విశాఖలో ఐటీ దాడులు.. టీడీపీ ఎమ్మెల్యే యరపతినేని వియ్యంకుడి ఇంట్లో సోదాలు

విశాఖలో ఆదాయపు పన్ను శాఖ దాడులకు దిగింది.. నగరంలోని పేరం గ్రూప్ కార్యాలయాల్లో ఈ తెల్లవారుజాము నుంచి సోదాలు నిర్వహించింది.  గత వారం విశాఖలో జరిపిన సోదాల్లోనే పేరం గ్రూపుపై దాడి జరగాల్సి ఉన్నప్పటికీ.. అనివార్య కారణాల వల్ల చివరి నిమిషంలో దాడి రద్దయ్యింది

ఆంధ్రప్రదేశ్‌లో అధికార తెలుగుదేశం పార్టీ నేతలు వారి బంధువుల ఇళ్లపై ఆదాయపు పన్ను శాఖ అధికారులు దాడుల కొనసాగుతూనే ఉన్నాయి. గత నెల రోజులుగా ఏపీలోని ఏదో ఒక ప్రాంతంలో ఐటీ దాడులు జరుగుతున్నాయి.

నిన్న గుంటూరుకు చెందిన టీడీపీ నేత, ఎల్‌వీఆర్ క్లబ్ సెక్రటరీ కె. రవీంద్ర బాబు ఇంట్లో ఐటీ శాఖ సోదాలు నిర్వహించింది. తాజాగా ఇవాళ విశాఖలో ఆదాయపు పన్ను శాఖ దాడులకు దిగింది.. నగరంలోని పేరం గ్రూప్ కార్యాలయాల్లో ఈ తెల్లవారుజాము నుంచి సోదాలు నిర్వహించింది.

గత వారం విశాఖలో జరిపిన సోదాల్లోనే పేరం గ్రూపుపై దాడి జరగాల్సి ఉన్నప్పటికీ.. అనివార్య కారణాల వల్ల చివరి నిమిషంలో దాడి రద్దయ్యింది. మరోవైపు పేరం గ్రూప్ అధినేత హరిబాబు.. టీడీపీ సీనియర్ నేత, గుంటూరు జిల్లా గురజాల ఎమ్మెల్యే యరపతినేని శ్రీనివాస్‌కు వియ్యంకుడు.