48 పరుగులు చేసిన వెస్టిండీస్ టీ20 కెప్టెన్ రోవ్‌మెన్ పావెల్, 41 పరుగులు చేసిన నికోలస్ పూరన్.. 

టీమిండియాతో తొలి టీ20 మ్యాచ్‌లో టాస్ గెలిచి బ్యాటింగ్ ఎంచుకున్న వెస్టిండీస్, నిర్ణీత 20 ఓవర్లలో 6 వికెట్లు కోల్పోయి 149 పరుగులు చేసింది. కెప్టెన్ రోవ్‌మన్ పావెల్ 48 పరుగులు చేసి హాఫ్ సెంచరీ మిస్ చేసుకోగా, నికోలస్ పూరన్ 41 పరుగులు చేసి అవుట్ అయ్యాడు.. 

4 ఓవర్లలో 29 పరుగులు చేసి, ఇన్నింగ్స్‌ని నెమ్మదిగా ఆరంభించిన వెస్టిండీస్‌కి యజ్వేంద్ర చాహాల్ వేసిన తొలి ఓవర్‌లో డబుల్ షాక్ తగిలింది.
7 బంతులు ఆడి 1 పరుగు మాత్రమే చేసిన కైల్ మేయర్స్, యజ్వేంద్ర చాహాల్ బౌలింగ్‌లో ఎల్బీడబ్ల్యూగా అవుట్ అయ్యాడు. అయితే టీవీ రిప్లైలో బంతి, వికెట్లను మిస్ అవుతున్నట్టు క్లియర్‌గా కనిపించింది. అంపైర్ అవుట్‌గా ప్రకటించిన తర్వాత బ్రెండన్ కింగ్‌తో మాట్లాడిన కైల్ మేయర్స్, డీఆర్‌ఎస్ తీసుకోకుండానే పెవిలియన్ చేరడంతో వెస్టిండీస్ వికెట్ కోల్పోయింది..

ఆ తర్వాత రెండో బంతికే బ్రెండన్ కింగ్ కూడా అవుట్ అయ్యాడు. 19 బంతుల్లో 4 ఫోర్లు, ఓ సిక్సర్‌తో 28 పరుగులు చేసిన బ్రెండన్ కింగ్ కూడా యజ్వేంద్ర చాహాల్ బౌలింగ్‌లోనే ఎల్బీడబ్ల్యూగా అవుట్ అయ్యాడు. ఈసారి బ్రెండన్ కింగ్ డీఆర్‌ఎస్ తీసుకున్నా ఫలితం దక్కలేదు..

6 బంతుల్లో 3 పరుగులు చేసిన జాన్సన్ ఛార్లెస్, కుల్దీప్ యాదవ్ బౌలింగ్‌లో భారీ షాట్‌కి ప్రయత్నించి తిలక్ వర్మ పట్టిన కళ్లు చెదిరే క్యాచ్‌కి అవుట్ అయ్యాడు. దాదాపు 10 మీటర్ల దూరం నుంచి పరుగెత్తుకుంటూ వచ్చిన తిలక్ వర్మ, డైవ్ చేస్తూ సూపర్బ్ క్యాచ్ అందుకున్నాడు..

58 పరుగులకే 3 వికెట్లు కోల్పోయింది వెస్టిండీస్. ఛార్లెస్ అవుటైన తర్వాతి బంతికే రోవ్‌మన్ పావెల్ వికెట్ కోసం డీఆర్‌ఎస్ తీసుకుంది టీమిండియా. అయితే కుల్దీప్ యాదవ్ వేసిన బంతి, వికెట్లను మిస్ అవుతున్నట్టు క్లియర్‌గా కనిపించింది.

నాలుగో వికెట‌్‌కి 38 పరుగుల భాగస్వామ్యం నెలకొల్పిన నికోలస్ పూరన్, 34 బంతుల్లో 2 ఫోర్లు, 2 సిక్సర్లతో 41 పరుగులు చేసి అవుట్ అయ్యాడు. నికోలస్ పూరన్ క్యాచ్ అందుకున్న తిలక్ వర్మ, సురేష్ రైనా తర్వాత ఆరంగ్రేటం మ్యాచ్‌లోనే రెండు క్యాచులు అందుకున్న రెండో భారత క్రికెటర్‌గా నిలిచాడు...

12 బంతుల్లో ఓ ఫోర్‌తో 10 పరుగులు చేసిన సిమ్రాన్ హెట్మయర్, అర్ష్‌దీప్ సింగ్ వేసిన 19వ ఓవర్‌ తొలి బంతికి అవుట్ అయ్యాడు. 32 బంతుల్లో 3 ఫోర్లు, 3 సిక్సర్లతో 48 పరుగులు చేసిన రోవ్‌మన్ పావెల్, అర్ష్‌దీప్ సింగ్ బౌలింగ్‌లో సూర్యకుమార్ యాదవ్‌కి క్యాచ్ ఇచ్చి అవుట్ అయ్యాడు.. జాసన్ హోల్డర్ 6, రొమారియో షెఫర్డ్ 4 పరుగులు చేసి నాటౌట్‌గా నిలిచారు.