India vs Sri Lanka 3rd T20I: వరుసగా 12వ విజయాన్ని అందుకున్న కెప్టెన్ రోహిత్ శర్మ... శ్రేయాస్ అయ్యర్ హ్యాట్రిక్ హాఫ్ సెంచరీ...

స్వదేశంలో కెప్టెన్ రోహిత్ శర్మ జోరుకి లంక బ్రేకులు వేయలేకపోయింది. న్యూజిలాండ్, విండీస్‌లను స్వదేశంలో వైట్ వాష్ చేసిన భారత జట్టు, శ్రీలంకను కూడా క్లీన్ స్వీప్ చేసేసింది. శ్రేయాస్ అయ్యర్ వరుసగా మూడో మ్యాచ్‌లోనూ హాఫ్ సెంచరీతో అదరగొట్టి, భారత జట్టుకి ఘన విజయాన్ని అందించాడు. 16.5 బంతుల్లో 4 వికెట్లు కోల్పోయి లక్ష్యాన్ని ఛేదించిన టీమిండియా, 6 వికెట్ల తేడాతో గెలుపు అందుకుంది. 

కెప్టెన్ రోహిత్ శర్మ వరుసగా రెండో మ్యాచ్‌లో సింగిల్ డిజిట్ స్కోరుకే పెవిలియన్ చేరాడు. 9 బంతుల్లో 5 పరుగులు చేసిన రోహిత్ శర్మ, దుస్మంత చమీరా బౌలింగ్‌లో కరుణరత్నేకి క్యాచ్ ఇచ్చి అవుట్ అయ్యాడు... 

12 బంతుల్లో 3 ఫోర్లతో 18 పరుగులు చేసిన సంజూ శాంసన్, కరుణరత్నే బౌలింగ్‌లో ఛండీమల్ క్యాచ్ ఇచ్చి పెవిలియన్ చేరాడు. 16 బంతుల్లో ఓ ఫోర్, ఓ సిక్సర్‌తో 21 పరుగులు చేసిన దీపక్ హుడా, లహిరు కుమార బౌలింగ్‌లో క్లీన్ బౌల్డ్ అయ్యాడు...

మొదటి బంతికే ఫోర్ బాదిన వెంకటేశ్ అయ్యర్ 5 పరుగులు చేసి లహిరు కుమార బౌలింగ్‌లో భారీ షాట్‌కి ప్రయత్నించి పెవిలియన్ చేరాడు. ఓ వైపు వికెట్లు పడుతున్నా మరో ఎండ్‌లో అదరగొట్టిన శ్రేయాస్ అయ్యర్ 29 బంతుల్లో హాఫ్ సెంచరీ అందుకున్నాడు...

ఒకే సిరీస్‌లో వరుసగా మూడు టీ20 మ్యాచుల్లో హాఫ్ సెంచరీలు చేసిన శ్రేయాస్ అయ్యర్, విరాట్ కోహ్లీ తర్వాత ఈ ఫీట్ సాధించిన రెండో భారత బ్యాటర్‌గా నిలిచాడు. విరాట్ కోహ్లీ విదేశాల్లో ఈ ఫీట్ సాధిస్తే, స్వదేశంలో హ్యాట్రిక్ హాఫ్ సెంచరీలు బాదిన భారత బ్యాటర్‌గా నిలిచాడు శ్రేయాస్ అయ్యర్...

శ్రేయాస్ అయ్యర్ 45 బంతుల్లో 9 ఫోర్లు, ఓ సిక్సర్‌తో 73 పరుగులు చేయగా, రవీంద్ర జడేజా 15 బంతుల్లో 3 ఫోర్లతో 22 పరుగులు చేశాడు. 

అంతకుముందు టాస్ గెలిచి తొలుత బ్యాటింగ్ ఎంచుకున్న శ్రీలంక జట్టు, నిర్ణీత 20 ఓవర్లలో 5 వికెట్లు కోల్పోయి 146 పరుగులు చేసింది.... ఓపెనర్ దనుష్క గుణతిలకను తొలి ఓవర్ ఆఖరి బంతికి డకౌట్ చేశాడు మహ్మద్ సిరాజ్. గత మ్యాచ్‌లో హాఫ్ సెంచరీ చేసిన పథుమ్ నిస్సంక 10 బంతుల్లోఒక్క పరుగు చేసి ఆవేశ్ ఖాన్ బౌలింగ్‌లో వెంకటేశ్ అయ్యర్‌కి క్యాచ్ ఇచ్చి అవుట్ అయ్యాడు...

