'ఆవిరి' ఫస్ట్ లుక్.. ప్రెజర్ కుక్కర్లో మనిషి తల!
రవిబాబు దర్శకత్వంలో మరో సినిమా వస్తోంది. ఇది కూడా చాలా వైవిధ్యంగా ఉండబోతోంది. కిందటేడాది ‘అదుగో’ అంటూ పంది పిల్లను చూపించిన రవిబాబు.. ఇప్పుడు ప్రెజర్ కుక్కర్లో ‘ఆవిరి’ ఎలా ఉంటుందో చూపించబోతున్నారు.
విభిన్న చిత్రాల దర్శకుడు, నటుడు రవిబాబు 'అదుగో' చిత్రంతో ప్రేక్షకుల ముందుకొచ్చి నిరాశ పరిచాడు. ఇప్పుడు మరో కొత్త ప్రయోగానికి రెడీ అయ్యారు. ఈ చిత్రానికి 'ఆవిరి' అనే టైటిల్ నిప్రకటించారు. ఈ సినిమాని దిల్ రాజు టేకప్ చేయడంతో కాస్త అంచనాలు పెరిగాయి.
కొద్దిరోజుల క్రితం ఈ సినిమాకి సంబంధించి ఓ పోస్టర్ రిలీజ్ చేశారు. గాజు సీసా లోపల అమ్మాయి ఉండటం.. ఆ సీసా మూతని ఎవరో ఓపెన్ చేస్తుంటే ఆవిర్లు బయటికి వస్తుండటం.. వంటి వాటితో విభిన్నంగా ఉన్న ఈ పోస్టర్ ఆకట్టుకుంది.
తాజాగా సినిమా ఫస్ట్ లుక్ పోస్టర్ ని విడుదల చేశారు. ఈ పోస్టర్ ని ఆసక్తికరంగా డిజైన్ చేశారు. స్టవ్ మీద కొంచెం తెరిచి ఉంచిన ప్రెజర్ కుక్కర్, దానిలో కళ్లు తెరిచి ఆశ్చర్యంగా చూస్తోన్న మనిషి తల, కుక్కర్ లోపల నుంచి బయటికి వస్తోన్న ఆవిరి ఈ పోస్టర్లో కనిపిస్తున్నాయి.
ఈ పోస్టర్ ని బట్టి మరో క్రైమ్ థ్రిల్లర్ సినిమాను రవిబాబు ప్రేక్షకులకు అందించబోతున్నారని తెలుస్తోంది. ఈ సినిమాలో రవిబాబుతో పాటు నేహా చౌహాన్, శ్రీ ముక్త, భరణి శంకర్, ముఖ్తార్ ఖాన్ ప్రధాన పాత్రలు పోషిస్తున్నారు. దిల్ రాజు సమర్పణలో ఫ్లయింగ్ ఫ్రాగ్స్ బ్యానర్పై రవిబాబు నిర్మిస్తున్నారు. సుధాకర్ రెడ్డి సినిమాటోగ్రఫీ అందిస్తున్నారు. వైధ్య్ సంగీతం సమకూరుస్తున్నారు.