కోరిక తీరిస్తేనే ట్రాన్స్‌ఫర్.. అధికారులపై మహిళా హోంగార్డుల ఫిర్యాదు

#MeeToo ఉద్యమం దేశవ్యాప్తంగా ఉన్నత హోదాల్లో ఉన్నవారి నిజస్వరూపాన్ని బట్టబయలు చేస్తోంది. ఇప్పుడు ఈ శాఖ గుజరాత్ పోలీస్ శాఖను తాకింది. ట్రాన్స్‌ఫర్ చేయమని కోరినందుకు.. కోరిక తీర్చాలని వేధింపులకు గురిచేశారంటూ ఉన్నతాధికారులపై మహిళా హోంగార్డులు ఫిర్యాదు చేయడం రాష్ట్రంలో సంచలనం రేకెత్తించింది.

కోరుకున్న చోటికి బదిలీ కావాలంటే పై అధికారులు కోరికలు తీర్చమంటున్నారంటూ సూరత్‌కు చెందిన 25 మంది మహిళా హోంగార్డులు శుక్రవారం నగర పోలీస్ కమిషనర్‌కు ఫిర్యాదు చేశారు. కొద్ది రోజులుగా పై అధికారులు తమను మానసికంగా, లైంగికంగా వేధింపులకు గురిచేస్తున్నారని.. నాలుగు పేజీలతో కూడిన ఫిర్యాదులో పేర్కొన్నారు.

బదిలీ కావాలంటే డబ్బులివ్వాలని.. లేదంటే కోరిక తీర్చాలంటున్నారని ఆవేదన వ్యక్తం చేశారు. ఓ అధికారైతే యూనిఫామ్ సరిచేసుకోవాలని తాకరని చోట చేతులు వేస్తూ.. అసభ్యంగా ప్రవర్తించాడని ఆరోపించారు. వీరి ఫిర్యాదుపై స్పందించిన కమిషనర్.. ఈ ఫిర్యాదును డీసీపీకి పంపించామని.. జిల్లా స్థానిక ఫిర్యాదుల కమిటీ విచారణ ప్రారంభించిందని తెలిపారు.

హోంగార్డులు పోలీస్ శాఖ పరిధిలోకి రారని.. దీంతో పోలీసులు అంతర్గత కమిటీ కాకుండా స్థానిక ఫిర్యాదుల కమిటీ విచారణ జరుపుతుందన్నారు. అలాగే ఫిర్యాదును హోంమంత్రితో పాటు ముఖ్యమంత్రికి కూడా పంపినట్లు సీపీ తెలిపారు.