Asia Cup 2023: బంగ్లా చేతిలో పోరాడి ఓడిన టీమిండియా... శుబ్‌మన్ గిల్ వీరోచిత సెంచరీ చేసినా..
India vs Bangladesh: 49.5 ఓవర్లలో 259 పరుగులకి ఆలౌట్ అయిన టీమిండియా.. 6 పరుగుల తేడాతో థ్రిల్లింగ్ విక్టరీ అందుకున్న బంగ్లాదేశ్.. శుబ్‌మన్ గిల్ సెంచరీతో పోరాడినా దక్కని ఫలితం..
ఆసియా కప్ 2023 టోర్నీలో టీమిండియా తొలి పరాజయాన్ని అందుకుంది. పాకిస్తాన్, శ్రీలంక చేతుల్లో చిత్తుగా ఓడిన బంగ్లాదేశ్, భారత జట్టుపై 6 పరుగుల తేడాతో ఉత్కంఠ విజయం అందుకుంది. నామమాత్రపు మ్యాచ్‌లో 5 మార్పులతో బరిలో దిగిన భారత జట్టు, ఆఖరి ఓవర్ దాకా పోరాడినా విజయాన్ని అందుకోలేకపోయింది.
ఆసియా కప్‌లో భారత్‌పై బంగ్లాదేశ్‌కి 11 ఏళ్ల తర్వాత వచ్చిన తొలి విజయం ఇదే. రోహిత్ శర్మ కెప్టెన్సీలో వన్డే ఆసియా కప్‌లో టీమిండియా ఎదుర్కొన్న మొదటి ఓటమి కూడా ఇదే. 266 పరుగుల లక్ష్యఛేదనలో టీమిండియా 49.5 ఓవర్లలో 259 పరుగులకి ఆలౌట్ అయ్యింది.
లక్ష్యఛేదనలో టీమిండియాకి శుభారంభం దక్కలేదు. కెప్టెన్ రోహిత్ శర్మ, ఇన్నింగ్స్ రెండో బంతికి డకౌట్ అయ్యాడు. వరుసగా మూడు మ్యాచుల్లో హాఫ్ సెంచరీలు చేసి, జోరు మీదున్న టీమిండియా కెప్టెన్ రోహిత్ శర్మ, కొత్త కుర్రాడు తంజీమ్ హసన్ షేక్ బౌలింగ్‌లో అనమోల్ హక్‌కి క్యాచ్ ఇచ్చి పెవిలియన్ చేరాడు..
విరాట్ కోహ్లీ స్థానంలో తుది జట్టులో చోటు దక్కించుకున్న తెలుగుకుర్రాడు తిలక్ వర్మ, ఆరంగ్రేటం వన్డేలో ఆకట్టుకోలేకపోయాడు. 9 బంతుల్లో ఓ ఫోర్‌తో 5 పరుగులు చేసిన తిలక్ వర్మ, తంజీమ్ హసన్ బౌలింగ్‌లో బౌల్డ్ అయ్యాడు..
17 పరుగులకే 2 వికెట్లు కోల్పోయింది భారత జట్టు. ఈ దశలో శుబ్‌మన్ గిల్, కెఎల్ రాహుల్ కలిసి మూడో వికెట్‌కి 57 పరుగులు జోడించారు. 39 బంతుల్లో 2 ఫోర్లతో 19 పరుగులు చేసిన కెఎల్ రాహుల్, మహెదీ హసన్ బౌలింగ్‌లో అవుట్ అయ్యాడు..
ఇషాన్ కిషన్ 15 బంతుల్లో 5 పరుగులు చేసిన మెహిదీ హసన్ మిరాజ్ బౌలింగ్‌లో ఎల్బీడబ్ల్యూగా అవుట్ అయ్యాడు.. వన్డేల్లో అట్టర్ ఫ్లాప్ అవుతూ వస్తున్న సూర్యకుమార్ యాదవ్, నేటి మ్యాచ్‌లోనూ పెద్దగా ఆకట్టుకోలేకపోయాడు. 34 బంతుల్లో 3 ఫోర్లతో 26 పరుగులు చేసిన సూర్యకుమార్ యాదవ్, షకీబ్ అల్ హసన్ బౌలింగ్‌లో క్లీన్ బౌల్డ్ అయ్యాడు.. 12 బంతుల్లో 7 పరుగులు చేసిన రవీంద్ర జడేజా, ముస్తాఫిజుర్ రెహ్మాన్ బౌలింగ్‌లో క్లీన్ బౌల్డ్ అయ్యాడు..
