విజయ్, అజిత్ ఫ్యాన్స్ ప్లెక్సీ ఫైట్...ఓ థియేటర్ వద్ద వారి హల్ చల్ చూడండి...

చెన్నై : తెలుగు ప్రజల్లాగే తమిళులు కూడా సినిమాలంటే పడిచస్తుంటారు. తాము అభిమానించే నటీనటులను దేవుళ్లలా భావిస్తూ ఏకంగా ముఖ్యమంత్రులను చేసిన చరిత్ర తెలుగు, తమిళులది. ఇలాంటిది తమ అభిమాన నటుడి సినిమా రిలీజ్ అంటే అభిమానులకు పూనకాలు లోడ్ అవుతుంటాయి. ఇలా అభిమానం ముదిరి ఒక హీరో అభిమానులు మరో హీరో సినిమా పోస్టర్లను చింపేస్తూ వీరంగం సృష్టించిన ఘటన తమిళనాడులో చోటుచేసుకుంది.  తమిళ్ స్టార్ హీరోలు హీరో విజయ్ మూవీ వారీసు (తెలుగులో వారసుడు), అజిత్ మూవీ తునివు (తెలుగులో తెగింపు) తమిళనాడు వ్యాప్తంగా ఒకేరోజు విడుదలయ్యాయి. బుధవారం ఈ రెండు సినిమాల విడుదల సందర్భంగా థియేటర్ల వద్ద ఇరు హీరోల అభిమానులు సందడి చేసారు. తమ అభిమాన హీరో ప్లెక్సీలు, కటౌట్లకు పాలాభిషేకాలు, పూలదండలు వేస్తూ అభిమానం చాటుకున్నారు. ఇంతవరకు బాగానే వున్నా తమ హీరోకు పోటీగా సినిమా విడుదల చేసిన హీరో సినిమా పోస్టర్లను చింపేస్తూ హంగామా సృష్టించారు. ఇలా అజిత్, విజయ్ ఫ్యాన్స్ ఓ థియేటర్ వద్ద పోస్టర్లు చించుతూ హంగామా సృష్టించిన వీడియో ఒకటి సోషల్ మీడియాలో చక్కర్లు కొడుతోంది.