"బాబు బాగా బిజీ" మూవీ రివ్యూ

కథ :

మాధవ్ (శ్రీనివాస్ అవసరాల) అనే కుర్రాడు యుక్త వయసు ఆరంభం నుండే ఆడవాళ్ళ పట్ల, అమ్మాయిల పట్ల, శృంగారం పట్ల ఎక్కువ ఆసక్తి కనబరుస్తూ చాలా ఇన్నోసెంట్ గా ప్రవర్తిస్తూ స్కూల్ స్టేజ్ నుండే ప్లే బాయ్ లా లైఫ్ ను ఎంజాయ్ చేస్తూ అనేక మంది ఆడవాళ్ళతో ఆ సంబంధం కలిగి ఉంటాడు.

అలా అతను రిలేషన్ కలిగి ఉన్న ఒక మహిళ మూలంగా ఎదురైన ఇబ్బంది వలన, పెళ్లి వయసు మీద పడటం వలన ఇక ఇవన్నీ ఆపేసి పెళ్లి చేసుకోవాలనే నిర్ణయానికొస్తాడు మాధవ్. అలా పెళ్లి చూపుల ద్వారా రాధ (మిస్తి చక్రబర్తి) ని కలిసి, తన గతం గురించి ఆమె దగ్గర దాచి ఆమెనే పెళ్లి చేసుకోవాలని చెడు తిరుగుళ్ళు మానేయాలని ప్రయత్నిస్తుంటాడు. అలా జీవితంలో కీలకమైన డెసిషన్ తీసుకున్న మాధవ్ అనుకున్నట్టే చెడు తిరుగుళ్ళు మానేసి మంచివాడిగా మారాడా ? అతని జీవితంలోని ఆడవాళ్లు అతనికెలాంటి పాఠం నేర్పారు ? చివరికి అతని జీవితం ఏమైంది ? అనేదే ఈ సినిమా కథ.

ఎలా ఉందంటే:

తెలుగు సినిమా ప్రేక్షకులు ప్రస్తుతం భిన్నమైన కథలను ఆదరిస్తున్న తరుణంలో అడల్ట్ కామెడీ కంటెంట్ అనే ట్యాగ్ లైన్ తో వచ్చిన ఈ ‘బాబు బాగా బిజీ’ చిత్రంలో ఆ ఎంటర్టైన్మెంట్ ఎక్కడా కనిపించలేదు. ఆకట్టుకున్న శ్రీనివాస్ అవసరాల నటన, ఫస్టాఫ్లో వచ్చే కొన్ని సన్నివేశాలు, పోసాని కామెడీ ఇందులో ప్లస్ పాయింట్స్ కాగా కన్ఫ్యూజన్ కు గురిచేసిన కథలోని సబ్ ప్లాట్స్, ట్రైలర్స్ చూసి ఆశించిన ఎంటర్టైన్మెంట్ దొరక్కపోవడం, ఎమోషనల్ గా ప్రేక్షకుడిని తాకలేకపోయిన క్లైమాక్స్, దర్శకత్వ లోపం ప్రధాన బలహీనతలుగా ఉన్నాయి. మొత్తం మీద చెప్పాలంటే థియేటర్లోని సినిమా కన్నా ముందొచ్చిన ట్రైలర్లే బెటర్ గా అనిపించాయి.

ప్లస్ పాయింట్స్ :

ఈ సినిమాలోని ప్రధాన ప్లస్ పాయింట్ అంటే అది సినిమా కోసం ఎంచుకున్న నేపథ్యమనే చెప్పాలి. వాస్తవానికి దగ్గరగా ఉండే ఈ స్టోరీ లైన్ సినిమా పట్ల ఆసక్తిని కలిగించడంలో సక్సెస్ అయింది. ఇక సినిమాలో ప్రధాన పాత్ర పోషించిన శ్రీనివాస్ అవసరాల ఇన్నోసెంట్ ప్లే బాయ్ గా మంచి నటన కనబరచడానికి సాయశక్తులా ప్రయత్నించి చాలా చోట్ల మెప్పించాడు. ముఖ్యంగా అతని పాత్రకు రాసిన మాటలు ప్రత్యేక ఆకర్షణగా నిలిచాయి.

