Astro Tips: ఉదయం లేచిన వెంటనే వీటిని మాత్రం చూడకూడదు..!
ఉదయం లేవగానే కొన్నింటిని అస్సలు చూడకూడదని మీకు తెలుసా? కొన్నింటిని చూడటం వల్ల ఆ రోజంతా ఇబ్బంది పడాల్సి వస్తుంది.
లేవగానే ఏ పనులు చేయకూడదు?
ప్రతిరోజూ ఆనందంగా, సంతోషంగా, ఎలాంటి సమస్యలు రాకుండా ఉండాలని ప్రతి ఒక్కరూ అనుకుంటూ ఉంటారు. కానీ, రోజంతా సంతోషంగా ఉండాలంట.. మనం ఉదయం లేవగానే చేసే పనులపై ఆధారపడి ఉంటుందని మీకు తెలుసా? జోతిష్యశాస్త్రం ప్రకారం ఉదయం లేవగానే మన రోజు ఎలా ప్రారంభమౌతుందో.. అదే ఆ రోజు ని నిర్ణయిస్తుంది. అందుకే.. ప్రతిరోజూ ఉదయాన్ని చాలా పాజిటివ్ గా మొదలుపెట్టాలి అని మన పెద్దలు చెబుతూ ఉంటారు. అంటే.. ఉదయం లేవగానే మనం ఎలాంటివి చూస్తున్నాం అనేది కూడా చాలా ముఖ్యం. మన రోజంతా సంతోషం సాగాలి అంటే.. ఉదయంపూట కొన్నింటిని అస్సలు చూడకూడదట. మరి, వేటిని చూడకూడదో ఓసారి తెలుసుకుందాం...
ఉదయం లేవగానే వీటిని చూడొద్దు..
ఆగిపోయిన గడియారం
ఉదయాన్నే ఆగిపోయిన గడియారం చూడకూడదు. ఆగిపోయిన గడియారం.. జీవనప్రవాహం ఆగిపోయిందన్న సంకేతంగా పరిగణిస్తారు. అంటే.. దీనిని చూడటం వల్ల మనం పడిన కష్టానికి ఫలితం రాదు అని నమ్ముతారు. అంతేకాదు.. జీవితంలో ముందుకు సాగలేరని, చేయాలి అనుకున్న పని ఆగిపోవడం లాంటివి జరుగుతాయని భావిస్తారు. అందుకే అలాంటి గడియారం చూడకూడదు. అసలు ఇంట్లో ఉంచుకోకుండా ఉండటం మరింత ఉత్తమం.
అద్దం (ముఖం కడుక్కోకముందు)
నిద్రలేచిన వెంటనే చాలా మందికి అద్దం చూసుకునే అలవాటు ఉంటుంది. అది కూడా మంచిది కాదట. లేవగానే చక్కగా మన అర చేతిని చూసుకొని ఆ తర్వాత కొద్ది సమయానికి ముఖాన్ని నీటితో కడుక్కొని ఆ తర్వాత అద్దంలో చూసుకుంటే ఏమీ కాదు. కానీ, ముందే అద్దంలో చూసుకుంటే నెగిటివ్ ఎనర్జీ మనల్ని ఆకర్షించే అవకాశం ఎక్కువగా ఉంటుంది.
ఖాళీ పాత్రలు
వంటగదిలో ఖాళీ పాత్రలు లక్ష్మీదేవికి అసంతృప్తిని కలిగిస్తాయి.అంటే.. రాత్రి మనం తినేసిన పాత్రలను శుభ్రం చేయకుండా ఖాళీగా వంటింట్లో, సింకుల్లో ఉంచకూడదు. ఉదయం లేచిన వెంటనే కడగని పాత్రలు కనిపించడం ఆర్థికంగా నష్టాలను, ఆర్దిక నిరాశను తెస్తుంది. కాబట్టి, రాత్రి పూట పాత్రలు శుభ్రంగా కడిగి ఉంచడం మంచిది.
చీపురు , చెత్తబుట్ట..
చాలా మంది ఉదయం పక్క మీద నుంచి లేవడం చీపురు పట్టుకొని ఊడ్చేస్తూ ఉంటారు. ఇంటిని శుభ్రం చేయడం మంచిదే కానీ.. ఉదయం లేవగానే చీపురు, చెత్తబుట్ట లాంటివి చూడకుండా ఉండటమే మంచిది. వీటి వల్ల కూడా నెగిటివ్ ఎనర్జీ పెరగడం, ఇంట్లో దోషాలు తలెత్తడం లాంటివి జరిగే అవకాశం ఉంటుందట. అసలు ఉదయం లేవగానే ఇలాంటి వాటిని కనిపించకుండా పెట్టుకోవాలని పెద్దలు చెబుతూ ఉంటారు.
క్రూర జంతువుల చిత్రాలు
పులి, సింహం, నక్క వంటి క్రూర జంతువుల ఫోటోలు ఉదయాన్నే కనిపిస్తే, మన మనసులో చిరాకు, కోపం, ఉద్వేగం పెరుగుతుందని నమ్మకం. మనసుకు ప్రశాంతత కలిగించే వాటిని మాత్రమే ఉదయాన్నే చూడటం మంచిది.
పాజిటివిటీ పెరగాలంటే ఏం చేయాలి?
ఉదయం లేవగానే మనసుకు హాయి కలిగించే వాటిని చూడాలి. అంటే..కుటుంబసభ్యుల ఫోటోలు, దేవుడి విగ్రహం లేదా పచ్చని మొక్క లాంటివి చూస్తే చాలు.మంచి, మీలో పాజిటివిటీ పెంచే మాటలు మాట్లాడాలి. అదేవిధంగా ధ్యానం, యోగా, ప్రాణయామం లాంటివి చేయాలి. ఇలా చేయడం వల్ల రోజంతా ఉత్సాహంగా, ఆనందంగా సాగుతుంది.