ఛాంపియన్స్ ట్రోఫీ 2025 ఫైనల్ లో గెలిచి టీమిండియా చారిత్రాత్మక విజయాన్ని అందుకుంది. ఇదే సమయంలో ఫైనల్లో ఇండియా కెప్టెన్ రోహిత్ శర్మ ట్రోలర్లకు గట్టిగా సమాధానం ఇచ్చాడు. అదిరిపోయే ఫీల్డింగ్, విధ్వంసకర బ్యాటింగ్‌తో రోహిత్ అందరి నోళ్లు మూయించాడు.

ఛాంపియన్స్ ట్రోఫీ 2025: ఛాంపియన్స్ ట్రోఫీ 2025 ఫైనల్ టీమ్ ఇండియా కెప్టెన్ రోహిత్ శర్మకు ఎంతో ప్రత్యేకమైన మ్యాచ్ అని చెప్పాలి. ఛాంపియన్స్ ట్రోఫీ మ్యాచ్‌ల సమయంలో అతని ఫిట్‌నెస్‌పై ప్రశ్నలు తలెత్తాయి. ఈ టోర్నీ తర్వాత అతను రిటైర్మెంట్ తీసుకోవాలనే ఒత్తిడి కూడా పెరిగింది. కానీ న్యూజిలాండ్‌తో జరిగిన ఫైనల్ తర్వాత రోహిత్ శర్మను ప్రశ్నించిన వాళ్లంతా సైలెంట్ అయిపోతారనడంలో ఎలాంటి సందేహం లేదు.  రోహిత్ తన అద్భుతమైన ఫీల్డింగ్, బ్యాటింగ్‌తో తన ఫిట్‌నెస్‌పై సందేహాలు రేకెత్తించిన వారికి గట్టి సమాధానం చెప్పడమే కాకుండా, రిటైర్మెంట్ గురించి మాట్లాడేవాళ్లకు కూడా నోరు మూయించాడు.

దుబాయ్ ఇంటర్నేషనల్ స్టేడియంలో భారత్-న్యూజిలాండ్ మధ్య జరిగిన ఛాంపియన్స్ ట్రోఫీ ఫైనల్‌ మ్యాచ్ లో రోహిత్ శర్మ ఆటతీరు అందరినీ ఆకట్టుకుంది. ఈ ఆసక్తికర, ఉత్కంఠభరిత పోరులో న్యూజిలాండ్ తొలుత బ్యాటింగ్ చేసింది. తొలి ఇన్నింగ్స్ 49వ ఓవర్లో రోహిత్ చేసిన ఫీల్డింగ్‌ను క్రీడాభిమానులు ఎలా మరిచిపోగలరు. హార్దిక్ పాండ్యా బౌలింగ్‌లో మైఖేల్ బ్రేస్‌వెల్ ఎక్స్‌ట్రా కవర్ దిశగా బలంగా షాట్ ఆడాడు. కెప్టెన్ రోహిత్ శర్మ కుడివైపు అద్భుతంగా డైవ్ చేస్తూ బంతిని ఆపడమే కాకుండా బౌండరీని కూడా కాపాడాడు. రోహిత్ శర్మ డైవ్ చేస్తున్న ఫోటోలను సోషల్ మీడియాలో తెగ షేర్ చేస్తున్నారు. అతను అంత బాగా డైవ్ చేయగలిగాడంటే అది అతని ఫిట్‌నెస్ వల్లే సాధ్యమైంది.

బ్యాట్ తో కూడా సమాధానం చెప్పాడు. 

న్యూజిలాండ్ నిర్దేశించిన 251 పరుగుల లక్ష్యాన్ని ఛేదించేందుకు బరిలోకి దిగిన టీమిండియా తరఫున కెప్టెన్ రోహిత్ శర్మ ఓపెనింగ్ బ్యాట్స్‌మెన్‌గా వచ్చి పిచ్‌పై దుమ్మురేపాడు. అతని విధ్వంసకర బ్యాటింగ్ కోట్లాది మంది అభిమానులను ఉర్రూతలూగిస్తోంది. రోహిత్ కేవలం 41 బంతుల్లోనే హాఫ్ సెంచరీ పూర్తి చేసుకుని సెంచరీ దిశగా దూసుకెళ్తుండగా 76 పరుగుల వద్ద ఔటయ్యాడు. అయినప్పటికీ అతని బ్యాట్ నుంచి పరుగుల వరద పారింది. సిక్సర్లు, ఫోర్లు కూడా బాగా వచ్చాయి.

ఫిట్‌నెస్‌పై ట్రోల్ అయిన రోహిత్ శర్మ

వాస్తవానికి రోహిత్ శర్మ ఫిట్‌నెస్‌పై చాలాసార్లు ప్రశ్నలు తలెత్తాయి. కొద్ది రోజుల క్రితం కాంగ్రెస్ నాయకురాలు షామా మహ్మద్ రోహిత్ శర్మ ఫిట్‌నెస్‌పై అనుమానాలు వ్యక్తం చేశారు. ఆమె చేసిన ట్వీట్ తర్వాత రాజకీయ దుమారం రేగింది. అయితే కాంగ్రెస్ పార్టీ షామా మహ్మద్ వ్యాఖ్యలతో తమకు సంబంధం లేదని చెబుతూ ఆమె ట్వీట్‌ను తొలగించింది. కానీ బీజేపీ మాత్రం దీనిపై కాంగ్రెస్‌పై తీవ్ర విమర్శలు చేసింది. రాజకీయ చర్చ ఎలా ఉన్నా సోషల్ మీడియాలో మాత్రం ఈ విషయంపై రెండు వర్గాలుగా విడిపోయారు. అయితే ఫైనల్లో రోహిత్ ప్రదర్శన తర్వాత ఫిట్‌నెస్‌పై చర్చ ముగిసినట్లే.

రోహిత్ శర్మ 2023లో టీమిండియా కెప్టెన్‌గా బాధ్యతలు చేపట్టాడు. అతని సారథ్యంలో భారత్ 2024లో టీ20 ప్రపంచకప్ (T20 World Cup), రెండు ఆసియా కప్‌లు (Asia Cup) గెలుచుకుంది. ఐపీఎల్ (IPL)లో కూడా ముంబై ఇండియన్స్ (Mumbai Indians)ను ఐదుసార్లు ఛాంపియన్‌గా నిలిపాడు. ఇప్పుడు ఛాంపియన్స్ ట్రోఫీ గెలిచి మరో రికార్డును తన ఖాతాలో వేసుకున్నాడు.