సర్వీస్ టాక్స్ ఎగవేత వార్తలపై స్పందించిన జూనియర్ ఎన్టీఆర్
- సర్వీస్ టాక్స్ ఎగవేతపై వచ్చిన వార్తలను ఖండించిన జూ.ఎన్టీఆర్
- 2015లో వచ్చిన నాన్నకు ప్రేమతో చిత్రానికి నిర్మాత నుంచి సర్వీస్ టాక్స్ వసూలు చేయలేదు
- 2016లోనే కాగ్ నుండి వచ్చిన విచారణకు లిఖితపూర్వకంగా మా ఆడిటర్స్ స్పందించారు
- నేనేమైనా చెల్లించాల్సి వుంటే అణా పైసతో సహా చెల్లించేందుకు సిద్ధం- జూనియర్ ఎన్టీఆర్
నేడు వార్తల్లో వచ్చిన సర్వీస్ టాక్స్ మినహాయింపు కథనం పై , ఒక బాధ్యత గల భారత పౌరుడి గా నా స్పందన తెలియచేయటం సబబు అని భావించి, జరిగిన సంఘటనలను వివరించ దలిచాను. 2015 లో "నాన్నకు ప్రేమతో" అనే సినిమా లో నటించిన సంగతి తెలిసినదే.
ఇది లండన్ లో నిర్మించిన చిత్రం. పొరుగు దేశం లో అందించిన సర్వీస్ (హీరో గా) కు భారత దేశం లో సర్వీస్ టాక్స్ వర్తించదు అని నాకు చెప్పడంతో, చట్టం ప్రకారమే నేను "నాన్నకు ప్రేమతో" సినిమా నిర్మాతల వద్ద సర్వీస్ టాక్స్ వసూలు చేయలేదు.
2016 లో, ఇదే విషయం పై CAG నుండి వచ్చిన క్వెరీకి లిఖిత పూర్వం గా మా ఆడిటర్ లు స్పందించటం జరిగింది. ఆ స్పందన తరువాత, ఎటువంటి అధికారిక ఉత్తర్వులు కానీ, నోటీసు లు కానీ మాకు అందలేదు.
చాలా సంవత్సరాలు గా ఆదాయపు పన్ను మరియు సర్వీస్ టాక్స్ క్రమం తప్పకుండా చెల్లిస్తున్న వ్యక్తిని నేను. భారత పౌరుడి గా నా చట్టపరమైన బాధ్యతలను ఎన్నడూ మరువలేదు.
ఈ విషయం లో సంబంధిత అధికారుల నుండి నాకు ఆదేశాలు అందితే, నా వైపు నుండి నేను చట్టపరం గా చెల్లించాల్సిన రుసుము ఏమైనా ఉంటే, అణా పైసల తో సహా చెల్లించేందుకు నేను సిద్ధము గా ఉన్నాను. ఈ వివరాలు ఇంకా తెలియాల్సి ఉంది.
చట్టానికి ఎల్లప్పుడూ కట్టుబడి ఉండాలి అని నమ్మే నేను, ఈ విషయం లో కూడా అదే పాటిస్తున్నాను.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
