ICC World cup 2023: బంగ్లాదేశ్ బోణీ... ఆఫ్ఘాన్‌పై ఘన విజయం..

ఐసీసీ మెన్స్ వన్డే వరల్డ్ కప్ 2023 టోర్నీలో బంగ్లాదేశ్ బోణీ కొట్టింది. ధర్మశాలలో ఆఫ్ఘనిస్తాన్‌తో జరిగిన మ్యాచ్‌లో 6 వికెట్ల తేడాతో ఘన విజయం అందుకుంది బంగ్లాదేశ్. టాస్ గెలిచిన బంగ్లాదేశ్ కెప్టెన్ షకీబ్ అల్ హసన్, ఆఫ్ఘాన్‌కి బ్యాటింగ్ అప్పగించాడు..

తొలుత బ్యాటింగ్ చేసిన బంగ్లాదేశ్ 37.2 ఓవర్లలో 156 పరుగులకి ఆలౌట్ అయ్యింది. రెహ్మనుల్లా గుర్భాజ్ 62 బంతుల్లో 4 ఫోర్లు, ఓ సిక్సర్‌తో 47 పరుగులు చేసి టాప్ స్కోరర్‌గా నిలిచాడు. ఇబ్రహీం జాద్రాన్ 25 బంతుల్లో 3 ఫోర్లు, ఓ సిక్సర్‌తో 22 పరుగులు చేయగా రెహ్మత్ షా 18, ఆఫ్ఘాన్ కెప్టెన్ హస్మతుల్లా షాహిదీ 18, నజీబుల్లా జాద్రాన్ 5, మహ్మద్ నబీ 6 పరుగులు చేశారు.

అజ్మతుల్లా ఓమర్జాయ్ 22 పరుగులు చేయగా రషీద్ ఖాన్ 9, ముజీబ్ వుర్ రహీం 1 పరుగు చేయగా నవీన్ ఉల్ హక్ 6 బంతులు ఆడి డకౌట్ అయ్యాడు. బంగ్లా బౌలర్లలో షకీబ్ అల్ హసన్, మెహిదీ హసన్ మిరాజ్ మూడేసి వికెట్లు తీయగా షోరిఫుల్ ఇస్లాం 2 వికెట్లు తీశారు. టస్కిన్ అహ్మద్, ముస్తాఫిజుర్ రెహ్మాన్‌లకు చెరో వికెట్ దక్కింది..

ఈ లక్ష్యాన్ని 34.4 ఓవర్లలో 4 వికెట్లు కోల్పోయి ఛేదించింది బంగ్లాదేశ్. తంజీద్ హసన్ 5 పరుగులు చేసి రనౌట్ అయ్యాడు. లిటన్ దాస్ 13 పరుగులు చేశాడు. 27 పరుగులకే 2 వికెట్లు కోల్పోయింది బంగ్లాదేశ్. అయితే మెహిదీ హసన్ మిరాజ్, నజ్ముల్ హుస్సేన్ షాంటో కలిసి మూడో వికెట్‌కి 97 పరుగుల భాగస్వామ్యం నెలకొల్పారు..

73 బంతుల్లో 5 ఫోర్లతో 57 పరుగులు చేసిన మెహిదీ హసన్ మిరాజ్, నవీన్ ఉల్ హక్ బౌలింగ్‌లో అవుట్ అయ్యాడు. కెప్టెన్ షకీబ్ అల్ హసన్ 19 బంతుల్లో 2 ఫోర్లతో 14 పరుగులు చేసి అవుట్ అయ్యాడు. 83 బంతుల్లో 3 ఫోర్లు, ఓ సిక్సర్‌తో 59 పరుగులు చేసిన నజ్ముల్ హుస్సేన్ షాంటో.. బౌండరీ బాది మ్యాచ్‌ని ముగించాడు..

బంగ్లాదేశ్, తన తర్వాతి మ్యాచ్ అక్టోబర్ 10న ఇంగ్లాండ్‌తో ఆడుతుంది. ఆఫ్ఘాన్ తన తర్వాతి మ్యాచ్‌ని అక్టోబర్ 11న టీమిండియాతో ఆడుతుంది.. 

మరిన్ని ఇంట్రెస్టింగ్ అప్ డేట్స్ కోసం క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి

• ICC World cup 2023