నాలుగు రోజుల్లో రిలయన్స్ రూ.1.20 లక్షల కోట్లు గోవిందా

గత నాలుగు రోజుల్లో రిలయన్స్ మార్కెట్ క్యాపిటలైజేషన్  రూ.1,20,311.78 కోట్లు కోల్పోయింది. మిగతా టాప్ బ్లూ చిప్ కంపెనీలతో కలిపి మొత్తం రూ.19.49 లక్షల కోట్ల మదుపర్ల సంపద ఆవిరైంది.

ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯಲ್ಲಿ ಹೆಚ್ಚು ಪ್ರಯಾಣ ಮಾಡುವ ಸಾಧ್ಯತೆ ಬರದಿರಲಿ ಎಂಬ ಕಾರಣದಿಂದ ಹೀಗೆ ಮಾಡಲಾಗಿದೆ. ಇನ್ನು ರಿಲಯನ್ಸ್ ಕಚೇರಿಗಳಲ್ಲಿ ಕಾರ್ಯ ನಿರ್ವಹಿಸುವವರ ಪೈಕಿ ಶೇ. 14ರಷ್ಟು ಮಹಿಳಾ ಉದ್ಯೋಗಿಗಳೇ ಇದ್ದಾರೆ.

ముంబై: కరోనా వైరస్ (కోవిడ్‌-19) భయాలతో దలాల్‌ స్ట్రీట్‌ గజగజ వణుకుతోంది. ప్రపంచ మార్కెట్లతోపాటు, దేశీయ స్టాక్‌మార్కెట్లను అతలాకుతలం చేస్తోంది. దీంతో ఈ వారంలోనూ కీలక సూచీలు తీవ్ర నష్టాలను మూటగట్టుకున్నాయి. వరుస నష్టాలతో లక్షల కోట్ల ఇన్వెస్టర్ల సంపద తుడిచిపెట్టుకు పోయింది. 

ముఖ్యంగా ఈ వారంలో నాలుగు రోజుల్లో రూ.19.49 లక్షల కోట్ల విలువైన పెట్టుబడిదారుల సంపద ఆవిరైంది. ఇప్పుడు బీఎస్ఈలో నమోదైన కంపెనీల మార్కెట్‌ విలువ రూ.1,09,76,781 కోట్లకు దిగజారి పోయింది. నాలుగు రోజుల్లో సెన్సెక్స్‌ 5,815.25 పాయింట్లు నష్టపోయింది. 

ఇన్వెస్టర్లలోని బలహీన సెంటిమెంట్‌తో గురువారం ప్రారంభంలోనే బీఎస్ఈ సెన్సెక్స్‌ భారీగా నష్టపోయింది. అంతర్గత ట్రేడింగ్‌లో 2,155.05 పాయింట్ల నష్టాన్ని మూటగట్టుకుంది. మధ్యాహ్నం రెండు గంటల సమయంలో సెన్సెక్స్‌ లాభాల బాట పట్టింది. ఇది ఒక అరగంట పాటు సాగింది. 

తర్వాత మళ్లీ నష్టాలు మొదలయ్యాయి. చివరకు సెన్సెక్స్‌ 581.28 పాయింట్ల నష్టంతో 28,288.23 పాయింట్ల వద్ద ముగిసింది. ఎన్‌ఎస్ఈ నిఫ్టీ 205.35 పాయింట్లు కోల్పోయి 8,263.45 పాయింట్ల వద్ద క్లోజైంది. 

‘‘ప్రపంచ మార్కెట్లు ప్రతికూలంగా ట్రేడవుతున్నాయి. కరోనా వైరస్‌ ప్రభావం ఆర్థిక వ్యవస్థలపై తీవ్రంగా ఉంటుందన్న భయాలతో మార్కెట్లలో అధిక హెచ్చుతగ్గులు నమోదవుతున్నాయి’’ అని ఆనంద్‌ రాఠీ షేర్స్‌ అండ్‌ స్టాక్‌ బ్రోకర్స్‌ ఈక్విటీ ఫండమెంటల్ రీసెర్చ్‌ హెడ్‌ నరేంద్ర సోలంకి తెలిపారు. 

‘‘గురువారం నాటి ట్రేడింగ్‌ దేశీయ స్టాక్‌ మార్కెట్‌ సూచీలకు రోలర్‌ కోస్టర్‌ రైడ్‌గా మారింది. భారీ స్థాయిలో హెచ్చుతగ్గులను చవిచూసిన సూచీలు చివరకు రెండు శాతానికి పైగా నష్టాలతో ముగిశాయి. ప్రపంచవ్యాప్తంగా బలహీన సెంటిమెంట్‌ ఆవహించటం, విదేశీ నిధులు తరలిపోవడం వంటివి మార్కెట్లను ప్రభావితం చేశాయి’’ అని రెలిగేర్‌ బ్రోకింగ్‌ రీసెర్చ్‌ వైస్‌ ప్రెసిడెంట్‌ అజిత్‌ మిశ్రా అన్నారు. 

వీటితో పాటు దేశీయంగా కరోనా కేసులు పెరగడం మార్కెట్లలో నిరాశావాదం పెరిగిపోవడానికి కారణమైనట్టు తెలిపారు. సెన్సెక్స్‌లోని 30 కంపెనీల షేర్లలో 22 షేర్లు నష్టాలతో ముగిశాయి. 

