ద్వారా నేర్పించే ప్లేస్కూల్లు, డే కేర్ సెంటర్లను తల్లిదండ్రులు ఎక్కువగా ఎంపిక చేస్తున్నారు. ముఖ్యంగా 1.5 నుంచి 5 సంవత్సరాల పిల్లలకు ఇలాంటి సెంటర్లకు మంచి ఆదరణ ఉంది.
సొంత స్థలం ఉంటే ఇంకా తక్కువ ఖర్చుతో ప్రారంభించొచ్చు
ఈ వ్యాపారం ప్రారంభించడానికి పెద్ద భవనం తప్పనిసరి కాదు. మీకు సొంత స్థలం ఉంటే కంటైనర్ ఆధారంగా కూడా ఆకర్షణీయమైన ప్లేస్కూల్ లేదా డే కేర్ ఏర్పాటు చేయవచ్చు. ప్రస్తుతం కంటైనర్ క్లాస్రూమ్లకు కూడా మంచి ఆదరణ ఉంది. కంటైనర్కు బయట చిన్న గార్డెన్, స్లైడ్లు, సీసా, స్వింగ్లు, సాండ్ ప్లే ఏరియా వంటి ఆట వస్తువులు ఏర్పాటు చేస్తే పిల్లలు ఆసక్తిగా వస్తారు. ఒకవేళ సొంత స్థలం లేకపోతే కమర్షియల్ హాల్, డబుల్ బెడ్రూమ్ ఇల్లు లేదా విశాలమైన అపార్ట్మెంట్ను అద్దెకు తీసుకుని కూడా ప్రారంభించవచ్చు. అయితే గాలి, వెలుతురు బాగా వచ్చే ప్రదేశాన్ని ఎంచుకోవడం మంచిది.
మొదట చిన్న స్థాయిలో మొదలుపెట్టి.. తర్వాత విస్తరించండి
చాలామంది పెద్ద పెట్టుబడి పెట్టి ప్రారంభించాలని అనుకుంటారు. కానీ మొదట్లో అలా చేయాల్సిన అవసరం లేదు. ప్రారంభంలో ఒక టీచర్, ఒక ఆయాతోనే 10 నుంచి 20 మంది పిల్లలతో ప్రారంభించవచ్చు. పిల్లల సంఖ్య పెరిగే కొద్దీ మరో టీచర్, మరో ఆయాను నియమించుకోవచ్చు. పిల్లల కోసం రోజువారీ యాక్టివిటీలు, రైమ్స్, డ్రాయింగ్, స్టోరీ టైమ్, బేసిక్ లెర్నింగ్, ఆటలు వంటి కార్యక్రమాలు నిర్వహిస్తే తల్లిదండ్రుల్లో నమ్మకం పెరుగుతుంది. పిల్లల భద్రత, పరిశుభ్రత, సమయానికి ఆహారం, ప్రేమగా చూసుకోవడం వంటి అంశాలపై ప్రత్యేక శ్రద్ధ పెట్టడం చాలా ముఖ్యం. అలాగే సీసీ కెమెరాలు ఏర్పాటు చేయడం, ఫస్ట్ ఎయిడ్ కిట్ అందుబాటులో ఉంచడం, తల్లిదండ్రులతో తరచూ కమ్యూనికేషన్ కొనసాగించడం వంటి చర్యలు తీసుకుంటే మంచి పేరు వస్తుంది.
పెట్టుబడి ఎంత? నెలవారీ ఖర్చులు ఎలా ఉంటాయి?
ఈ వ్యాపారంలో ఒకసారి మాత్రమే కొన్ని ప్రధాన ఖర్చులు ఉంటాయి. క్లాస్రూమ్ను పిల్లలకు నచ్చేలా కలర్ఫుల్ థీమ్తో తయారు చేయాలి. చిన్న కుర్చీలు, టేబుళ్లు, ఆట వస్తువులు, పుస్తకాలు, మ్యాట్స్, సీసీ కెమెరాలు, సేఫ్టీ గేట్లు వంటి సామగ్రి కొనుగోలు చేయాలి. నెలవారీగా అద్దె (అద్దె భవనం అయితే), కరెంట్ బిల్లు, ఇంటర్నెట్, సిబ్బంది జీతాలు, పరిశుభ్రత ఖర్చులు, చిన్న చిన్న మెయింటెనెన్స్ ఖర్చులు ఉంటాయి. అలాగే స్థానిక అవసరాలను బట్టి నెలవారీ ఫీజులను నిర్ణయించుకోవచ్చు. ఉదయం మాత్రమే ప్లేస్కూల్, పూర్తి రోజు డే కేర్, గంటల వారీ సేవలు వంటి ప్యాకేజీలు కూడా అందించవచ్చు.
50 మంది పిల్లలు ఉంటే ఎంత ఆదాయం వస్తుంది?
ఈ వ్యాపారంలో ఆదాయం పూర్తిగా పిల్లల సంఖ్యపై ఆధారపడి ఉంటుంది. మొదట్లో తక్కువ మంది పిల్లలతో ప్రారంభమైనా, సేవ బాగుంటే మౌత్ టాక్ ద్వారా అడ్మిషన్లు పెరుగుతాయి. ఒక దశలో 50 మంది పిల్లలతో సెంటర్ నడిచే స్థాయికి చేరుకుంటే, అన్ని ఖర్చులు పోయిన తర్వాత కూడా నెలకు సుమారు రూ.70 వేల నుంచి రూ.లక్ష వరకు లాభం పొందే అవకాశం ఉంటుంది. ప్రాంతం, ఫీజు, ఖర్చులను బట్టి ఈ లాభం మరింత పెరగవచ్చు. అదనంగా సమ్మర్ క్యాంప్లు, వీకెండ్ యాక్టివిటీలు, డ్రాయింగ్ క్లాసులు, డ్యాన్స్ క్లాసులు, అబాకస్, ఫోనిక్స్ వంటి ప్రత్యేక కోర్సులు నిర్వహించడం ద్వారా అదనపు ఆదాయం కూడా పొందవచ్చు.
