ఐఎన్ఎక్స్ మీడియా కేసు: చిదంబరం కేసు విచారిస్తున్న అధికారి బదిలీ

కాంగ్రెస్ సీనియర్ నేత, మాజీ కేంద్ర ఆర్ధిక మంత్రి పి.చిదంబరం నిందితుడిగా ఆరోపణలు ఎదుర్కొంటున్న ఐఎన్ఎక్స్ మీడియా కేసు కీలక మలుపు తిరిగింది. ఈ కేసును విచారిస్తున్న ఎన్‌ఫోర్స్‌మెంట్ అధికారి రాకేశ్ అహూజాపై బదిలీ వేటు పడింది.

ఆయనను ఢిల్లీ  పోలీస్ విభాగంలోకి బదిలీ  చేస్తూ ఆదేశాలు జారీ అయ్యాయి. ఐఎన్ఎక్స్ మీడియా కేసులో చిదంబరాన్ని సీబీఐ అధికారులు అరెస్ట్ చేసిన మరుసటి రోజే ఆయన బదిలీ కావడం కలకలం సృష్టించింది.

మరోవైపు ఈడీలో అహూజా పదవీకాలం మూడు వారాల క్రితమే ముగిసినట్లు అధికారులు తెలిపారు. కాగా.. ఐఎన్ఎక్స్ మీడియా సంస్ధ రూ.305 కోట్ల విదేశీ పెట్టుబడులు స్వీకరించేందుకు వీలుగా అనుమతులు ఇచ్చినందుకు గాను చిదంబరం కుమారుడు కార్తీ చిదంబరం పెద్ద ఎత్తున ముడుపులు తీసుకున్నట్లు ఆరోపణలు ఎదుర్కొంటున్నారు.

ఎఫ్ఐపీపీ  అనుమతుల  కోసం తాము 2007లో లంచం ఇచ్చినట్లు ఐఎన్ఎక్స్ మీడియా  వ్యవస్ధాపకులు పీటర్ ముఖర్జియా, ఇంద్రాణీ  ముఖర్జియా చెబుతున్నారు.

ఆ సమయంలో కేంద్ర హోంమంత్రిగా ఉన్న తండ్రి అధికారాన్ని అడ్డుపెట్టుకుని కార్తీ చిదంబరం అవినీతికి పాల్పడినట్లు తేలడంతో గతేడాది ఫిబ్రవరిలో ఆయనను అరెస్ట్ చేశారు. తాజా కేసులో అత్యంత  నాటకీయ పరిణామాల మధ్య సీబీఐ అధికారులు చిదంబరాన్ని బుధవారం అదుపులోకి తీసుకున్నారు.