నయీం బ్యాచ్ తోనే ప్రణయ్ ని చంపాలని చూశారు.. అమృత

తాను ప్రస్తుతం ఐదో నెల గర్భవతినని తెలిపిన అమృత.. అబార్షన్ చేయించుకోవాలని తన తండ్రి తనను ఎంతగా ఒత్తిడి చేశారో కూడా వివరించింది.

మిర్యాలగూడ పరువు హత్యలో మరిన్ని విషయాలు వెలుగులోకి వస్తున్నాయి. తన కళ్లెదుటే భర్తపై దాడి జరగడాన్ని చూసి షాక్ కి గురైన ప్రణయ్ భార్య అమృత.. ఈ రోజు ఉదయం కోలుకున్న సంగతి తెలిసిందే. ఆస్పత్రిలో ఉన్న ఆమెను ఈ రోజు మధ్యాహ్నం ఎస్పీ రంగనాథ్ కలిశారు. హత్యకు సంబంధించిన పూర్తి వివరాలను ఆమెను అడిగి తెలుసుకున్నారు.

కాగా.. ఈ హత్య వెనుక ఉన్న అసలు కారణాలను అమృత చెప్పే ప్రయత్నం చేసింది. తాను ప్రణయ్ ని పెళ్లి చేసుకోవడం తన తండ్రికి అసలు ఇష్టం లేదని స్పష్టం చేసింది. నయీం బ్యాచ్ తోనే ప్రణయ్ ని చంపించాలని తన తండ్రి ప్రయత్నాలు చేసినట్లు తెలిపింది. తాను ప్రస్తుతం ఐదో నెల గర్భవతినని తెలిపిన అమృత.. అబార్షన్ చేయించుకోవాలని తన తండ్రి తనను ఎంతగా ఒత్తిడి చేశారో కూడా వివరించింది.

తన తండ్రి ఎంత ఒత్తిడి చేసినా తాను అబార్షన్ చేయించుకోలేదని.. ఆ కక్షతోనే ప్రణయ్ ని హత్య చేశారని వాపోయింది. తాను అసలు హాస్పటల్ కి చెకప్ కోసం రాకపోయి ఉంటే తన భర్త బ్రతికే ఉండేవాడని ఆవేదన వ్యక్తం చేసింది. ప్రణయ్ చనిపోతే.. తాను పుట్టింటికి వస్తానని వాళ్లు భావించారని.. కానీ తాను తన అత్తారింట్లోనే ఉంటానని స్పష్టం చేసింది. 

ఈ వార్తాకథనాలు చదవండి