చిత్రం : పిశాచి 2 దర్శకత్వం : దేవా రాజ్ కుమార్ నిర్మాత : సాయి వెంకట్ సంగీతం : సతీష్ ఆర్యన్ నటీనటులు : రూప్ శెట్టి, రమ్య ఏసియానెట్ రేటింగ్- 2/5

కథ :

సిటీలోని ఓ ప్రముఖ టీవీ ఛానెల్ లో పనిచేసే నైన సిటీకి కొద్ది దూరంలో ఉన్న రామా పురం అనే ఊరి అడవిలో మనుషులు వరుసగా చనిపోతుండడాన్ని గమనించి అసలక్కడ ఏముందో తెలుసుకుందామని తన స్నేహితులతో కలిసి డాక్యుమెంటరీని తీయడానికి బయలుదేరుతుంది.అలా రామా పురం అడవిలోని డేంజర్ జోన్ కు వెళ్లిన నైన, ఆమె ఎనిమిది మంది స్నేహితులు తెలుసుకున్న సంగతులేమిటి ? వారక్కడ ఎలాంటి ఆపదలో పడ్డారు ? చివరికి వారిలో ఎంతమంది మిగిలారు ? ఆ మిగిలిన వాళ్ళు ఎలా బయటపడ్డారు ? అనేదే ఈ సినిమా కథ.

నటీనటులు :

నటులు ఒక్కరిలో కూడా నటనా ప్రతిభ లేకపోవడంతో సన్నివేశాలు చాలా వరకు తేలిపోయాయి.కథలో నాగ అనే పాత్ర ద్వారా చేయించిన కామెడీ తక్కువ సందర్భాల్లో బాగున్నా ఎక్కువ చోట్ల చిరాకు పెట్టించింది.పరిణితి లేని నటీనటుల నటన సినిమాను పూర్తిగా చెడగొట్టాయి.

సాంకేతిక విభాగం :

దర్శకుడు దేవరాజ్ కుమార్ రాసుకున్న కథ కాస్తలో కాస్త పర్వాలేదనిపించినా దాన్ని సినిమాగా తీసేందుకు కావాల్సిన కథనాన్ని రాసుకోవడంలో మాత్రం ఆయన పూర్తిగా విఫలమయ్యారు. ఆరంభం నుండి చివరి దాకా ఎక్కడా ఆకట్టుకునే కథనాన్ని, భయపెట్టే సన్నివేశాల్ని అందివ్వలేకపోయారు.

సతీష్ ఆర్యన్ బ్యాక్ గ్రౌండ్ స్కోర్, పాటలకు ఇచ్చిన సంగీతం రెండూ వినదగ్గవిగా లేవు. శివ వై ప్రసాద్ ఎడిటింగ్ కూడా ఆకట్టుకోలేదు. ఇంకా కొన్ని అనవసరపు సీన్లను కట్ చేసి ఉండాల్సింది. వినాష్ మూర్తి సినిమాటోగ్రఫీ కూడా ఎక్కడా ఒక హర్రర్ సినిమాకు ఉండవలసిన రీతిలో లేదు. ఇకపోతే నిర్మాతలు పాటించిన నిర్మాణ విలువలు పర్వావాలేదనిపించే స్థాయిలో మాత్రమే ఉన్నాయి.

ప్లస్ పాయింట్స్ :

ఈ సినిమాలో ప్లస్ పాయింట్స్ అంటే పెద్దగా ఏమీ లేవు. బాగా ఆలోచిస్తే కొన్ని మాత్రం దొరికాయి. సెకండాఫ్లో వచ్చే ఫ్లాష్ బ్యాక్ కాస్తంత పర్వాలేదనిపించింది. ఆ ఫ్లాష్ బ్యాక్ లో కనిపించే హీరోయిన్ శిప్రా గౌర్ హాట్ పెర్ఫార్మెన్స్ మాస్ ఆడియన్సుకు కొంచెం కనెక్టవుతుంది.

మైనస్ పాయింట్స్ :

సినిమా క్లైమాక్స్ సయమం ఆసన్నమయ్యాక దర్శకుడు నడిపిన కథనం చూస్తే మరీ సిల్లీగా అనిపించింది. అందులోని కొన్ని విషయాలను చూస్తే ఇలా కూడా జరుగుతుందా అనిపించింది. చివరగా క్లైమాక్స్ సన్నివేశాన్ని సాగదీసి సాగదీసి ఎప్పుడెప్పుడు శుభం కార్డు పడుతుందా లేచి వెళ్లిపోదామా అనుకునేలా చేశారు.

చివరగా...

పేరు పిశాచే.. కాని భయపెట్టేది కాదు