రోడ్డుపైనే కేసీఆర్ గల్లాపట్టి... ఆ వాహనంలోంచి కిందకుదించి..: బండి సంజయ్ సంచలనం

నర్సాపూర్ : తెలంగాణ ఉద్యమ సమయంలో కనీసం ఫైనాన్స్ కట్టడానికి కూడా డబ్బుల్లేని కేసీఆర్ ఇవాళ లక్షల కోట్లకు పడగలెత్తారని తెలంగాణ బిజెపి అధ్యక్షుడు బండి సంజయ్ ఆరోపించారు. గతంలో తెలంగాణ ఉద్యమ సమయంలో కేసీఆర్ వెంటవున్న ఉద్యమకారుడు గాదె ఇన్నయ్య మాటలను ఈ సందర్భంగా సంజయ్ గుర్తుచేసారు. టీఆర్ఎస్ పార్టీ స్థాపించిన తర్వాత కేసీఆర్ బ్యాంక్ రుణం తీసుకుని చైతన్య రథాన్ని తీసుకున్నారని... నెల నెలా ఫైనాన్స్ కట్టకపోవడంతో ఆ వాహనాన్ని బ్యాంక్ సిబ్బంది రోడ్డుపైనే తీసుకెళ్లారని అన్నారు. కేసీఆర్ గల్ల పట్టి కిందకు దించిమరీ చైతన్య రథాన్ని మంజీర గ్రామీణ బ్యాంకు వాళ్లు గుంజుకుపోయారని ఇన్నయ్య చెప్పారని బండి పేర్కొన్నారు. అలాంటిది ఇవాళ కేసీఆర్ మరియు ఆయన కుటుంబం విదేశాల్లో లక్షల కోట్ల పెట్టుబడులు పెట్టి సంపాదిస్తోందన్నారు. ఆనాడు నిండా అప్పుల్లో మునిగిన కేసీఆర్... ఇవాళ వంద కోట్లతో సొంత విమానం ఎట్లా కొన్నారు? అని బండి సంజయ్ ప్రశ్నించారు.