బెలూన్లకు కేసీఆర్ ప్లెక్సీలు కట్టి... సరికొత్తగా సీఎం భర్త్ డే సెలబ్రేషన్స్

పెద్దపల్లి : బిఆర్ఎస్ పార్టీ అధ్యక్షలు, తెలంగాణ ముఖ్యమంత్రి కేసీఆర్ పుట్టినరోజున ఘనంగా జరుపుకునేందుకు అధికార పార్టీ నాయకులు ముమ్మర ఏర్పాట్లు చేస్తున్నారు. ఫిబ్రవరి 17న అంటే రేపు రాష్ట్రవ్యాప్తంగా కేక్ కటింగ్స్, అన్నదానం, రక్తదానం, పండ్ల పంపిణీ వంటి సామాజిక కార్యక్రమాలను బిఆర్ఎస్ నాయకులు ఏర్పాటుచేసారు. అయితే అందరు నాయకుల్లా కాకుండా డిఫరెంట్ గా కేసీఆర్ భర్త్ డే వేడుకలను ప్లాన్ చేసారు పాలకుర్తి జడ్పిటిసి కందుల సంధ్యారాణి.  పెద్దపల్లి జిల్లా అంతర్గాం మండలం లింగాపూర్ గ్రామంలో ఊరంతా పండగ వాతావరణం పేరిట కేసీఆర్ పుట్టినరోజు కార్యక్రమాన్ని నిర్వహించారు సంధ్యారాణి. ప్రతి ఇంటి నుండి గులాబీ రంగు బెలూన్లను గాల్లోకి ఎగరేస్తూ ఉత్సాహభరితంగా సంబరాలు జరుపుకున్నారు. అలాగే కేసీఆర్ కు భర్త్ డే విషెస్ తెలుపుతున్న ప్లెక్సీలను కూడా బెలూన్లకు కట్టి గాల్లోకి వదిలారు. అనంతరం వృద్దులతో పాటు గ్రామస్తులందరికీ సంధ్యారాణి స్వీట్లు పంపిణీ చేసారు. ఇలా ఒకరోజు ముందుగానే కేసీఆర్ పుట్టినరోజు వేడుకలను ఘనంగా నిర్వహించారు జడ్పిటిసి సంధ్యారాణి.