170 పరుగుల వద్ద ఆరో వికెట్ కోల్పోయింది టీమిండియా. శుబ్‌మన్ గిల్ మాత్రం ఒంటరి పోరాటం చేస్తూ స్కోరు బోర్డును కదిలిస్తున్నాడు. 2023 ఏడాదిలో శుబ్‌మన్ గిల్‌కి ఇది నాలుగో వన్డే సెంచరీ. 2023 ఏడాదిలో 1500 అంతర్జాతీయ పరుగులు పూర్తి చేసుకున్న శుబ్‌మన్ గిల్, వన్డేల్లో 1000 పరుగులు అందుకున్నాడు.
2019 తర్వాత వన్డే ఫార్మాట్‌లో 1000 పరుగులు చేసిన మొట్టమొదటి బ్యాటర్‌గా నిలిచాడు శుబ్‌మన్ గిల్. గత మూడేళ్లలో ఏ బ్యాటర్ కూడా వన్డే ఫార్మాట్‌లో వెయ్యి పరుగులు చేయలేకపోయారు. 117 బంతుల్లో 6 ఫోర్లు, 4 సిక్సర్లతో సెంచరీ అందుకున్నాడు శుబ్‌మన్ గిల్. 32వ వన్డే ఆడుతున్న శుబ్‌మన్ గిల్‌కి ఇది ఐదో సెంచరీ..
133 బంతుల్లో 8 ఫోర్లు, 5 సిక్సర్లతో 121 పరుగులు చేసిన శుబ్‌మన్ గిల్, స్కోరు వేగం పెంచేందుకు ప్రయత్నించి అవుట్ అయ్యాడు. మహెదీ హసన్ బౌలింగ్‌లో భారీ షాట్‌కి ప్రయత్నించిన శుబ్‌మన్ గిల్, తోహిద్ హృదయ్‌కి క్యాచ్ ఇచ్చి అవుట్ అయ్యాడు..
గిల్ అవుట్ అయ్యే సమయానికి టీమిండియా విజయానికి 38 బంతుల్లో 57 పరుగులు కావాలి.. బంగ్లా బౌలర్లు కట్టుదిట్టంగా బౌలింగ్ చేయడంతో భారీ షాట్లు ఆడడానికి అక్షర్ పటేల్, శార్దూల్ ఠాకూర్ ఇబ్బంది పడ్డారు. మహెదీ హసన్ వేసిన 48వ ఓవర్ ఆఖరి రెండు బంతుల్లో 4, 6 బాదిన అక్షర్ పటేల్, 14 పరుగులు రాబట్టాడు..
భారత జట్టు విజయానికి ఆఖరి 2 ఓవర్లలో 17 పరుగులు కావాల్సి వచ్చాయి. ముస్తాఫిజుర్ రెహ్మాన్ వేసిన 49వ ఓవర్ తొలి బంతికి శార్దూల్ ఠాకూర్ అవుట్ అయ్యాడు. షమీ తొలి బంతికి సింగిల్ తీసి అక్షర్ పటేల్‌కి స్ట్రైయిక్ ఇచ్చాడు. ఫోర్ బాదిన అక్షర్ పటేల్, ఆ తర్వాతి బంతికి భారీ షాట్‌కి ప్రయత్నించి అవుట్ అయ్యాడు..
34 బంతుల్లో 3 ఫోర్లు, 2 సిక్సర్లతో 42 పరుగులు చేసిన అక్షర్ పటేల్ అవుట్ అయ్యేసరికి టీమిండియా విజయానికి 8 బంతుల్లో 12 పరుగులు కావాలి. ప్రసిద్ధ్ కృష్ట తొలి రెండు బంతుల్లో పరుగులు రాబట్టలేకపోయాడు. చివరి ఓవర్‌లో 12 పరుగులు అవసరం అయ్యాయి.
మహ్మద్ షమీ, ఆఖరి 3 బంతుల్లో పరుగులేమీ రాబట్టలేకపోయాడు. నాలుగో బంతికి షమీ ఫోర్ రాబట్టడంతో చివరి 2 బంతుల్లో 8 పరుగులు అవసరమయ్యాయి. ఆ తర్వాతి బంతికి రెండో పరుగుకి ప్రయత్నించిన మహ్మద్ షమీ రనౌట్ కావడంతో భారత ఇన్నింగ్స్ 259 పరుగుల వద్ద ముగిసింది.