చరిత్ అసలంక 6 బంతుల్లో 4 పరుగులు చేసి ఆవేశ్ ఖాన్ బౌలింగ్‌లో సంజూ శాంసన్‌కి క్యాచ్ ఇచ్చి పెవిలియన్ చేరాడు. తొలి ఓవర్‌ను వికెట్ మెయిడిన్‌గా మార్చిన ఆవేశ్ ఖాన్, రెండో ఓవర్‌లో ఒకే పరుగు ఇచ్చి వికెట్ తీయడం విశేషం..

జనిత్ లియనాగే 19 బంతుల్లో 9 పరుగులు చేసి రవి భిష్ణోయ్ బౌలింగ్‌లో క్లీన్ బౌల్డ్ అయ్యాడు. వికెట్ కీపర్ దినేశ్ చంఢీమన్ 27 బంతుల్లో 2 ఫోర్లతో 25 పరుగులు చేసి హర్షల్ పటేల్ బౌలింగ్‌లో వెంకటేశ్ అయ్యర్ పట్టిన క్యాచ్‌కి అవుట్ అయ్యాడు...

60 పరుగులకే 5 వికెట్లు కోల్పోయి పీకల్లోతు కష్టాల్లో పడింది శ్రీలంక. ఈ దశలో కెప్టెన్ దసున్ శనక మరోసారి కెప్టెన్ ఇన్నింగ్స్‌తో లంక మంచి స్కోరు అందించాడు. ఆఖరి ఓవర్లలో హిట్టింగ్‌కి దిగిన దసున్ శనక, ఆవేశ్ ఖాన్ వేసిన 19వ ఓవర్‌లో 2 ఫోర్లు, ఓ సిక్సర్‌తో 19 పరుగులు రాబట్టాడు... 

హర్షల్ పటేల్ వేసిన ఇన్నింగ్స్ ఆఖరి ఓవర్‌లో 12 పరుగులు రాబట్టాడు దసున్ శనక. గత మ్యాచ్‌లో ఆఖరి 5 ఓవర్లలో 80 పరుగులు రాబట్టిన శ్రీలంక బ్యాటర్లు, నేటి మ్యాచ్‌లో 69 పరుగులు రాబట్టడం విశేషం. 

నాలుగు ఓవర్లలో ఓ మెయిడిన్‌తో 2 వికెట్లు తీసి 23 పరుగులు సమర్పించాడు ఆవేశ్ ఖాన్. కెప్టెన్ దసున్ శనక 38 బంతుల్లో 9 ఫోర్లు, 2 సిక్సర్లతో 74 పరుగులు చేయగా చమికా కరుణరత్నే 19 బంతుల్లో 12 పరుగులు చేసి తన వంతు సహకారం అందించాడు. ఈ ఇద్దరూ 47 బంతుల్లో 86 పరుగుల భాగస్వామ్యం జోడించారు. 

పవర్ ప్లేలో కేవలం 18 పరుగులు మాత్రమే సమర్పించి 3 వికెట్లు తీసిన భారత బౌలర్లు, అత్యుత్తమ గణాంకాలు నమోదు చేశారు. ఇంతకుముందు 2016లో యూఏఈపై పవర్ ప్లేలో 2 వికెట్లు తీసి 21 పరుగులు సమర్పించిన భారత జట్టు, ఆ రికార్డును అధిగమించారు. 

మహ్మద్ సిరాజ్, హర్షల్ పటేల్, రవి భిష్ణోయ్ తలా ఓ వికెట్ తీశారు. 8.3 ఓవర్లు ముగిసే సమయానికి 4 వికెట్ల నష్టానికి 29 పరుగులు మాత్రమే చేసిన శ్రీలంక, 146 పరుగుల స్కోరు చేసిందంటే దానికి దసున్ శనక ఇన్నింగ్సే కారణం...