`కల్కి 2898 ఏడీ` దర్శకుడు నాగ్ అశ్విన్.. సినిమాలో కల్కి పాత్రకి సంబంధించిన ఆసక్తికర వ్యాఖ్యలు చేశారు. ఆ పాత్రకి ఇంకా ఎవరినీ అనుకోలేదని వెల్లడించారు.
నాగ్ అశ్విన్ సృష్టించిన సరికొత్త ప్రపంచం `కల్కి 2898ఏడీ`. ప్రభాస్‌, కమల్‌ హాసన్‌, అమితాబ్ బచ్చన్‌, విజయ్‌ దేవరకొండ, దీపికా పదుకొనె, దుల్కర్‌ సల్మాన్‌, శోభన వంటి భారీ తారాగణంతో వచ్చిన ఈ చిత్రం బాక్సాఫీసు వద్ద కలెక్షన్లు సునామీ సృష్టిస్తుంది. మొదటి వారంలో ఇది 700కోట్ల క్లబ్‌లోకి చేరింది. చాలా చోట్ల బ్రేక్‌ ఈవెన్‌ కాగా, మరికొన్ని చోట్ల బ్రేక్‌ ఈవెన్‌ దిశగా వెళ్తుంది. నార్త్ అమెరికాలో అన్ని రికార్డులు బ్రేక్‌ చేసింది. ఈ వారంలో అన్ని ఏరియాల్లో ఈ సినిమా లాభాల్లోకి వెళ్తుంది. బయ్యర్లకి, ఎగ్జిబిటర్లకి లాభాల పంట పండించబోతుందని అర్థమవుతుంది.
ఇదిలా ఉంటే ఈ సినిమాపై మొదటి సారి ఓపెన్‌ అయ్యాడు దర్శకుడు నాగ్ అశ్విన్. `కల్కి` సినిమా సెట్‌ వద్ద ఏర్పాటు చేసిన ప్రెస్‌మీట్‌లో ఆయన ఆసక్తికర విషయాలను వెల్లడించారు. సెకండ్‌ పార్ట్ కి సంబంధించి ఇంకా వర్క్ చేయాల్సి ఉందని, ఎప్పుడు స్టార్ట్ చేస్తాము, ఎప్పుడు రిలీజ్‌ అనేది ఇంకా అనుకోలేదని తెలిపారు. అలాగే సినిమాలో మహాభారతం ఎలిమెంట్లని చూపించిన నేపథ్యంలో రెండో పార్ట్ లోనూ ఆయా పాత్రలు, ఆ కథ వస్తుందని చెప్పారు. మొత్తం మహాభారతంపై సినిమా చేయాలనే ఆలోచన లేదన్నారు.
ఈ సందర్భంగా కర్ణుడి పాత్ర గురించి చెబుతూ, సినిమా కోసం ఆ పాత్రని పుట్టించినట్టు, రెండో పార్ట్ లోనూ ఆయా పాత్రలు ఉంటాయని తెలిపారు. అలాగే `కల్కి` పాత్రలో ఎవరు కనిపిస్తారనే ప్రశ్నకి ఆయన ఇచ్చిన సమాధానం అయోమయంలో పడేస్తుంది. ఆ పాత్రకి ఇంకా ఎవరినీ అనుకోలేదని తెలిపారు నాగ్ అశ్విన్. ప్రస్తుతం కథపరంగా కడుపులోనే పెరుగుతున్నాడు. పుట్టడానికి ఇంకా టైమ్‌ ఉంది. దానికి ఇంకా ఎవరినీ ఫిక్స్ చేయలేదని, టైమ్‌ పడుతుందని చెప్పారు నాగ్ అశ్విన్.
సాధారణంగా `కల్కి 2898ఏడీ` సినిమా కల్కి పాత్రనే మెయిన్‌ హీరోగా ఉంటుంది. ఇప్పటి వరకు సుప్రీం యాస్కిన్‌, భైరవ, అశ్వత్థామ, అర్జునుడు వంటి పాత్రలను చూపించినా, అంతిమంగా సినిమాకి కల్కి అసలు హీరో అవుతాడు. సుప్రీం యాస్కిన్‌తో కల్కినే ఫైట్‌ చేస్తారు. అలాంటప్పుడు ఆ పాత్రలో ప్రభాస్‌ కాకుండా మరెవరు ఉంటారు? అది అసాధ్యం. ప్రభాస్‌ తప్ప మరే నటుడిని పెట్టినా సినిమాకి జస్టిఫికేషన్‌ ఉండదు, ప్రభాస్‌ కి జస్టిఫికేషన్‌ ఉండదు. ఈ నేపథ్యంలో దర్శకుడు నాగ్ అశ్విన్ సమాధానం ఆశ్చర్యపరుస్తుంది. కావాలని అలా చెప్పాడా? లేక నిజంగానే ఆ పాత్రలో వేరే హీరోని చూపిస్తాడా? అనేది తెలియాల్సి ఉంది. కానీ మొత్తంగా మాత్రం నాగ్ అశ్విన్ సమాధానం మాత్రం కన్‌ ఫ్యూజన్‌లో పడేసిందని చెప్పొచ్చు.
సినిమాలో అత్యంత కష్టమైన జాబ్‌ గురించి చెబుతూ ఐదేళ్ల క్రితం అనుకున్న ఐడియాని ఇప్పటి వరకు ఇంప్లిమెంట్‌ చేయడం, ఫస్ట్ అనుకున్న జడ్జ్ మెంట్‌ని ఐదేళ్లు క్యారీ చేయడం, ఎడిటింగ్‌లో అదే జడ్జ్ మెంట్‌ కలిగి ఉండటం పెద్ద టఫ్‌ జాబ్‌. అది చాలా కష్టమైంది అని తెలిపాడు నాగ్ అశ్విన్. ఇలాంటి సైన్స్ ఫిక్షన్‌ చిత్రాలు హాలీవుడ్‌లోనే చూస్తుంటాం. మనం కూడా తీస్తామని, మన పిల్లలకు కూడా ఇలాంటి సినిమా చూపించాలనే ఉద్దేశ్యంతో `కల్కి 2898ఏడీ` తీయాలనుకున్నట్టు తెలిపారు. కర్ణుడు, అశ్వత్థామ పాత్రలు మహాభారతంలో నెగటివ్‌గా ఉన్నా, ఇందులో హీరోయిజం చూపించడం పూర్తి సినిమాటిక్‌ లిబర్టీ అని, అయితే నిజంగా భారతంలో శ్రీ కృష్ణుడు ఆ ఇద్దరికి మరో స్థాయి ఎలివేషన్‌ ఇస్తాడని, దానితో పోల్చితే ఇది చిన్నదే అని వెలడించాడు నాగ్ అశ్విన్.