అలాగే సినిమా ఆరంభంలో వచ్చే హీరో యొక్క చిన్ననాటి జీవితంలో జరిగే కొన్ని సంఘటనల తాలూకు సన్నివేశాలు ఆసక్తికరంగా అనిపించాయి. ఆ ఎపిసోడ్లో ఇన్స్పెక్టర్ గా పోసాని కృష్ణ మురళి చేసిన కాస్తంత కామెడీ నవ్వించింది. హీరో మారుదామనుకుని, హీరోయిన్ కు దగ్గరవ్వాలని ప్రయత్నించే కొన్ని సీన్లు ఆకట్టుకున్నాయి. ఇక సినిమాటోగ్రఫీ చాలా చక్కగా కుదిరింది. రియలిస్టిక్ లొకేషన్లలో ప్రతి ఫ్రేమ్ ను అందంగా చూపారు.

మైనస్ పాయింట్స్ :

ఆరంభం కొంచెం బాగానే ఉన్నా పోను పోను సినిమా రొటీన్ గానే తయారైంది.  అడల్ట్  కామెడీ అంటూ ఊదరగొట్టినా సినిమాలో పోసాని కామెడీ మినహా ఎక్కడా ఎంజాయ్ చేయగల కంటెంట్ కొంచెం కూడా దొరకలేదు. పైగా దర్శకుడు నవీన్ మేడారం కథనాన్ని కాసేపు ప్రస్తుతంలో ఇంకాసేపు గతంలో నడుపుతుండటంతో కాసేపటికే ఆ విధానం బోర్ అనిపించింది.

హీరోకు తన జీవితంలో తగిలే అమ్మాయిల్లో ఏ ఒక్కరినీ కూడా డీటైల్డ్ గా చూపకపోవడం, వాళ్ళతో హీరో రిలేషన్ ఎలా సాగింది అనేది చెప్పకపోవడంతో నిరుత్సాహం కలిగింది. అలాగే కథనం కూడా ఒక ట్రాక్లో నడవకుండా కాసేపు హీరోలోని చెడు, కాసేపు అతనిలోని మంచిని చూపించడంతో సగటు ప్రేక్షకుడు బలంగా కనెక్టయ్యే ఛాన్స్ లేకుండా పోయింది.

సెకండాఫ్లో హీరో మారడానికి కారణమైన అంశాలని కథతో కనెక్టయ్యే విధంగా చూపలేకపోవడవంతో ముఖ్యమైన ఆ అంశం కూడా సైడ్ ట్రాక్లో నడుస్తున్నట్టు అనిపించి కథనానికి అడ్డుపడుతున్నట్లుగా తోచింది. అలాగే చెడుకు, మంచికి మధ్య హీరో పాత్ర పడే ఘర్షణను కూడా సరిగా ఎలివేట్ చేయలేకపోయాడు దర్శకుడు. క్లైమాక్స్ కూడా చాలా రొటీన్ గానే ఉంది తప్ప కొత్తగా ఏమీ లేదు.

సాంకేతిక విభాగం :

సినిమా విజువల్స్ పరంగా బాగేనా ఉంది. సినిమాటోగ్రఫీని బాగానే హ్యాండిల్ చేశారు. ఇహిందీ సినిమాను తెలుగులోకి రీమేక్ చేద్దామని అనుకున్న దర్శకుడు నవీన్ మేడారం దానికి తగిన హోమ్ వర్క్ చేయలేదని స్పష్టంగా తెలుస్తోంది. అడల్ట్ కామెడీ కంటెంట్ నేపథ్యం తీసుకుని తెలుగు నేటివిటీ కోసం మార్పులు చేయాలనే సాకుతో ఎక్కడా ఊహించిన ఎంటర్టైన్మెంట్ ను ఇవ్వలేకపోయాడు. పాటలకు సునీల్ కశ్యప్ అందించిన సంగీతం పర్వాలేదనిపించింది. ఎడిటింగ్ ఇంకాస్త బెటర్ గా చేసుండాల్సింది. అభిషేక్ పిక్చర్స్ నిర్మాణ విలువలు కనిపించాయి.

మరిన్ని ఇంట్రెస్టింగ్ అప్ డేట్స్ కోసం క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి

• babu baga busy
• movie review
• avasarala srinivas