ENG vs IND: పేస్ కు అనుకూలిస్తున్న ది ఓవల్ పిచ్ పై టీమిండియా పేసర్లు అదరగొట్టారు. ఇండియా-ఇంగ్లాండ్ మధ్య జరుగుతున్న తొలి వన్డేల ఇంగ్లాండ్ 110 పరుగులకే చాప చుట్టేసింది.
‘ది ఓవల్’ లో టీమిండియా పేసర్లు కేక పుట్టించారు. దూకుడుగా ఆడటాన్ని లక్షణంగా మార్చుకున్నామని విర్రవీగుతున్న ఇంగ్లాండ్ కు అసలైన దూకుడు ఎలా ఉంటుందో రుచి చూపించారు. భారత పేసర్ల ధాటికి ఇంగ్లాండ్ స్టార్ బ్యాటర్లు జేసన్ రాయ్, జో రూట్, బెన్ స్టోక్స్, లివింగ్స్టోన్ లు ఖాతానే తెరవలేదు. టాప్ స్కోరర్ కెప్టెన్ జోస్ బట్లర్ (30) కూడా ఆ మాత్రమైనా ఆడకుంటే ఆ జట్టు పరిస్థితి మరింత అధ్వాన్నంగా ఉండేది. భారత బౌలర్లలో బుమ్రాకు 6 వికెట్లు దక్కగా, మహ్మద్ షమీ 3, ప్రసిధ్ కృష్ణకు ఒక వికెట్ దక్కింది.
టాస్ ఓడి బ్యాటింగ్ కు వచ్చిన ఇంగ్లాండ్ కు ఇన్నింగ్స్ రెండో ఓవర్లోనే షాకిచ్చాడు బుమ్రా. ఆ ఓవర్లో అతడు వేసిన నాలుగో బంతికి జేసన్ రాయ్ క్లీన్ బౌల్డ్ అయ్యాడు. అదే ఓవర్లో బుమ్రా.. ఇంగ్లాండ్ కు మరో షాకిచ్చాడు. వన్ డౌన్ లో వచ్చిన జో రూట్ (0)ను డకౌట్ చేశాడు. ఆ ఓవర్ చివరి బంతికి రూట్.. వికెట్ కీపర్ పంత్ కు క్యాచ్ ఇచ్చాడు.
నాలుగో స్థానంలో బ్యాటింగ్ కు వచ్చిన ఇంగ్లాండ్ టెస్టు జట్టు సారథి బెన్ స్టోక్స్ (0) కూడా ఆడిన తొలి బంతికే పంత్ కు క్యాచ్ ఇచ్చాడు. బెన్ స్టోక్స్ వికెట్ షమీకి దక్కింది. ఇక బుమ్రావేసిన ఐదో ఓవర్ మూడో బంతికి బెయిర్ స్టో పంత్ కు క్యాచ్ ఇచ్చి పెవిలియన్ చేరాడు. ఇంగ్లాండ్ ఎన్నోఆశలు పెట్టుకున్న లివింగ్ స్టోన్ (0) ను కూడా బుమ్రా ఇన్నింగ్స్ 8వ ఓవర్లో క్లీన్ బౌల్డ్ చేశాడు.
వరుసగా వికెట్లు కోల్పోతున్నతరుణంలో ఇంగ్లాండ్ ను ఆదుకోవడానికి ప్రయత్నించిన మోయిన్ అలీ (14)ని ప్రసిధ్ కృష్ణ ఇన్నింగ్స్ 14వ ఓవర్లో ఔట్ చేశాడు. ప్రసిధ్ బౌలింగ్ లో అతడికే క్యాచ్ ఇచ్చిన అలీ నిరాశగా వెనుదిరిగాడు.
తర్వాత ఓవర్లో ఇంగ్లాండ్ కు మరో భారీ షాక్ తాకింది. బాధ్యాతాయుతంగా ఆడుతున్న బట్లర్ (32 బంతుల్లో 30.. 6 ఫోర్లు) ను షమీ బోల్తా కొట్టించాడు. షమీ వేసిన ఇన్నింగ్స్15వ ఓవర్లో మూడోబంతికి భారీ షాట్ ఆడేందుకు యత్నించిన బట్లర్.. బౌండరీ వద్ద ఫీల్డింగ్ చేస్తున్న సూర్యకుమార్ యాదవ్ కు క్యాచ్ ఇచ్చాడు. ఫలితంగా ఇంగ్లాండ్ ఆశలునేలకూలాయి. తనతర్వాత ఓవర్లో షమీ.. క్రెయిగ్ ఓవర్టన్ (1) ను బౌల్డ్ చేశాడు.
ఇక ఇంగ్లాండ్ టెయిలెండర్ డేవిడ్ విల్లీ (21.. 3ఫోర్లు)కాస్త దూకుడుగా ఆడేందుకు యత్నించాడు. కానీ బుమ్రా మళ్లీ తన సెకండ్ స్పెల్ లో అతడిని బౌల్డ్ చేశాడు. ఈ ఇన్నింగ్స్ లో అతడికి ఇది ఐదోవికెట్. ఇక బ్రైడన్ కార్స్ (15) ను కూడా బౌల్డ్ చేసిన బుమ్రా.. ఆరు వికెట్లు దక్కించుకున్నాడు.
భారత బౌలర్లలో బుమ్రా.. 7.2 ఓవర్లలో 19 పరుగులే ఇచ్చి 6 వికెట్లు పడగొట్టాడు. ఈ మ్యాచ్ లో అతడి బౌలింగ్ సగటు.. 2.60 గా నమోదవడం విశేషం. షమీ 7 ఓవర్లలో 31పరుగులిచ్చి 3వికెట్లు తీశాడు. ప్రసిధ్ కృష్ణ. 5 ఓవర్లలో 26 పరుగులిచ్చి 1 వికెట్ తీశాడు.
