Shreyas Iyer: భారత టెస్టు జట్టులో శ్రేయస్ అయ్యర్ కు ఎందుకు చోటుదక్కలేదు?

Shreyas Iyer: ఇంగ్లాండ్ టెస్ట్ సిరీస్ కోసం భారత జట్టును బీసీసీఐ ప్రకటించింది. అయితే, ప్రస్తుతం సూపర్ ఫామ్ లో ఉన్న శ్రేయాస్ అయ్యర్ కు జట్టులో ఎందుకు చోటుదక్కలేదు? 

Shreyas Iyer England Test Squad Exclusion Explained

Image Credit: Getty

Shreyas Iyer: భారత టెస్ట్ జట్టులో భారీ మార్పులు జరిగాయి. ఇటీవల సీనియర్ స్టార్ ప్లేయర్ల రిటైర్మెంట్ తో జట్టులోకి కొత్తతరం ప్లేయర్లు ఎంట్రీ ఇచ్చారు. రాబోయే ఇంగ్లాండ్ పర్యటనకు యంగ్ ప్లేయర్ శుభ్‌మాన్ గిల్ కెప్టెన్‌గా నియమితుడయ్యాడు. వికెట్ కీపర్-బ్యాటర్ రిషబ్ పంత్ డిప్యూటీ కెప్టెన్ గా ఎంపికయ్యాడు. ఈ సిరీస్‌కు ఎంపికైన జట్టులో మరో విశేషం ఏంటంటే దాదాపు 8 సంవత్సరాల తర్వాత కరుణ్ నాయర్ మళ్లీ జాతీయ జట్టులోకి తిరిగి వచ్చాడు. 2017లో చివరిసారి భారత్ తరఫున ఆడిన నాయర్, టెస్ట్ క్రికెట్‌లో ట్రిపుల్ సెంచరీ సాధించిన రెండో భారతీయుడిగా నిలిచినప్పటికీ, కొద్దికాలానికే జట్టులో చోటు కోల్పోయిన విషయం తెలిసిందే.

శ్రేయాస్ అయ్యర్ కు షాక్ 

ఇంగ్లాండ్‌తో జరగనున్న టెస్ట్ సిరీస్ కోసం భారత టెస్ట్ జట్టు నుండి శ్రేయస్ అయ్యర్ ను తప్పించారు. చీఫ్ సెలెక్టర్ అజిత్ అగార్కర్ శనివారం (మే 24న) ముంబైలోని బీసీసీఐ ప్రధాన కార్యాలయంలో జరిగిన మీడియా సమావేశంలో ఇంగ్లాండ్ పర్యటన కోసం 18 మంది సభ్యులతో భారత జట్టును ప్రకటించారు.

రోహిత్ శర్మ స్థానంలో శుభ్‌మన్ గిల్ కొత్త టెస్ట్ కెప్టెన్‌గా ఎంపికయ్యాడు. రిషబ్ పంత్ వైస్ కెప్టెన్‌గా నియమితుడయ్యాడు. సాయి సుదర్శన్, అర్ష్‌దీప్ సింగ్ వంటి యువ ఆటగాళ్లకు చోటు దక్కింది. కరుణ్ నాయర్, శార్దూల్ ఠాకూర్‌లకు టెస్ట్ జట్టులోకి తిరిగి ఎంపిక చేశారు. అయితే, మహ్మద్ షమీ, హర్షిత్ రాణా వంటి ఆటగాళ్లు జట్టులో చోటు దక్కించుకోలేకపోయారు. శ్రేయస్ అయ్యర్ కూడా జట్టులో లేకపోవడం అందరినీ ఆశ్చర్యపరిచింది.

శ్రేయస్ అయ్యర్ ఎంపికపై అజిత్ అగార్కర్ వ్యాఖ్యలు

ఇంగ్లాండ్ పర్యటన కోసం భారత టెస్ట్ జట్టును ప్రకటించిన తర్వాత మీడియా సమావేశంలో, శ్రేయస్ అయ్యర్ ఎంపికపై అజిత్ అగార్కర్‌ను ప్రశ్నించగా, అయ్యర్ దేశీయ క్రికెట్‌లో మంచి ప్రదర్శన కనబరిచినప్పటికీ, ప్రస్తుతం టెస్ట్ జట్టులో అతనికి చోటు లేదని ఆయన స్పష్టం చేశారు.

“శ్రేయస్ అయ్యర్ దేశీయ క్రికెట్‌లో బాగా ఆడాడు, కానీ ప్రస్తుతం టెస్ట్ జట్టులో అతనికి చోటు లేదు” అని చీఫ్ సెలెక్టర్ అన్నారు.

2024-25 రంజీ ట్రోఫీలో శ్రేయస్ అయ్యర్ ఐదు మ్యాచ్‌లలో 68.57 సగటుతో 480 పరుగులు చేశాడు. ఇందులో రెండు సెంచరీలు ఉన్నాయి. 2025 వన్డే సిరీస్, ఛాంపియన్స్ ట్రోఫీలో అయ్యర్ అత్యధిక పరుగులు చేసిన భారత బ్యాట్స్‌మన్‌గా నిలిచాడు. ఐదు మ్యాచ్‌లలో 48.60 సగటుతో 243 పరుగులు చేశాడు. ఇందులో రెండు హాఫ్ సెంచరీలు ఉన్నాయి.

శ్రేయస్ అయ్యర్ చివరిసారిగా 2024లో విశాఖపట్నంలో ఇంగ్లాండ్‌తో జరిగిన టెస్ట్ మ్యాచ్‌లో ఆడాడు. 14 టెస్ట్ మ్యాచ్‌లలో 36.86 సగటుతో 811 పరుగులు చేశాడు. ఇందులో ఒక సెంచరీ, 5 హాఫ్ సెంచరీలు ఉన్నాయి.

ఐపీఎల్ 2025లో శ్రేయస్ అయ్యర్ అద్భుత ఫామ్

ప్రస్తుతం జరుగుతున్న ఐపీఎల్ సీజన్‌లో శ్రేయస్ అయ్యర్ పంజాబ్ కింగ్స్‌కు నాయకత్వం వహిస్తున్నాడు. అయ్యర్ నాయకత్వంలో పంజాబ్ కింగ్స్ 2014 తర్వాత తొలిసారిగా ప్లేఆఫ్స్‌కు చేరుకుంది.

అయ్యర్ పంజాబ్ కింగ్స్ తరపున అత్యధిక పరుగులు చేసిన రెండవ బ్యాట్స్‌మన్‌గా ఉన్నాడు. 5 హాఫ్ సెంచరీలు కూడా సాధించాడు. పంజాబ్ కింగ్స్ ప్రస్తుతం పాయింట్ల పట్టికలో రెండవ స్థానంలో ఉంది. 12 మ్యాచ్‌లలో 8 విజయాలు, 3 ఓటములు, ఒక ఫలితం లేని మ్యాచ్‌తో 17 పాయింట్లు సాధించింది.