తాడేపల్లిలో మైనర్ అందురాలి దారుణ హత్య... చంపిన దుర్మార్గుడు వీడే..

తాడేపల్లి : గత ఆదివారం రాత్రి గుంటూరు జిల్లా తాడేపల్లిలో అంధురాలైన మైనర్ బాలికను అతి దారుణంగా నరికిచంపి పరారైన నిందితున్ని పోలీసులు అదుపులోకి తీసుకున్నారు. అతడిని మీడియా ఎదుట ప్రవేశపెట్టిన బాపట్ల ఎస్పీ వకుల్ జిందాలు ఈ హత్యకు సంబంధించిన వివరాలను వెల్లడించారు. తాడేపల్లి ఎన్టీఆర్ కట్టపై అంద యువతి ఎస్తేరు రాణి, నిందితుడు కుక్కల రాజు కుటుంబాలు పక్కపక్కన ఇళ్లలోనే నివాసముంటున్నారని తెలిపారు. ఈ క్రమంలోనే గత ఆదివారం సాయంత్రం బాలిక ఇంటిబయట ఆడుకుంటుండగా మద్యంమత్తులో ఆమెవద్దకు వెళ్లిన రాజు భుజంపై చెయ్యేసి అసభ్యంగా ప్రవర్తించాడని... ఈ విషయాన్ని బాలిక తల్లికి తెలిపిందని అన్నారు. దీంతో బాలిక తల్లి రాజును నిలదీయగా కోపంతో రగిలిపోయిన రాజు రాత్రి 9.30 గంటల సమయంలో ఒంటరిగా వున్న అంధ యువతిపై కత్తితో దాడిచేసినట్లు తెలిపారు. తల, మెడపై నరకడంతో తీవ్ర గాయాలపాలైన యువతి విజయవాడ జిజిహెచ్ లో చికిత్స పొందుతూ సోమవారం తెల్లవారుజామున మృతిచెందింది. ముద్దాయిపై సామాజిక మాధ్యమాల్లో గంజాయి  సేవించినట్లు,రౌడీ షీట్ ఉన్నట్లు కథనాలు వస్తున్నాయని... ఇందులో నిజం లేదని ఎస్పీ జిందాల్ తెలిపారు.