వరుస బంతుల్లో ఆండ్రే రస్సెల్, సునీల్ నరైన్, శార్దూల్ ఠాకూర్‌లను అవుట్ చేసిన రషీద్ ఖాన్.. 

ఐపీఎల్ 2023 సీజన్‌లో మొట్టమొదటి హ్యాట్రిక్ నమోదైంది. హార్ధిక్ పాండ్యా గైర్హజరీతో టెంపరరీ కెప్టెన్‌గా వ్యవహరిస్తున్న రషీద్ ఖాన్, విజయం దిశగా సాగుతున్న కేకేఆర్‌ని హ్యాట్రిక్‌తో చావు దెబ్బ తీశాడు. 24 బంతుల్లో 50 పరుగులు చేయాల్సిన దశలో డేంజరస్ బ్యాటర్లు ఆండ్రే రస్సెల్, సునీల్ నరైన్, శార్దూల్ ఠాకూర్ వికెట్లను కోల్పోయిన కోల్‌కత్తా... పరాజయం దిశగా సాగుతోంది.

205 పరుగుల భారీ లక్ష్యఛేదనలో కేకేఆర్‌కి శుభారంభం దక్కలేదు. 12 బంతుల్లో ఓ ఫోర్, ఓ సిక్సర్‌తో 15 పరుగులు చేసిన రహ్మనుల్లా గుర్భాజ్, మహ్మద్ షమీ బౌలింగ్‌లో అవుట్ అయ్యాడు. 8 బంతుల్లో ఓ ఫోర్‌తో 6 పరుగులు చేసిన నారాయణ్ జగదీశన్, జోషువా లిటిల్ బౌలింగ్‌లో అవుట్ అయ్యాడు. 28 పరుగులకే 2 వికెట్లు కోల్పోయింది కేకేఆర్...

ఈ దశలో కెప్టెన్ నితీశ్ రాణా, వెంకటేశ్ అయ్యర్ కలిసి మూడో వికెట్‌కి 100 పరుగుల భాగస్వామ్యం నెలకొల్పారు. 29 బంతుల్లో 4 ఫోర్లు, 3 సిక్సర్లతో 45 పరుగులు చేసిన నితీశ్ రాణా, అల్జెరీ జోసఫ్ బౌలింగ్‌లో అవుట్ అయ్యాడు...

గత సీజన్‌లో అట్టర్ ఫ్లాప్ అయిన వెంకటేశ్ అయ్యర్, భారీ సిక్సర్లతో గుజరాత్ టైటాన్స్ బౌలర్లపై విరుచుకుపడ్డాడు. 15వ ఓవర్‌లో 4, 4, 6 బాదిన వెంకటేశ్ అయ్యర్, 17 పరుగులు రాబట్టాడు. దీంతో ఆఖరి 5 ఓవర్లలో కేకేఆర్ విజయానికి 56 పరుగులే కావాల్సి వచ్చాయి..


40 బంతుల్లో 8 ఫోర్లు, 5 సిక్సర్లతో 83 పరుగులు చేసిన వెంకటేశ్ అయ్యర్, అల్జెరీ జోసఫ్ బౌలింగ్‌లో శుబ్‌మన్ గిల్‌కి క్యాచ్ ఇచ్చి పెవిలియన్ చేరాడు. చివరి 4 ఓవర్లలో కేకేఆర్ విజయానికి 50 పరుగులు అవసరమయ్యాయి..

17వ ఓవర్ మొదటి బంతికి ఆండ్రే రస్సెల్‌ని అవుట్ చేశాడు రషీద్ ఖాన్. అంపైర్ నాటౌట్‌గా ప్రకటించినా డీఆర్‌ఎస్ తీసుకున్న టైటాన్స్‌కి ఫలితం దక్కింది. ఆ తర్వాతి బంతికి సునీల్ నరైన్ క్రీజులోకి వస్తూనే భారీ షాట్‌కి ప్రయత్నించి, జయంత్‌కి క్యాచ్ ఇచ్చి అవుట్ అయ్యాడు...

ఆ తర్వాత బంతికి శార్దూల్ ఠాకూర్ ఎల్బీడబ్ల్యూగా అవుట్ అయ్యాడు. రషీద్ ఖాన్‌కి హ్యాట్రిక్ దక్కింది. 


