Asia Cup 2023 India vs Nepal: 48.2 ఓవర్లు బ్యాటింగ్ చేసి 230 పరుగులకి ఆలౌట్ అయిన నేపాల్.. మూడేసి వికెట్లు తీసిన మహ్మద్ సిరాజ్, రవీంద్ర జడేజా.. 

Asia Cup 2023 India vs Nepal: ఆసియా కప్ 2023 టోర్నీలో మొట్టమొదటిసారి ఆడుతున్న జట్టు నేపాల్. పాకిస్తాన్‌తో మ్యాచ్‌లో 104 పరుగులకే ఆలౌట్ అయిన నేపాల్ జట్టు, టీమిండియాతో మ్యాచ్‌లో ఏకంగా 48.2 ఓవర్లు బ్యాటింగ్ చేసింది. మహ్మద్ సిరాజ్, మహ్మద్ షమీ, శార్దూల్ ఠాకూర్, రవీంద్ర జడేజా, కుల్దీప్ యాదవ్, హార్ధిక్ పాండ్యా వంటి టాప్ క్లాస్ బౌలర్లు ఉన్నా.. పసికూన జట్టును స్వల్ప స్కోరుకి పరిమితం చేయలేకపోయారు. 

ఫీల్డింగ్ తప్పిదాలు, క్యాచ్ డ్రాప్‌లు.. టీమిండియా నుంచి అభిమానులు ఏం చూడకూడదని కోరుకుంటారో అవన్నీ నేపాల్‌తో మ్యాచ్‌లో కనిపించాయి. ఏకంగా 3 క్యాచులను డ్రాప్ చేసిన భారత ఫీల్డర్లు, పేలవ ఫీల్డింగ్‌తో నేపాల్‌ 230+ మార్కు దాటడానికి కారణమయ్యారు. 

టాస్ ఓడి తొలుత బ్యాటింగ్ చేసిన నేపాల్, 48.2 ఓవర్లు బ్యాటింగ్ చేసి 230 పరుగులకి ఆలౌట్ అయ్యింది.. మొదటి 5 ఓవర్లలో టీమిండియా ఫీల్డర్లు 3 క్యాచులను డ్రాప్ చేశారు. దీన్ని వాడుకున్న నేపాల్ ఓపెనర్లు 9.5 ఓవర్లలో తొలి వికెట్‌కి 65 పరుగుల భాగస్వామ్యం జోడించారు..

25 బంతుల్లో 3 ఫోర్లు, 2 సిక్సర్లతో 38 పరుగులు చేసిన కుశాల్ బుర్టెల్, శార్దూల్ ఠాకూర్ బౌలింగ్‌లో ఇషాన్ కిషన్‌కి క్యాచ్ ఇచ్చి అవుట్ అయ్యాడు. 17 బంతుల్లో 7 పరుగులు చేసిన భీం శక్తిని రవీంద్ర జడేజా క్లీన్ బౌల్డ్ చేశాడు. 8 బంతుల్లో 5 పరుగులు చేసిన నేపాల్ కెప్టెన్ రోహిత్ పాడెల్‌ కూడా జడ్డూ బౌలింగ్‌లో రోహిత్‌కి క్యాచ్ ఇచ్చి అవుట్ అయ్యాడు..

5 బంతుల్లో 2 పరుగులు చేసిన కుశాల్ మల్ల, జడ్డూ బౌలింగ్‌లో సిరాజ్‌కి క్యాచ్ ఇచ్చి పెవిలియన్ చేరాడు. వెంటవెంటనే 3 వికెట్లు కోల్పోయింది నేపాల్. 65/0 స్థితిలో ఉన్న నేపాల్, 101/4 స్థితికి చేరుకుంది. ఓ వైపు వికెట్లు పడుతున్నా మరో ఎండ్‌లో కుదురుకుపోయిన ఓపెనర్ ఆసిఫ్ షేక్ 97 బంతుల్లో 8 ఫోర్లతో 58 పరుగులు చేసి హాఫ్ సెంచరీ అందుకున్నాడు..

హాఫ్ సెంచరీ తర్వాత సిరాజ్ బౌలింగ్‌‌లో విరాట్ కోహ్లీకి క్యాచ్ ఇచ్చి అవుట్ అయ్యాడు ఆసిఫ్ షేక్. 35 బంతుల్లో 3 ఫోర్లతో 23 పరుగులు చేసిన గుల్షాన్ జా కూడా మహ్మద్ సిరాజ్ బౌలింగ్‌లోనే ఇషాన్ కిషన్‌ పట్టిన క్యాచ్‌కి పెవిలియన్ చేరాడు.

144 పరుగుల వద్ద ఆరో వికెట్ కోల్పోయింది నేపాల్. 37.5 ఓవర్లలో 6 వికెట్లు కోల్పోయి 178 పరుగులు చేసిన సమయంలో వర్షం కారణంగా కాసేపు ఆటకు అంతరాయం కలిగింది. మ్యాచ్ తిరిగి ప్రారంభమైన తర్వాత దీపేంద్ర సింగ్‌ని హార్ధిక్ పాండ్యా ఎల్బీడబ్ల్యూగా అవుట్ చేశాడు.

25 బంతుల్లో 3 ఫోర్లతో 29 పరుగులు చేసిన దీపేంద్ర సింగ్, డీఆర్‌ఎస్ తీసుకున్నా ఫలితం లేకపోయింది. 56 బంతుల్లో ఓ ఫోర్, 2 సిక్సర్లతో 48 పరుగులు చేసిన సోమ్‌పాల్ కమి, మహ్మద్ షమీ బౌలింగ్‌లో ఇషాన్ కిషన్‌కి క్యాచ్ ఇచ్చి అవుట్ అయ్యాడు..

అదే ఓవర్‌లో 17 బంతుల్లో 9 పరుగులు చేసిన సందీప్ లామిచానే రనౌట్ అయ్యాడు. రాజ్‌భన్సీని సిరాజ్ బౌల్డ్ చేయడంతో నేపాల్ ఇన్నింగ్స్‌కి తెరపడింది.