Asia Cup 2023: మెహిదీ హసన్ మిరాజ్, నజ్ముల్ హుస్సేన్ షాంటో సెంచరీలు... మూడో వికెట్‌కి 215 పరుగుల భారీ భాగస్వామ్యం

ఆసియా కప్‌ 2023 టోర్నీలో శ్రీలంకతో జరిగిన మొదటి మ్యాచ్‌లో చిత్తుగా ఓడిన బంగ్లాదేశ్, ఆఫ్ఘాన్‌తో మ్యాచ్‌లో అదిరిపోయే కమ్‌బ్యాక్ ఇచ్చింది. మెహిదీ హసన్ మిరాజ్, నజ్ముల్ హుస్సేన్ షాంటో సెంచరీలతో చెలరేగడంతో టాస్ గెలిచి బ్యాటింగ్ ఎంచుకున్న బంగ్లాదేశ్ జట్టు, నిర్ణీత 50 ఓవర్లలో 5 వికెట్లు కోల్పోయి 334 పరుగుల భారీ స్కోరు చేసింది..

బంగ్లాదేశ్‌కి ఓపెనర్లు శుభారంభం అందించారు. తొలి వికెట్‌కి 60 పరుగులు జోడించిన తర్వాత మహ్మద్ నయీం 32 బంతుల్లో 5 ఫోర్లతో 28 పరుగులు చేసి ముజీబ్ బౌలింగ్‌లో బౌల్డ్ అయ్యాడు. తోహిద్ హృదయ్‌ని గుల్బాద్దీన్ డకౌట్ చేయడంతో 63 పరుగులకే 2 వికెట్లు కోల్పోయింది బంగ్లాదేశ్. 

ఈ దశలో మెహిదీ హసన్ మిరాజ్, నజ్ముల్ హుస్సేన్ షాంటో కలిసి మూడో వికెట్‌కి 215 పరుగుల భారీ భాగస్వామ్యం అందించారు. 119 బంతుల్లో 7 ఫోర్లు, 3 సిక్సర్లతో 112 పరుగులు చేసిన మెహిదీ హసన్ మిరాజ్... వన్డేల్లో రెండో సెంచరీ బాదాడు.

సెంచరీ తర్వాత ముజీబ్ బౌలింగ్‌లో సిక్సర్ బాదిన మెహిదీ హసన్, ఎడమ చేతికి గాయం కావడంతో రిటైర్డ్ హార్ట్‌గా పెవిలియన్ చేరాడు. 105 బంతుల్లో 9 ఫోర్లు, 2 సిక్సర్లతో 104 పరుగులు చేసిన నజ్ముల్ హుస్సేన్ షాంటో కూడా వన్డేల్లో రెండో సెంచరీ నమోదు చేసుకున్నాడు..

సెంచరీ తర్వాత లేని పరుగు కోసం ప్రయత్నించిన షాంటో, మధ్యలో కాలు జారడంతో రనౌట్ అయ్యాడు. 15 బంతుల్లో ఓ ఫోర్, ఓ సిక్సర్‌తో 25 పరుగులు చేసిన ముస్తఫికర్ రహీం కూడా రనౌట్ కావడంతో వెంటవెంటనే 2 వికెట్లు కోల్పోయింది బంగ్లాదేశ్..

ఓ సిక్సర్‌తో 11 పరుగులు చేసిన షమీమ్ హుస్సేన్ కూడా రనౌట్ అయ్యాడు. అయితే మరో ఎండ్‌లో 18 బంతుల్లో 4 ఫోర్లు, ఓ సిక్సర్‌తో 32 పరుగులు చేసిన కెప్టెన్ షకీబ్ అల్ హసన్, బంగ్లా స్కోరు 330 దాటించాడు... 

2018 ఆసియా కప్‌లో ఇండియాతో మ్యాచ్‌లో ఓపెనింగ్ చేసిన మెహిదీ హసన్ మిరాజ్, అప్పుడు 32 పరుగులు చేసి అవుట్ అయ్యాడు. ఆ మ్యాచ్ తర్వాత మళ్లీ మెహిదీ హసన్ మిరాజ్ ఓపెనర్‌గా రావడం ఇదే తొలిసారి. ఈ రెండు మ్యాచులు మినహాయిస్తే మిగిలిన వన్డేల్లో మెహిదీ హసన్, ఆరు అంతకంటే తక్కువ స్థానాల్లోనే బ్యాటింగ్ చేయడం విశేషం..

నేటి మ్యాచ్‌లో 10 ఓవర్లు బౌలింగ్ చేసిన రషీద్ ఖాన్, ఒక్క వికెట్ తీయకుండా 66 పరుగులు సమర్పించాడు. వన్డేల్లో రషీద్‌కి ఇది మూడో చెత్త ప్రదర్శన. 2019 వన్డే వరల్డ్ కప్‌లో ఇంగ్లాండ్‌పై 110 పరుగులు సమర్పించిన రషీద్ ఖాన్, 2016లో ఐర్లాండ్‌పై 68 పరుగులు ఇచ్చాడు..

ఒకే వన్డేలో ఇద్దరు బంగ్లాదేశ్ బ్యాటర్లు సెంచరీలు చేయడం ఇది ఐదోసారి. ఇంతకుముందు జింబాబ్వేపై రెండు సార్లు, పాకిస్తాన్‌పై 2015లో, న్యూజిలాండ్‌పై 2017లో ఈ ఫీట్ సాధించింది బంగ్లాదేశ్..