రీసెంట్గా ఆమీర్ ఖాన్ హీరోగా నటించిన ‘లాల్ సింగ్ చడ్డా’ ఈ బాయ్కాట్ ట్రెండ్లో కొట్టుకుపోయింది. తాజాగా రణ్బీర్ కపూర్, ఆలియా భట్ హీరో, హీరోయిన్లుగా అమితాబ్, నాగార్జున మరో ముఖ్యపాత్రల్లో నటించిన ఈ సినిమాపై గత కొన్ని రోజులుగా సోషల్ మీడియాలో బాయ్కాట్ చేయాలంటూ కొంత మంది పిలుపునిచ్చారు.
బాయ్కాట్ ట్రెండ్.. గత కొంత నెలలుగా బాలీవుడ్ బడా స్టార్స్కు కంటి మీద కునుకు లేకుండా చేస్తోన్న సంగతి తెలిసిందే. రీసెంట్గా బాలీవుడ్ అగ్ర నటుడు ఆమీర్ ఖాన్ నటించిన ‘లాల్ సింగ్ చడ్డా’ కూడా ఈ బాయ్కాట్ ట్రెండ్తో బాక్సాఫీస్ దగ్గర కనుమరుగైంది. అలాగే బ్రహ్మాస్త్ర సినిమాను బాయ్కాట్ చేయాలంటూ సోషల్ మీడియాలో ఓ వర్గం వారు పిలుపునిచ్చారు. గతంలో ఈ రియల్ లైఫ్ కపుల్ .. బీఫ్ (గొడ్డు మాంసం) తినే విషయంలో చేసిన వ్యాఖ్యలు సోషల్ మీడియాలో ట్రెండ్ అయ్యాయి. ‘బ్రహ్మాస్త్ర’ విడుదల సందర్భంగా మహా కాళేశ్వరుని దర్శనం కోసం వెళ్లిన వీళ్లకు అక్కడ కొంత మంది వీరిని అడ్డుకొని గో బ్యాక్ అంటూ నినాదాలు చేశారు.
దైవ దర్శనానికి వచ్చిన అయాన్ ముఖర్జీ, ఆలియా భట్, రణ్బీర్ కపూర్లకు వ్యతిరేకంగా నల్ల జెండాలు పట్టుకొని వచ్చి నిరసన తెలిపారు. తనకు బీఫ్ అంటే చాలా ఇష్టమని అలియా చాలా ఏళ్ల కిందట చెప్పిన ఓ క్లిప్ ఈ మధ్య సోషల్ మీడియాలో వైరల్ అవుతోంది. కొన్ని రోజుల కిందట రణ్ బీర్ తాను మటన్, చికెన్ తో పాటు బీఫ్ కూడా తింటానని చెప్పాడు. దాంతో, అలియా, రణ్ బీర్ లపై భజరంగ్ దళ్ కార్యకర్తలు ఆగ్రహం వ్యక్తం చేసారు. బీఫ్ తినే వాళ్లను గుడిలోకి రానివ్వలేదు. వాళ్లను ఆలయంలోకి అనుమతించేది లేదని నిరసన చేపట్టారు. దీంతో అయాన్ ముఖర్జీ ఒక్కరే దర్శనం చేసుకొని వెళ్లిపోయారు.
వీటితో పాటు ఆలియా భట్ తల్లి.. సోనీ రజ్దాన్.. తనకు భారత దేశం కంటే పాకిస్టాన్లో ఉంటే హ్యాపీగా ఉంటుందంటూ చేసిన వ్యాఖ్యలు కూడా ఈ సందర్భంగా బాయ్కాట్కు పిలుపునిచ్చిన వాళ్లు ప్రస్తాంచారు. మరోవైపు ఆలియా కూడా తన సినిమాలు నచ్చకపోతే చూడకండి అంటూ చేసిన వ్యాఖ్యలు కూడా దీనికి ఊతమిచ్చాయి. అయితే ఈ సినిమా బాయ్ కాట్ ట్రెండ్ ని దాటి బ్రహ్మాస్త్ర హిట్టైంది. ఈ నేపధ్యంలో ఈ బాయ్ కాట్ ట్రెండ్ పై నాగార్జున ఆసక్తికరమైన వ్యాఖ్యలు చేసారు.
నాగార్జున బాలీవుడ్లో బాయ్కాట్ ట్రెండ్పై మాట్లాడుతూ.. ”బాగున్న సినిమాలను ఏ నెగిటివ్ ప్రచారం ఆపదు. బాలీవుడ్ లో కూడా గంగూభాయ్ కతీయవాడి, భూల్ భులయ్యా 2 సినిమాలు మంచి విజయాలు సాధించాయి. ‘లాల్ సింగ్ చద్దా’ సినిమా హిట్ అవ్వలేదంటే అది బాయ్ కాట్ ట్రెండ్ వల్ల మాత్రం కాదు” అని తెలిపారు. ఇప్పుడీ కామెంట్స్ వైరల్ అవుతున్నాయి. వాస్తవానికి ఇప్పుడున్న పరిస్దితుల్లో ఏ హీరో కూడా బాయ్ కాట్ బాలీవుడ్ టాపిక్ పై స్పందించటానికి ఇష్టపడటం లేదన్న సంగతి తెలిసిందే.
