భారతదేశంలో అతి పెద్ద ప్రభుత్వ రంగ బ్యాంకు స్టేట్ బ్యాంక్ ఆఫ్ ఇండియా. ఇది తన మార్జినల్ కాస్ట్ ఆఫ్ లెండింగ్ రేటు (MCLR)ను పెంచినట్లు బ్యాంకు ఓ నోటిఫికేషన్లో పేర్కొంది. మార్జినల్ కాస్ట్ ఆఫ్ లెండింగ్ రేటు (MCLR)ను ఎస్బీఐ 10 బేసిస్ పాయింట్లు (bps) పెంచింది.  

సబ్బుల దగ్గరి నుంచి పెట్రోల్, ఎల్‌పీజీ గ్యాస్ సిలిండర్ వరకు మార్కెట్‌లో చాలా వాటి రేట్లు పెరిగిపోయాయి. దీని వల్ల ఇప్పటికే ప్రజలపై చాలా ప్రభావం పడుతోంది. ఇలాంటి ప్రతికూల పరిస్థితుల్లో బ్యాంకులు కూడా ఇప్పుడు కస్టమర్లకు చుక్కలు చూపించేందుకు రెడీ అవుతున్నాయి. దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా SBI తాజాగా కీలక నిర్ణయం తీసుకుంది. రుణ రేట్లు పెంచుతున్నట్లు వెల్లడించింది. దీని వల్ల బ్యాంక్ నుంచి లోన్ తీసుకున్న వారికి, అలాగే కొత్తగా రుణం పొందాలని భావించే వారిపై ప్రతికూల ప్రభావం పడనుంది. ఎస్‌బీఐ ఇప్పుడు మార్జినల్ కాస్ట్ ఆఫ్ లెండింగ్ రేటు MCLR (ఎంసీఎల్ఆర్) పెంచేసింది. అన్ని కాల పరిమితిలోని రుణాలకు ఈ పెంపు వర్తిస్తుంది. ఏప్రిల్ 15 నుంచే రేట్ల పెంపు అమలులోకి వచ్చింది. దీని వల్ల హోమ్ లోన్, కార్ లోన్ వంటి వాటిపై ఈఎంఐ భారం పెరగనుంది. దీంతో అంతిమంగా రుణ గ్రహీతలపై ఎఫెక్ట్ పడబోతోంది.

ఏప్రిల్ 15 నుంచి అమల్లోకి వచ్చిన MCLR వివరాలు 

- ఒక నెల: ప్రస్తుత రేటు - 6.65 శాతం.. కొత్త రేటు - 6.75 శాతం 

- మూడు నెలలు: ప్రస్తుత రేటు - 6.65 శాతం.. కొత్త రేటు - 6.75 శాతం

- ఆరు నెలలు: ప్రస్తుత రేటు - 6.95 శాతం.. కొత్త రేటు 7.05 శాతం

- ఒక సంవత్సరం: ప్రస్తుత రేటు - 7.00 శాతం.. కొత్త రేటు 7.10 శాతం 

- రెండు సంవత్సరాలు: ప్రస్తుత రేటు - 7.20 శాతం.. కొత్త రేటు 7.30 శాతం

- మూడు సంవత్సరాలు: ప్రస్తుత రేటు - 7.30 శాతం.. కొత్త రేటు 7.40 శాతం

ఇటీవల MCLRని పెంచిన ఏకైక బ్యాంక్ SBI మాత్రమే కాదని కూడా గమనించాలి. మరో ప్రభుత్వ రంగ రుణదాత బ్యాంక్ ఆఫ్ బరోడా కూడా తన మార్జినల్ కాస్ట్ ఆఫ్ లెండింగ్ రేటును పెంచుతున్నట్లు ప్రకటించింది. టేనర్‌లలో 5 bps ద్వారా.. బెంచ్‌మార్క్ వన్-ఇయర్ టేనర్ MLCR ఇప్పుడు ఏప్రిల్ 12, 2022 నుంచి అమలులోకి వచ్చేలా 7.35 శాతంగా నిర్ణయించబడింది. "ఏప్రిల్ 12, 2022 నుండి అమల్లోకి వచ్చే మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేట్ (MCLR) సమీక్షను బ్యాంక్ ఆమోదించింది", BoB రెగ్యులేటరీ ఫైలింగ్‌లో పేర్కొంది.

కాగా రిజర్వు బ్యాంక్ ఆఫ్ ఇండియా RBI (ఆర్‌బీఐ) ఇటీవల పాలసీ సమీక్షలో కీలక వడ్డీ రేట్లను యథాతథంగానే కొనసాగించిన విషయం తెలిసిందే. అయితే బ్యాంకులు మాత్రం ఇప్పుడు రుణ రేట్లు పెంచుకుంటూ వెళ్తున్నాయి. రుణ రేట్లు పెరిగితే లోన్స్‌పై వడ్డీ రేటు పెరుగుతుంది. దీంతో కొత్తగా లోన్ తీసుకునే వారికి గతంలో కన్నా ఎక్కువ వడ్డీ పడుతుంది. అలాగే ఇప్పటికే లోన్ తీసుకొని ఉంటే.. వారిపై ఈఎంఐ భారం పెరుగుతుంది. అందువల్ల ప్రజలపై ప్రభావం పడొచ్చు.

MCLR అంటే ఏమిటి..? 

MCLR లేదా మార్జినల్ కాస్ట్ ఆఫ్ లెండింగ్ రేటు అనేది బెంచ్‌మార్క్ వడ్డీ రేటు, ఇది బ్యాంకులు తమ కస్టమర్‌లకు రుణాలు ఇవ్వడానికి అనుమతించే కనీస వడ్డీ రేటు. కస్టమర్లకు ఫ్లోటింగ్ రేట్ లోన్‌ల ధరను నిర్ధారించడానికి RBI 2016లో దీనిని ప్రవేశపెట్టింది.