మూడో వన్డేలో 7 వికెట్ల తేడాతో ఘన విజయం అందుకున్న భారత జట్టు... 2-1 తేడాతో వన్డే సిరీస్ కైవసం చేసుకున్న టీమిండియా..
టీమిండియా ఖాతాలో మరో ద్వైపాక్షిక సిరీస్ చేరింది. సౌతాఫ్రికాని టీ20ల్లో 2-1 తేడాతో చిత్తు చేసిన భారత జట్టు, వన్డే సిరీస్ని కూడా 2-1 తేడాతో కైవసం చేసుకుంది. మొదటి వన్డేలో 9 పరుగుల తేడాతో ఓడిన భారత జట్టు, వరుసగా రెండు మ్యాచుల్లో గెలిచి స్వదేశంలో మరో సిరీస్ని కైవసం చేసుకుంది. సిరీస్ నిర్ణయాత్మక ఆఖరి వన్డేలో 100 పరుగుల ఈజీ టార్గెట్ను 19.1 ఓవర్లలో 3 వికెట్లు కోల్పోయి ఛేదించింది భారత జట్టు.
కెప్టెన్ శిఖర్ ధావన్ 14 బంతుల్లో ఓ ఫోర్తో 8 పరుగులు చేసి రనౌట్ కాగా 18 బంతుల్లో 2 ఫోర్లతో 10 పరుగులు చేసిన ఇషాన్ కిషన్ని ఫోర్టిన్ అవుట్ చేశాడు.. శుబ్మన్ గిల్ 57 బంతుల్లో 8 ఫోర్లతో 49 పరుగులు, టీమిండియా విజయానికి 3 పరుగులు కావాల్సిన దశలో లుంగి ఇంగిడి బౌలింగ్లో ఎల్బీడబ్ల్యూగా పెవిలియన్ చేరాడు. శ్రేయాస్ అయ్యర్ 23 బంతుల్లో 3 ఫోర్లు, రెండు సిక్సర్లతో 28 పరుగులు, సంజూ శాంసన్ 3 పరుగులు చేసి లాంఛనాన్ని ముగించారు.
అంతకుముందు వర్షం కారణంగా అరగంట ఆలస్యంగా ప్రారంభమైన మ్యాచ్లో టాస్ ఓడి తొలుత బ్యాటింగ్ చేసిన సౌతాఫ్రికా 27.1 ఓవర్లలో 99 పరుగులకే ఆలౌట్ అయ్యింది. వన్డేల్లో సౌతాఫ్రికాకి టీమిండియాపై ఇదే అత్యల్ప స్కోరు. 1999లో నైరోబీలో 117 పరుగులు చేసిన సౌతాఫ్రికా, ఆ రికార్డును తుడిచి పెట్టేసింది...
10 బంతుల్లో ఓ ఫోర్తో 6 పరుగులు చేసిన క్వింటన్ డి కాక్ని అవుట్ చేసిన సుందర్, టీమిండియాకి తొలి బ్రేక్ అందించాడు. 27 బంతుల్లో 3 ఫోర్లతో 15 పరుగులు చేసిన జాన్నేమన్ మలాన్, మహ్మద్ సిరాజ్ బౌలింగ్లో అవుట్ అయ్యాడు. ఈ రెండు క్యాచ్లను ఆవేశ్ ఖాన్ అందుకోవడం విశేషం...
25 పరుగులకే 2 వికెట్లు కోల్పోవడంతో రీజా హెన్రిక్స్ నెమ్మదిగా బ్యాటింగ్ చేశాడు. 21 బంతుల్లో 3 పరుగులు మాత్రమే చేసిన హెన్రిక్స్ కూడా సిరాజ్ బౌలింగ్లోనే పెవిలియన్ చేరాడు. 19 బంతుల్లో 9 పరుగులు చేసిన అయిడిన్ మార్క్రమ్, షాబజ్ అహ్మద్ బౌలింగ్లో సంజూ శాంసన్కి క్యాచ్ ఇచ్చి అవుట్ అయ్యాడు. 43 పరుగులకే 4 వికెట్లు కోల్పోయింది సౌతాఫ్రికా...
8 బంతుల్లో ఓ ఫోర్తో 7 పరుగులు చేసిన డేవిడ్ మిల్లర్, వాషింగ్టన్ సుందర్ బౌలింగ్లో క్లీన్ బౌల్డ్ అయ్యాడు. దీంతో 66 పరుగుల వద్ద ఐదో వికెట్ కోల్పోయింది సౌతాఫ్రికా. మిల్లర్ అవుటైన తర్వాతి ఓవర్లోనే 5 బంతుల్లో ఓ ఫోర్తో 5 పరుగులు చేసిన అదిల్ ఫెలూక్వాయోని క్లీన్ బౌల్డ్ చేశాడు కుల్దీప్ యాదవ్...
42 బంతుల్లో 4 ఫోర్లతో 34 పరుగులు చేసిన హెన్రిచ్ క్లాసిన్ని షాబజ్ అహ్మద్ క్లీన్ బౌల్డ్ చేశాడు. కుల్దీప్ యాదవ్ వేసిన ఇన్నింగ్స్ 26వ ఓవర్లో రనౌట్ అయ్యే ప్రమాదం నుంచి తప్పించుకున్న బార్న్ ఫోర్టీన్, ఎల్బీడబ్ల్యూగా అవుట్ అయ్యాడు. ఆ తర్వాతి బంతికే అన్రీచ్ నోకియాని క్లీన్ బౌల్డ్ చేశాడు కుల్దీప్ యాదవ్...
19 బంతుల్లో ఓ ఫోర్, ఓ సిక్సర్తో 14 పరుగులు చేసిన మార్కో జాన్సన్, కుల్దీప్ యాదవ్ బౌలింగ్లో ఆవేశ్ ఖాన్కి క్యాచ్ ఇచ్చి అవుట్ కావడంతో 27.1 ఓవర్లలో 99 పరుగుల వద్ద సౌతాఫ్రికా ఇన్నింగ్స్కి తెరపడింది.
భారత బౌలర్లలో కుల్దీప్ యాదవ్కి 4 వికెట్లు దక్కగా వాషింగ్టన్ సుందర్, మహ్మద్ సిరాజ్, షాబజ్ అహ్మద్ రెండేసి వికెట్లు తీశారు. ఆవేశ్ ఖాన్ 5 ఓవర్లలో ఓ మెయిడిన్తో 8 పరుగులు మాత్రమే ఇవ్వడమే కాకుండా ఫీల్డింగ్లో మూడు క్యాచులు అందుకున్నాడు.
