Asia Cup 2023: తిరిగి ప్రారంభమైన ఆట...టీమిండియా ఆలౌట్! శ్రీలంక ముందు ఈజీ టార్గెట్...

ఆసియా కప్ సూపర్ 4 రౌండ్‌లో శ్రీలంకతో జరుగుతున్న మ్యాచ్‌లో టీమిండియా 213 పరుగులకి ఆలౌట్ అయ్యింది. పాక్‌ బౌలర్లను ఆటాడుకున్న భారత బ్యాటర్లు, శ్రీలంక స్పిన్ మంత్రానికి తేలిపోయారు. 20 ఏళ్ల యంగ్ స్పిన్నర్ దునిత్ వెల్లలాగే 5 వికెట్లు తీసి, టీమిండియా టాపార్డర్‌ని కకావికలం చేశాడు. 

టాస్ గెలిచి బ్యాటింగ్ ఎంచుకున్న టీమిండియా, 49.1 ఓవర్లలో 213 పరుగులకి ఆలౌట్ అయ్యింది.  11 ఓవర్లు ముగిసే సమయానికి 80/0 పరుగులతో భారీ స్కోరు చేసేలా కనిపించిన భారత జట్టు, 133 పరుగుల తేడాతో 10 వికెట్లను కోల్పోయింది.

25 బంతుల్లో 2 ఫోర్లతో 19 పరుగులు చేసిన శుబ్‌మన్ గిల్‌ని దునిత్ వెల్లలాగే క్లీన్ బౌల్డ్ చేశాడు. 12 బంతుల్లో 3 పరుగులు చేసిన విరాట్ కోహ్లీ కూడా దునిత్ బౌలింగ్‌లోనే అవుట్ అయ్యాడు. వరుసగా మూడో హాఫ్ సెంచరీ బాదిన రోహిత్ శర్మ, వన్డేల్లో 10 వేల పరుగుల మైలురాయిని కూడా పూర్తి చేసుకున్నాడు..

48 బంతుల్లో 7 ఫోర్లు, 2 సిక్సర్లతో 53 పరుగులు చేసిన రోహిత్ శర్మను ఓ సూపర్ బంతితో బోల్తా కొట్టించాడు దునిత్ వెల్లలాగే. 11 పరుగుల తేడాతో 3 వికెట్లు కోల్పోయి 91/3 స్థితికి చేరుకుంది భారత జట్టు..

కెఎల్ రాహుల్, ఇషాన్ కిషన్ కలిసి నాలుగో వికెట్‌కి 63 పరుగుల భాగస్వామ్యం జోడించారు. 44 బంతుల్లో 2 ఫోర్లతో 39 పరుగులు చేసిన కెఎల్ రాహుల్, దునిత్ వెల్లలాగే బౌలింగ్‌లో అతనికే క్యాచ్ ఇచ్చి అవుట్ అయ్యాడు..

61 బంతుల్లో ఓ ఫోర్, ఓ సిక్సర్‌తో 33 పరుగులు చేసిన ఇషాన్ కిషన్, అసలంక బౌలింగ్‌లో దునిత్ వెల్లలాగేకి క్యాచ్ ఇచ్చి అవుట్ అయ్యాడు..

18 బంతులాడి 5 పరుగులు చేసిన హార్ధిక్ పాండ్యా, దునిత్ వెల్లలాగే వేసిన 10వ ఓవర్ ఆఖరి బంతికి అవుట్ అయ్యాడు. అంపైర్ నాటౌట్‌గా ప్రకటించినా డీఆర్‌ఎస్ తీసుకున్న శ్రీలంకకు అనుకూలంగా ఫలితం దక్కింది.

10 ఓవర్లలో ఓ మెయిడిన్‌తో 40 పరుగులిచ్చి 5 వికెట్లు తీసిన దునిత్ వెల్లలాగే, కెరీర్ బెస్ట్ గణాంకాలు నమోదు చేశాడు. 19 బంతులు ఆడి 4 పరుగులు చేసిన రవీంద్ర జడేజా, చరిత్ అసలంక బౌలింగ్‌లో కుసాల్ మెండిస్‌కి క్యాచ్ ఇచ్చి అవుట్ అయ్యాడు..

178 పరుగులకే 7 వికెట్లు కోల్పోయింది టీమిండియా. 12 బంతుల్లో 5 పరుగులు చేసిన జస్ప్రిత్ బుమ్రా, అసలంక బౌలింగ్‌లో క్లీన్ బౌల్డ్ అయ్యాడు. ఆ తర్వాతి బంతికి కుల్దీప్ యాదవ్ గోల్డెన్ డకౌట్ అయ్యాడు..

47 ఓవర్లు ముగిశాక వర్షం వల్ల మ్యాచ్‌కి అంతరాయం ఏర్పడింది. తిరిగి ప్రారంభమైన తర్వాత మహీశ్ తీక్షణ బౌలింగ్‌లో సిక్సర్ బాదిన అక్షర్ పటేల్, టీమిండియా స్కోరుని 200+ మార్కు దాటించాడు. 36 బంతుల్లో ఓ ఫోర్‌తో 26 పరుగులు చేసిన అక్షర్ పటేల్, తీక్షణ బౌలింగ్‌లో సమరవిక్రమకి క్యాచ్ ఇచ్చి అవుట్ అయ్యాడు. 19 బంతులాడి 5 పరుగులు చేసిన మహ్మద్ సిరాజ్.. నాటౌట్‌గా నిలిచాడు. చివరి వికెట్‌కి అక్షర్ పటేల్, సిరాజ్ కలిసి 27 పరుగులు జోడించారు. 

మరిన్ని ఇంట్రెస్టింగ్ అప్ డేట్స్ కోసం క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి

• Asia Cup 2023
• India vs Sri Lanka