`కేజీఎఫ్` స్టార్ యష్ తన లేటెస్ట్ మూవీతో సరికొత్త ప్రయోగం చేస్తున్నారు. ఈ మూవీ కన్నడతోపాటు ఇంగ్లీష్లో ఏక కాలంలో తెరకెక్కిస్తున్నారు. అంతేకాదు మరో సర్ ప్రైజ్ కూడా ఉంది.
`కేజీఎఫ్` చిత్రాలతో ఇండియన్ సినిమాని షేక్ చేశాడు రాకింగ్ స్టార్ యష్. కన్నడ చిత్ర పరిశ్రమని ఇండియాకు పరిచయంచేశారు. రీమేక్ చిత్రాలతోనే సర్వైవ్ అవుతుందనే ఆరోపణ నుంచి అక్కడి నుంచి అద్భుతాలు జరుగుతాయని నిరూపించారు యష్.
`కేజీఎఫ్ 2` తర్వాత బ్రేక్ తీసుకున్న ఆయన ఇప్పుడు `టాక్సిక్` చిత్రంతో ఆడియెన్స్ ముందుకు రాబోతున్నారు. ప్రస్తుతం ఇది చిత్రీకరణ దశలో ఉంది. ఇటీవల యష్ బర్త్ డే సందర్బంగా గ్లింప్ విడుదల చేయగా, ఆకట్టుకుంది.
కన్నడ, ఇంగ్లీష్ లో `టాక్సిక్`
తాజాగా ఈ మూవీకి సంబంధించిన ఇంట్రెస్టింగ్ అప్ డేట్ బయటకు వచ్చింది. `టాక్సిక్ః ఏ ఫెయిరీ టేల్ ఫర్ గ్రౌన్ అప్స్` మూవీ ఇండియన్ సినిమాలో కొత్త ఒరవడి సృష్టిస్తుంది. ఈ మూవీని కన్నడలోనే కాదు ఇంగ్లీష్లో కూడా చిత్రీకరిస్తున్నారు.
సాధారణంగా ఇప్పుడు పాన్ ఇండియా మూవీస్ ఒక భాషలో తెరకెక్కి మిగిలిన భాషల్లో డబ్ చేస్తున్నారు. కానీ ఈ మూవీని కన్నడ, ఇంగ్లీష్లో రూపొందించడం విశేషం. ఇలా కన్నడ, ఇంగ్లీష్లో ఏక కాలంలో తెరకెక్కిస్తున్న మొదటి ఇండియన్ మూవీగా ఇది రికార్డు సృష్టించింది. అలాగే ప్రపంచవ్యాప్తంగా ప్రేక్షకులను అలరించే ఈ సినిమా హిందీ, తెలుగు, తమిళం, మలయాళం వంటి భాషల్లో డబ్బింగ్ చేయనున్నారు.
అంతర్జాతీయ స్థాయిలో `టాక్సిక్`
"రాకింగ్ స్టార్" యష్ నటిస్తున్న ఈ చిత్రాన్ని, గీతూ మోహందాస్ దర్శకత్వం వహిస్తున్నారు. ఈ సినిమాను కన్నడలో భారతీయ ప్రేక్షకులకు, ఇంగ్లీష్లో ప్రపంచవ్యాప్తంగా అందరికీ కనెక్ట్ అయ్యెలా రూపొందిస్తున్నారు.
ఈ సందర్భంగా డైరెక్టర్ గీతూ మోహందాస్ మాట్లాడుతూ, `టాక్సిక్` కోసం మేము ఒక అంతర్జాతీయ స్థాయి కథను సృష్టించాలనుకున్నాం. ఇది భారతదేశంతో పాటు ప్రపంచవ్యాప్తంగా కూడా ప్రేక్షకులను ఆకట్టుకునేలా ఉండాలి. అందుకే కన్నడ, ఇంగ్లీష్ రెండింటిలోనూ చిత్రీకరించాం. ఈ సినిమా భాషలు, సాంస్కృతిక భేదాలను దాటి అందరి హృదయాలను తాకేలా ఉంటుంది` అని తెలిపారు.
హాలీవుడ్ స్టయిల్ యాక్షన్ సీన్లు
యష్ తన 'మాంస్టర్ మైండ్ క్రియేషన్స్' సంస్థ ద్వారా ఈ చిత్రాన్ని నిర్మిస్తున్నారు. అలాగే, వెంకట్ నారాయణ ‘KVN ప్రొడక్షన్స్’ సహనిర్మాత. యష్, గీతూ మోహందాస్ కలసి దీన్ని ఓ మహత్తరమైన సినిమాగా మలచాలని లక్ష్యంగా పెట్టుకున్నారు.
ఈ చిత్రంలో హాలీవుడ్ స్థాయిలో యాక్షన్ సన్నివేశాలను రూపొందించేందుకు ‘జాన్ విక్’, ‘ఫాస్ట్ అండ్ ఫ్యూరియస్’ సినిమాల్లో పని చేసిన యాక్షన్ కొరియోగ్రాఫర్ జెజె పెర్రీని తీసుకున్నారు. అలాగే, విజువల్ ఎఫెక్ట్స్ కోసం ‘డ్యూన్: పార్ట్ 2’ సినిమాకు బీఏఎఫ్టీఏ అవార్డు గెలుచుకున్న DNEG స్టూడియో పని చేస్తోంది.
యష్ పుట్టినరోజు సందర్భంగా విడుదల చేసిన 'బర్త్డే పీక్' టీజర్, సినిమా గ్రాండియర్ ని ప్రజెంట్ చేస్తోంది. నిర్మాత వెంకట్ నారాయణ మాట్లాడుతూ, "టాక్సిక్’ విషయంలో మా లక్ష్యం చాలా స్పష్టంగా ఉంది.
భారతదేశం మాత్రమే కాకుండా ప్రపంచవ్యాప్తంగా ఆకట్టుకునే చిత్రంగా రూపొందిస్తున్నాం. 'టాక్సిక్' తప్పకుండా ప్రేక్షకులను ఆశ్చర్యపరుస్తుంది, అలాగే భారతీయ సినిమాను ప్రపంచ స్థాయికి తీసుకెళ్తుంది` అని అన్నారు.