బజాజ్‌ ఫైనాన్స్‌ (10.24 శాతం), మారుతీ సుజుకీ ఇండియా (9.85 శాతం), యాక్సిస్‌ బ్యాంక్‌ (9.50 శాతం), ఎం అండ్‌ ఎం (9.28 శాతం), టెక్‌ మహీంద్రా (8.43 శాతం), ఓఎన్‌జీసీ షేర్లు (7.35 శాతం) నష్టపోయాయి. ఐటీసీ, భారతీ ఎయిర్‌టెల్‌, కోటక్‌ మహీంద్రా, హీరో మోటోకార్ప్‌ షేర్లు 7.50 శాతం వరకు పెరిగాయి. 

యెస్‌ బ్యాంక్‌ షేరు 11.35 శాతం తగ్గి రూ.53.90 వద్ద ముగిసింది. బీఎస్ఈ మెటల్‌, క్యాపిటల్‌ గూడ్స్‌, ఆటో, ఎనర్జీ, ఇండస్ర్టియల్స్‌ సూచీలు 7.17 శాతం వరకు తగ్గాయి. టెలికాం సూచీ మాత్రం పెరిగింది. బీఎస్ఈ మిడ్‌క్యాప్‌, స్మాల్‌ క్యాప్‌ సూచీలు వరుసగా 3.70 శాతం, 4.53 శాతం క్షీణించాయి. 

బీఎస్ఈలో 1,828 షేర్లు నష్టాలతో, 574 షేర్లు లాభాలతో, 146 షేర్లు యథాతథంగా ముగిశాయి. 1,200కు పైగా కంపెనీల షేర్లు ఏడాది కనిష్ఠ స్థాయిని తాకాయి. ఆసియా మార్కెట్ల విషయానికి వస్తే దక్షిణ కొరియాకు చెందిన కోస్పీ సూచీ 8 శాతం క్షీణించింది. 

హాంకాంగ్‌కు చెందిన హాంగ్‌సెంగ్‌, నిక్కీ, షాంఘై కంపోజిటివ్‌ సూచీలు కూడా నష్టాల్లోనే ముగిశాయి. యూరోపియన్‌ సెంట్రల్‌ బ్యాంక్‌ (ఈసీబీ) ఆశ్చర్యకరంగా 75,000 కోట్ల యూరోల ఉద్దీపన ప్యాకేజీ ప్రకటించడంతో యూరప్‌ మార్కెట్లు లాభాలతో ప్రారంభమయ్యాయి. 

రూపాయి విలువ మరింతగా క్షీణించింది. గురువారం డాలర్‌ మారకంలో రూపాయి 86 పైసలు తగ్గి సరికొత్త రికార్డు కనిష్ఠ స్థాయి 75.12కు చేరుకుంది. కరోనా వైరస్‌ వ్యాప్తితో ఆర్థిక మాంద్యం ఏర్పడుతుందన్న భయాలు ఇన్వెస్టర్లను వెంటాడుతున్నాయి. ఈ నేపథ్యంలో రూపాయి విలువ క్షీణిస్తోంది. 

దేశీయ ఈక్విటీ, డెట్‌ మార్కెట్ల నుంచి విదేశీ నిధులు తరలిపోవడం కూడా రూపాయి విలువను ప్రభావితం చేస్తున్నట్టు మార్కెట్‌ విశ్లేషకులు చెబుతున్నారు. ఈ నెలలో ఇప్పటి వరకు విదేశీ ఇన్వెస్టర్లు 1,000 కోట్ల డాలర్ల విలువైన పెట్టుబడులను ఉపసంహరించుకున్నారు.

రిలయన్స్‌ ఇండస్ర్టీస్‌ షేర్లలోనూ నష్టాలు కొనసాగుతున్నాయి. వరుసగా నాలుగో రోజూ ఈ షేరు నష్టాన్నే నమోదు చేసుకుంది. గురువారం బీఎస్ఈలో రిలయన్స్ షేర్ 5.34 శాతం క్షీణించి రూ.917.10 వద్ద ముగిసింది. ఇంట్రాడేలో 8 శాతం నష్టంతో రూ.891 వద్ద 52 వారాల కనిష్ఠ స్థాయికి చేరింది. ఎన్‌ఎస్ఈలో 5.24 శాతం తగ్గి రూ.917.70 వద్ద క్లోజైంది. 

నాలుగు రోజుల్లో రిలయన్స్ షేర్ 17.14 శాతం క్షీణించింది. దీంతో మార్కెట్‌ విలువ రూ.1,20,311.78 కోట్లు తగ్గిపోయింది. ప్రస్తుతం ఆర్‌ఐఎల్‌ మార్కెట్‌ విలువ రూ.5,81,374.22 కోట్లుగా ఉంది. గత నవంబర్ నెలలో ఈ కంపెనీ మార్కెట్‌ విలువ రూ.10 లక్షల కోట్ల స్థాయికి ఎగబాకింది. కొన్ని నెలల్లో ఇది భారీగా క్షీణించింది.