India vs Australia 2nd test: 95 పరుగులకే 7 వికెట్లు కోల్పోయిన ఆస్ట్రేలియా... మూడేసి వికెట్లు తీసిన రవిచంద్రన్ అశ్విన్, రవీంద్ర జడేజా... 

ఢిల్లీ టెస్టులో మూడో రోజు భారత స్పిన్నర్ల హవా కొనసాగుతోంది. ఓవర్‌నైట్ స్కోరు 61/1 స్కోరుతో మూడో రోజు బ్యాటింగ్ మొదలెట్టిన ఆస్ట్రేలియా, మొదటి గంటలోనే 6 వికెట్లు కోల్పోయింది..

46 బంతుల్లో 6 ఫోర్లు, ఓ సిక్సర్‌తో 43 పరుగులు చేసిన ట్రావిస్ హెడ్, రవిచంద్రన్ అశ్విన్ బౌలింగ్‌లో శ్రీకర్ భరత్‌కి క్యాచ్ ఇచ్చి అవుట్ అయ్యాడు. ఓవర్‌నైట్ స్కోరుకి 4 పరుగులు జోడించి తొలి వికెట్ కోల్పోయింది ఆసీస్...

19 బంతుల్లో ఓ ఫోర్‌తో 9 పరుగులు చేసిన స్టీవ్ స్మిత్, అశ్విన్ బౌలింగ్‌లో ఎల్బీడబ్ల్యూ‌గా పెవిలియన్ చేరాడు. తొలి ఇన్నింగ్స్‌లో స్టీవ్ స్మిత్‌ని డకౌట్ చేసిన అశ్విన్, రెండో ఇన్నింగ్స్‌లోనూ అవుట్ చేశాడు. స్టీవ్ స్మిత్‌ని రెండు ఇన్నింగ్స్‌ల్లోనూ అవుట్ చేసిన తొలి స్పిన్ బౌలర్‌గా నిలిచాడు అశ్విన్.. టెస్టుల్లో అశ్విన్‌ని అత్యధిక సార్లు అవుట్ చేసిన బౌలర్‌గానూ సరికొత్త రికార్డు నెలకొల్పాడు అశ్విన్. 

స్టీవ్ స్మిత్‌ని టెస్టుల్లో అశ్విన్ అవుట్ చేయడం ఇది 8వ సారి కాగా ఇంతకుముందు పాక్ బౌలర్ యాసిర్ షా 7 సార్లు అవుట్ చేశాడు. 50 బంతుల్లో 5 ఫోర్లతో 35 పరుగులు చేసిన మార్నస్ లబుషేన్, రవీంద్ర జడేజా బౌలింగ్‌లో క్లీన్ బౌల్డ్ అయ్యాడు. ఈ సిరీస్‌లో లబుషేన్, జడ్డూ బౌలింగ్‌లో అవుట్ కావడం ఇది మూడోసారి. ఆ తర్వాత వరుస వికెట్లు కోల్పోయింది ఆసీస్...

జడేజా బౌలింగ్‌లో అవుట్ కావడానికి ముందు రవిచంద్రన్ అశ్విన్ బౌలింగ్‌లో మార్నస్ లబుషేన్ ఇచ్చిన క్యాచ్‌ని శ్రేయాస్ అయ్యర్ ఒడిసిపట్టలేకపోయాడు. అయితే అనుకోకుండా వచ్చిన లైఫ్‌ని లబుషేన్ సరిగ్గా వాడుకోలేకపోయాడు. 8 బంతుల్లో 2 పరుగులు చేసిన మ్యాట్ రెంషా, అశ్విన్ బౌలింగ్‌లో ఎల్బీడబ్ల్యూ అయ్యాడు. 3 బంతులాడిన పీటర్ హ్యాండ్స్‌కోంబ్‌, రవీంద్ర జడేజా బౌలింగ్‌లో విరాట్ కోహ్లీకి క్యాచ్ ఇచ్చి అవుట్ అయ్యాడు. ఆ తర్వాతి బంతికి ప్యాట్ కమ్మిన్స్‌ని క్లీన్ బౌల్డ్ చేశాడు జడేజా...

దీంతో ఒకానొక దశలో 85/2 స్కోరుతో ఉన్న ఆస్ట్రేలియా, 10 పరుగుల తేడాతో 95/7 స్థితికి చేరుకుంది.. అంతకుముందు తొలి ఇన్నింగ్స్‌లో 1 ఇన్నింగ్స్ ఆధిక్యం దక్కించుకున్న ఆస్ట్రేలియా, రెండో ఇన్నింగ్స్‌ని దూకుడుగా ఆరంభించింది. ఓపెనర్ డేవిడ్ వార్నర్ గాయం కారణంగా తప్పుకోవడంతో ఉస్మాన్ ఖవాజాతో కలిసి ట్రావిస్ హెడ్ ఓపెనింగ్‌కి వచ్చాడు.

13 బంతుల్లో 6 పరుగులు చేసిన ఉస్మాన్ ఖవాజా, రవీంద్ర జడేజా బౌలింగ్‌లో శ్రేయాస్ అయ్యర్‌కి క్యాచ్ ఇచ్చి అవుట్ అయ్యాడు. 23 పరుగుల వద్ద తొలి వికెట్ కోల్పోయింది ఆస్ట్రేలియా. అయితే వన్‌డౌన్‌లో వచ్చిన మార్నస్ లబుషేన్, ట్రావిస్ హెడ్ కలిసి భారత బౌలర్లపైకి ఎదురుదాడికి దిగారు. ముఖ్యంగా ట్రావిస్ హెడ్, భారత స్పిన్నర్ల బౌలింగ్‌లో వరుస బౌండరీలు బాది, ప్రెషర్ పెంచాడు.

అయితే ట్రావిస్ హెడ్‌ని మూడో రోజు మొదటి ఓవర్‌లోనే అవుట్ చేసిన రవిచంద్రన్ అశ్విన్, టీమిండియాకి కావాల్సిన బ్రేక్ అందించాడు. ట్రావిస్ హెడ్ అవుటైన తర్వాత మిగిలిన 5 వికెట్లను వెంటవెంటనే కోల్పోయింది ఆస్ట్రేలియా..