ఫార్ములా ఇ‌ రేసింగ్ ముగిసినా తప్పని కష్టాలు...కట్టలు తెంచుకున్న వాహనదారుల ఆగ్రహం

 హైదరాబాద్ : తెలంగాణ రాజధాని హైదరాబాద్ లో ఎలక్ట్రిక్ కార్లతో నిర్వహించిన ''ఫార్ములా ఇ రేసింగ్'' విజయవంతంగా ముగిసింది. ఈ ఫార్ములా రేసింగ్ తో హైదరాబాద్ అంతర్జాతీయ స్థాయి గుర్తింపు పొందింది. అయితే ఈ రేసింగ్ హైదరబాదీలను ఎంతగానో ఆకట్టుకోగా... కొందరిని తీవ్రంగా ఇబ్బంది కూడా పెట్టింది. కార్ రేసింగ్ కోసం హుస్సెన్ సాగర్ పరిసరాల్లో భారీగా ట్రాఫిక్ ఆంక్షలు  విధించడంతో పాటు కొన్ని రోడ్లను బారీకేడ్లు పెట్టి మరీ పూర్తిగా మూసేసారు. అయితే ఫార్ములా ఇ రేసింగ్ ముగిసిన తర్వాత కూడా మూసేసిన కొన్ని రూట్లను తెరవకుండా వాహనదారులను అడ్డుకున్నారు పోలీసులు. దీంతో చిర్రెత్తిపోయిన కొందరు వాహనదారులు పోలీసులతో వాగ్వాదానికి దిగి బారీకేడ్లు తోసుకుని మరీ ముందుకెళ్లారు. కనీస సమాచారం లేకుండా రోడ్లను ఎలా మూసివేస్తారంటూ వాహదారులు ఆగ్రహం వ్యక్తం చేసారు.