జగన్‌కు మానని గాయం...పాదయాత్ర వాయిదా..?

వైసీపీ అధినేత, ఏపీ ప్రతిపక్షనేత వైఎస్ జగన్మోహన్ రెడ్డి రేపటి నుంచి తలపెట్టిన పాదయాత్ర వాయిదాపడే అవకాశం కనిపిస్తోంది. విశాఖ విమానాశ్రయంలో కత్తిదాడి తర్వాత ఆసుపత్రిలో చికిత్స అనంతరం తన ఇంటిలోనే విశ్రాంతి తీసుకుంటున్నారు.

అయితే పాదయాత్ర షెడ్యూల్ ఆలస్యం అవుతుండటంతో తిరిగి యాత్రలో పాల్గొనాలని జగన్ నిర్ణయించి.. 3వ తేదీ నుంచి పాదయాత్ర తిరిగి ప్రారంభించాలని భావించారు. అయితే దాడి కారణంగా ఆయన భుజం కండరాలకు గాయం మానలేదు. దీంతో వైద్యులు జగన్‌ను విశ్రాంతి తీసుకోవాల్సిందిగా సూచించారు.

ఈ నేపథ్యంలో రేపటి పాదయాత్రను వాయిదా వేసి.. నవంబర్ 10 నుంచి తిరిగి ప్రారంభించాలని జగన్ భావిస్తున్నట్లుగా ప్రచారం జరుగుతోంది. దీనిపై అధికారిక ప్రకటన వెలువడాల్సి వుంది. మరోవైపు దాడి తర్వాత తిరిగి పాదయాత్రను ప్రారంభించేందుకు వస్తున్న జగన్‌కు ఘనస్వాగతం పలికేందుకు వైసీపీ శ్రేణులు విశాఖ విమానాశ్రయం వద్ద భారీ ఏర్పాట్లు చేశాయి. అయితే తమ అధినేతకు గాయం ఇంకా మానకపోవడంతోవారు నిరాశకు లోనవుతున్నారు.