సిరిసిల్ల జిల్లాలో ఘోర అగ్నిప్రమాదం ... కోటి రూపాయలకు పైగా ఆస్తి నష్టం

సిరిసిల్ల :  దీపావళి పండగ సందర్భంగా తెలుగు రాష్ట్రాల్లో భారీ అగ్నిప్రమాదాలు చోటుచేసుకున్నాయి. ఇలా రాజన్న సిరిసిల్ల జిల్లా తంగళ్ళపల్లి మండలంలోని టెక్స్ టైల్ పార్క్ సమీపంలోని పౌరసరఫరా శాఖ గోడౌన్ లోనూ అగ్నిప్రమాదం చోటుచేసుకుంది. గోడౌన్ లో భారీగా గోనెసంచులు వుండటంతో వాటికి మంటలు అంటుకుని ఉవ్వెత్తున ఎగిసిపడ్డాయి. ఇది గమనించిన స్థానికులు ఫైర్ సిబ్బందికి సమాచారమివ్వగా రెండు ఫైరింజన్లు చేరుకుని మంటలను అదుపుచేసాయి. ఈ అగ్నిప్రమాదంలో భారీ ఆస్తి నష్టం జరిగింది. పౌరసరఫరా శాఖకు సంబంధించిన గోనె సంచులు కాలిపోవడంతో మంటల తాకిడికి గోడౌన్ గోడలు పూర్తిగా దెబ్బతిన్నాయి. దీంతో ఎలాంటి ప్రమాదం జరక్కుండా అధికారులు ముందుగానే దెబ్బతిన్న గోడలను కూల్చివేయించారు. మొత్తంగా ఈ అగ్ని ప్రమాదంతో కోటికి పైగా ఆస్తినష్టం జరిగినట్లు అధికారులు అంచనా వేస్తున్నారు.