అంతకుముందు విజయ్ శంకర్ సునామీ హాఫ్ సెంచరీ కారణంగా టాస్ గెలిచి బ్యాటింగ్ ఎంచుకున్న గుజరాత్ టైటాన్స్, నిర్ణీత 20 ఓవర్లలో 4 వికెట్ల నష్టానికి 204 పరుగులు చేసింది. 17 బంతుల్లో 3 ఫోర్లతో 17 పరుగులు చేసిన వృద్ధిమాన్ సాహా, సునీల్ నరైన్ బౌలింగ్‌లో భారీ షాట్‌కి ప్రయత్నించి అవుట్ అయ్యాడు..

31 బంతుల్లో 5 ఫోర్లతో 39 పరుగులు చేసిన శుబ్‌మన్ గిల్ కూడా సునీల్ నరైన్ బౌలింగ్‌లోనే పెవిలియన్ చేరాడు. స్కోరు వేగం పెంచేందుకు ప్రయత్నించిన గిల్, ఉమేశ్ యాదవ్‌కి క్యాచ్ ఇచ్చి అవుట్ అయ్యాడు. ఐపీఎల్‌‌లో అత్యంత వేగంగా 2 వేల పరుగులు అందుకున్న రెండో బ్యాటర్‌గా నిలిచాడు శుబ్‌మన్ గిల్..

23 ఏళ్ల 27 రోజుల వయసులో రిషబ్ పంత్ 2 వేల ఐపీఎల్ పరుగుల క్లబ్‌లో చేరగా శుబ్‌మన్ గిల్ వయసు 23 ఏళ్ల 214 రోజులు. సంజూ శాంసన్, విరాట్ కోహ్లీ, సురేష్ రైనా తర్వాతి స్థానాలలో ఉన్నారు.. 

8 బంతుల్లో 3 ఫోర్లతో 14 పరుగులు చేసిన అభినవ్ మనోహార్‌, యంగ్ బౌలర్ సుయాశ్ శర్మ బౌలింగ్‌లో ఎల్బీడబ్ల్యూగా అవుట్ అయ్యాడు...

వన్‌డౌన్‌లో వచ్చిన సాయి సుదర్శన్ 34 బంతుల్లో హాఫ్ సెంచరీ పూర్తి చేసుకున్నాడు. ఢిల్లీ క్యాపిటల్స్‌తో జరిగిన మ్యాచ్‌లో 62 పరుగులు చేసి అజేయంగా నిలిచిన సాయి సుదర్శన్‌కి ఇది ఈ సీజన్‌లో వరుసగా రెండో హాఫ్ సెంచరీ.. 38 బంతుల్లో 3 ఫోర్లు, 2 సిక్సర్లతో 53 పరుగులు చేసిన సాయి సుదర్శన్, సునీల్ నరైన్ బౌలింగ్‌లో అనుకుల్‌రాయ్‌కి క్యాచ్ ఇచ్చి అవుట్ అయ్యాడు...

4 ఓవర్లలో 33 పరుగులిచ్చి 3 వికెట్లు తీసిన సునీల్ నరైన్, ఐపీఎల్ కెరీర్‌లో 15వ సారి మూడు వికెట్ల ప్రదర్శన నమోదు చేశాడు. జస్ప్రిత్ బుమ్రా, లసిత్ మలింగ 19 సార్లు ఈ ఫీట్ సాధించి టాప్‌లో ఉంటే అమిత్ మిశ్రా 17 సార్లు, డ్వేన్ బ్రావ్, ఉమేశ్ యాదవ్, యజ్వేంద్ర చాహాల్ 16 సార్లు మూడేసి వికెట్లు తీసి మూడో స్థానంలో ఉన్నారు..

లూకీ ఫర్గూసన్ వేసిన 19వ ఓవర్‌లో రెండు సిక్సర్లు, రెండు ఫోర్లతో 25 పరుగులు రాబట్టిన విజయ్ శంకర్, శార్దూల్ ఠాకూర్ వేసిన ఆఖరి ఓవర్‌లో వరుసగా 3 సిక్సర్లు బాదాడు. 21 బంతుల్లో హాఫ్ సెంచరీ అందుకున్న విజయ్ శంకర్, 24 బంతుల్లో 4 ఫోర్లు, 5 సిక్సర్లతో 63 పరుగులు చేసి నాటౌట్‌గా నిలిచాడు. శంకర్ ఇన్నింగ్స్ కారణంగా ఆఖరి 2 ఓవర్లలో 45 పరుగులు రాబట్టింది గుజరాత్ టైటాన్స్..